Peluarakoa 19

Ondae i Ue mepopokita i torukuno Sinai

19:1-25

1Oleo amba-ambano wula ko'otolu umarido mpeluarako to Isaraeli inso i wita Masiri, mehawe ira i pada one Sinai. 2Mansado mpelungka inso i Rapidi, mehawe iramo i pada one Sinai, ka dompekema i pada one atuu. I ra'ai dompekema to Isaraeli i arono torukuno atuu.

3Ka i'amba i Musa mewuatako me'aro ndi Ondae Ue Ala, ka Ondae i Ue mebooli ndi onae inso i torukuno atuu, ”Kanandiomo pauako ira inuleno i Yako ka pauako ira to Isaraeli: 4Omiu isa'a mengkitao anu wineweu-Ku a nto Masiri, ka ba kana'umpe Kutande komiu a wawo mpanino kongka wawa komiu ndi Ongkue. 5#Win. 4:20; 7:6; 14:2; 26:18; Tit. 2:14; 1Pet. 2:9; Meng. 1:6; 5:10Gagi kanandio-andio, tewala mentee ntu'u komiu mpoperorongeako pau-Ku ka mpe'ini a mpedandia-Ku, komiu megagi tongku pinehohawa-Ku inso i olodo luwuno tongku, nde asa wawontolino andio Ongkue me'ueo. 6Komiu tewinso gagi sando mpesomba ka tongku anu mempori ndi Ongkue. Onaemo andio luwuno pau anu kopauako ira to Iaraeli.”

7Umarino atuu haweomo i Musa ka ipoboi ira luwuno mia memota'u to Isaraeli ka ipauako ira i arodo luwuno pau mpetena-Do i Ue ndi onae. 8Luwuno tongku atuu mesangki mperonga-ronga, ”Luwuno anu pinau-Do i Ue kami meweweuo.” Ka i'amba i Musa mohaweo sangkido tongku atuu ndi Ondae i Ue. 9Mepau Iramo i Ue ndi Musa, ”Onaemo pu'uno, Aku aiwa ndi omue a laro nseru anu mokapa, ka domerongeo tongku atuu ba Kupepau ndi omue, ka inso i ra'ai iramo mpe'ala-alako mpiha.” Tempono i Musa pauako Ira i Ue paudo tongku atuu,

10Mepau Ira i Ue ndi Musa, ”Lakomo tepohaweako ira tongku atuu; pokomempori iramo oleo andio ka tisomo; asalakono domelomboo sangkado. 11Rangkuomo oleo ko'otolu impepatindamo, nde oleo ko'otolu Aku metii i arodo luwuno tongku andio i torukuno Sinai. 12#Ibr. 12:18-20Onaemo pu'uno asalakono poweweuako ira tida lumimbu ira tongku atuu ka pauako ira: Imetangkoroo koroimiu si mporake a ntorukuno atuu ke dumanggio tida, nde ba isemamokoa anu dumanggio torukuno atuu, asalakono onae hinuku mate. 13Maupo kaeno isema simedanggio mia atuu, manasa winunoako watu ke pinana; ke pinotuwu maupo mia, nahi ta pino'inee tuwu. Tewala tawuwua unino melai, moikoomo domporake i torukuno atuu.”

14Metiiomo i Musa inso i torukuno tepohaweako ira tongku atuu. Ipokomempori ira tongku atuu ka dompolombo sangkado. 15Ipotaeako ira i Musa tongku atuu, ”Impepatindamo rangkuomo oleo anu ko'otolu, kasi mpewowaliako beine.”

16 # Meng. 4:5 # Win. 4:11-12 Umarino atuu gagiomo a oleo ko'otolu mo'oru, rundu, koliki ka seru mokapa i wawo ntorukuno saru unino tawuwua anu tedoa meroku, onaemo ka dompondidi-ndidi, luwuno mia anu kongko a mpekemaa.

17I Musa wawa ira tongku atuu mpeluarako inso a mpekemaa tepohaweako Ira Ue Ala ka dompentade a puu torukuno. 18Asa torukuno Sinai me'ahu, hangano Ondae i Ue metii i wawono a laro api. Ahuno membombo kana ahu api polabua, ka torukuno atuu reende. 19Unino tawuwua kotehi-tehineno komero-merokuno. I Musa mepau, Ondae Ue Ala sumangki a laro rundu. 20Umarino atuu Ondae i Ue metii a wawo ntorukuno Sinai, a punsuno torukuno atuu. Ka Do'amba i Ue moboio i Musa i punsuno torukuno atuu. Ka i Musa morake lumako i wawono.

21Mepau Ira i Ue ndi Musa, ”Petiimo, pauako ira ntu'u tongku atuu, siimo dompotilalo umpeda ndi Ondae i Ue mingki mpengkita-kita, ka ta hadio inso ndi ondae anu mate. 22Kanatuu koa mbo'u sando mpesomba anu me'aiwa umpeda ndi Ondae i Ue asalakono dompokomemporio koroido, kasi Doropu ira.” 23Ka i'potae i Musa ndi Ondae i Ue, ”Nahi ira mporake tongku atuu a ntorukuno Sinai andio, nde Omiu isa'a anu pauakami, kanandio: Impoweweumo tida lumimbuo torukuno andio ka ipauomo nine mempori.”

24Mepau Ira i Ue ndi onae, ”Lakomo, petiimo, ka u'amba mewuatako saru i Haruni, sine luwuno sando mpesomba ka palili nahi moiko dompotilalo mporake umpedaako Ira i Ue, kasi Doropu ira.”

25Metiiomo i Musa tepohaweako ira tongku atuu ka ipauako ira luwuno ndi ondae.

Currently Selected:

Peluarakoa 19: XMZ

Highlight

Compare

Copy