EPESU 4
4
Tepo'asaado bawaa ka pompowee anu mpesingge-singge
4:1-16
1Onaemo pu'uno ku'emao ntu'u ndi omiu, ongkue, mia anu tinorungku hangano Ondae i Ue, ka imentuwu gagi mia anu mempinoboi komiumo menunu saru pepoboi atuu. 2#Kol. 3:12-13 Iwela koa mpekoko'unduako, memauru, ka sabara. Impopokitaomo pompehohawamiu a laro mongkona mambe tulungi. 3Ka impeteahakomo mpekakaakono tepo'asano Penaa hangano te'onggoako rodoa: 4aasa koroi, ka aasa Penaa, ba kana'umpe imempinoboi a aasa pomperorohia anu tewinso a mpoboimiu, 5aasa Ue, aasa pompe'ala-ala, aasa pebaho, 6aasa Ue Ala ka Amado luwuno, Ondae Ue Ala anu i wawono luwuno ka hangano luwuno ka i larono luwuno. 7Sine ndi ontae singge mia mempinoweeako kitamo pompehohawa montonda sa'uno pompowee-Do i Kerisituu. 8#Pud. 68:19 Onaemo pu'uno ka ipinau a Wunta Mempori,
”Tempono Dopewuatako a mpo'ianga mantande, Dowawa ira mia mentinawa;
Dopoweeako ira mia hadio pompowee.”
9Kombake ”mewuatako Iramo” pengkonaano, nine metii Iramo mbo'u i tolino anu lalu i totono? 10Ondae anu metii Iramo, Ondae koa mbo'u anu mewuatako Iramo olaiopo lalu mantande sekonopo luwuno langi, mokobukeo luwuakoano. 11Ka Ondaemo anu moweeako ira moiko luwuno tinena maupo luwuno nabi, moiko luwuno anu mompalele Lele Mawongkoa maupo luwuno puu pompakambi ka luwuno anu mompaguru, 12ka dopatinda ira mia memempori a mpo'anggaa mompekakaako, a mpowangua koroi-Do i Kerisituu, 13ranta ka tontepo'asamo luwu a pompe'ala-ala ka ponto'ori anu mentee mongkona Ana-Do Ue Ala, sompoomo tinuwu, ka tuwuno anu menunu saru bobotoli-Do i Kerisituu, 14ranta komba menana'ote kita mbo'u, anu ngkoraane-ngkoramai hangano mperupa-rupa angi pompaguru, hangano pepalindodo mia anu nahi mentee a mpe'akalado anu mompopo'oo, 15sine temoroso tompe'ini a menteea a laro pompehohawa ka tomentuwu a luwuakoano te'aro ndi Ondae, i Kerisituu, anu ondaemo Tadulako. 16#Kol. 2:19 Insomo ndi Ondae asa ngkoroi, – anu tepotuda moiko ka inonggo gagi aasa hangano pompekakaakono luwuno parewa ngkoroi, menunu saru pinoko'anggano sompo-sompo parewa ngkoroi – montarima tuwuno ka wanguo koroino a laro pompehohawa.
Mia wo'ohu
4:17-32
17Onaemo pu'uno ka kupauo ka kupokomanasaakomiu andio ndi Ondae i Ue: Si mentuwu mbo'u mengkena kana mia anu nahi domento'ori Ira Ue Ala saru pinewowolodo anu nahina tuduno 18ka ponto'orido anu wongi-wongi, olai inso a ntuwu tepo'asaa saru Ondae Ue Ala, hangano benge-bengea anu kongko i larodo ka hangano moteano aroado. 19Nami hina mokoko'iido, onaemo ka dompeweengakono koroido a mpo'eheno aroado ka saru me'alu. Meweweuo mperupa-rupa mokoburua. 20Sine omiu komba kanandio. Mpepaguru komiumo tumo'ori Ira i Kerisituu. 21Hangano imerongeomo mongkona Ondae ka mentarimao pompaguru ndi Ondae montonda menteea anu mengkaa ndi Ondae i Yesu, 22#Kol. 3:9 onaemo nine omiu, hangano tuwumiu anu i ndi'upua, asalakono imelolohio mia laano, anu mohawe mateano hangano po'eheno aroano anu mompopo'oo, 23ka imempinokowo'ohu a laro mpenaa ka pinewowolomiu, 24#Teg. 1:26; Kol. 3:10 ka impokonao mia wo'ohu, anu pinokogagiomo montonda po'ehe-Do Ue Ala a menteea ka memporia anu menteeano. 25#Sak. 8:16 Onaemo pu'uno imentadiomo pegaupi ka isinggemo mpepau mentee a mpe'asa miamiu, hangano pada kitamo parewa ngkoroi. 26#Pud. 4:5 Tewala gagi komiu ntekuda, si mpoweweu hala: si mentekuda hawe ka isumoo oleo 27ka si mpoweeakono tempo i Mosa'o. 28Mia anu monako, siimo mbo'u iponako, sine moikoopo ipo'angga ntu'u ka i'anggaakono kaeno onaeno anggaa anu moiko ka ihina koa ipokompontiaako ira mia memakura. 29Si hina pau anu mokoburu inso a wiwimiu, sine impepauakomo pau anu moiko anu mompokoroso, ba isua ikinere, ka dompohawe pompehohawa mia anu merongeo. 30Ka si mpokomasusa Ira Penaa Mempori-Do Ue Ala, anu tumondoni komiumo a haweano oleo pongkaduduia. 31Luwuno mahaki aroa, bamburua, tekudaa, teposisalaa ka pomposebe asalakono imentadio inso i olomiu, kanatuu koa mbo'u luwuno wineweu mosa'o. 32#Kol. 3:13 Sine po'ineeomo ka imemambe pe'aroaako, buke pompehohawa ka mambe'ampuni, kana Ondae Ue Ala Do'ampunikomiumo ndi Ondae i Kerisituu.
Currently Selected:
EPESU 4: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
