Winali 3

Peteaa umewaio i Ogo, mokole i Basani

3:1-11

1 # Pod. 21:31-35 Ka to'amba mpelengkuako melako te'aro i Basani. I Ogo, mokole i Basani saru luwuno sorodaduno, me'aiwa rumangkuhi kita ira mpetea i Ederei. 2Sine mepau Ira i Ue ndi ongkue, ”Si doitoakono, hangano Aku meweengakono a ngkaemu, saru luwuno sorodaduno ka witano. Weweuomo kana anu wineweumu ndi Sihono, mokoledo to Amori, anu mo'ia i Hesiboni.” 3Ka Do'amba i Ue, Ue Alato meweengakono mbo'u i Ogo, mokole i Basani, saru luwuno sorodaduno a ngkaeto. Tomenangio, ranta nahina maupo te'asa mia tola. 4I tempo atuu, tompoko'alao luwuno kotano. Nahina kota anu nahi tomerontuo inso ndi ondae: nomopulu kota, luwuno pinebawaino i Arigo, poparentaano i Ogo i Basani. 5Luwuno atuu kota hinao benteno, saru rere watu anu memantande, pewowa langkai ka luwuno lansono. Umarino atuu, hadio ntu'u kota anu nahi pebente. 6Tomeropu ira luwuno palilino, kana anu wineweuto ndi Sihoni, mokole i Hesiboni, saru rumopu ira palili sompo kota: tama, beine ka nana'ote. 7Sine luwuno pinotuwu ka pinomuru inso a luwuno kota atuu tomerontuo tiato ontaeto.

8Gagi, i tempo atuu tomerontuo inso a ngkaedo orua mokoledo to Amori atuu wita anu i asatowano Koro Yarade, mompu'u inso a Ngkoro Aranoni hawe a ntorukuno Heremoni. 9Kanandiomo to Sidoni mempauo Heremoni atuu Sirioni; to Amori mempauo Seniri. 10Tomerontuo luwuno kota i wita mantandeano, luwuno Gileadi ka luwuno Basani hawe i Salika ka Ederei, luwuno kota poparentaano i Ogo i Basani. 11Butu i Ogo, mokole i Basani anu da tuwu inso i olono toreado to Repaimi. Sekono dasa poturiano, dasa labu. Kombake da kongko i kota Raba inuleno i Amoni? Osio hiku ondauno ka opaa hiku maluano, montonda posongka anu biasa.

Petiaa wita i sabaano oleo Yarade

3:12-22

12 # Pod. 32:1-33 Kanandiomo wita atuu tompentorokiomo i tempo atuu. Kuweeako ira to Rube ka to Gadi wita inso i Aro'eri i wiwi Ngkoro Aranoni saru entongano mentorukuno Gileadi saru luwuno kotano. 13Wita Gileadi toreano saru luwuno Basani, poparentaano i Ogo, luwuno atuu pinebawaino i Arigo, anu entonga kuweeako ira suku Manase. Luwuno Basani andio pinau witado to Repaimi. 14I Yaeri, anano i Manase, umalao luwuno pinebawaino i Arigo hawe tida witado to Gesuri ka to Ma'aka. Wita atuu, Basani, nineeako montonda neeno koroino ”Hawoti-Yaeri”, hawe oleo andio. 15Ndi Makiri kuweeakono Gileadi. 16A nto Rube ka to Gadi kuweeako ira wita inso i Gileadi hawe Korono Mo'are Aranoni, saru a ntongano korono mo'are atuu gagi petidaa, ka hawe Korono Mo'are Yabo, tida witado inuleno i Amoni. 17Araba-Yarade ka Koro Yarade mbo'u gagi petidaa, mompu'u inso i Kinereti hawe a Ntahi Araba, Tahi Me'ohia atuu, a mpuu Torukuno Pisigaa te'aro i sabaano oleo.

18 # Yos. 1:12-15 I tempo atuu kuparentaa komiu, kanandio, ”Ondae i Ue, Ue Alamiu Doweeakomiu wita andio ka impe'ueo. Sine omiu luwuno mia moroso ka mosia, asalakono impesakiako saru sangka peteamiu i arodo pepaekompomiu, to Isaraeli. 19Butu anamiu ka kombiamiu ka pinotuwumiu, anu kuto'orio hadio ndi omiu, moiko dompo'ia a luwuno kota anu kuweeakomiu, 20ranta ka Dopoweeako ira i Ue rodoa ndi ondae pepaekompomiu, kana ndi omiu. Ondae mbo'u mpope'ue wita anu Doweeako ira i Ue, Ue Alamiu ndi ondae i asatowano Koro Yarade. Umarino atuu moikoomo impekule, singge mia lumako a wita pine'ueno anu kuweeakomiumo.”

21Ndi Yosua kuparentao i tempo atuu, kanandio, ”Ukitaakonomo matamu luwuno anu wineweu-Do i Ue, Ue Alamu, ndi orua mokole atuu. Kanandiomo anu ta wineweu-Do i Ue a luwuno poparentaa, ba isua ulako. 22Si doitoako ira, hangano Ondae i Ue, Ue Alamu, Ondaemo anu umeu komiu metea.”

I Musa nahi ineheako mewinsokio wita Kana'a

3:23-29

23 # Pod. 27:12-14; Win. 32:48-52 I tempono atuu mo'ema aku pompehohawa-Do i Ue, kanandio, 24”Oo, Ue Ala, Mompu'uomo Ipopokitaakono tetenaa-Miu andio langkaino pabawa-Miu ka kae-Miu anu moroso. Hangano, ue ala isemake i langi ka i tolino, anu polio moweweu wineweu mongkokongiri kana Omiu? 25Ipo'inee akumo mesakiako ka kumitao wita anu moiko anu i asatowano Koro Yarade, wita mentorukuno anu moiko atuu, ka Libano.”

26Sine, Ondae i Ue tekuda Ira ndi ongkue hangano omiu ka nahi mperorongeakono po'emaku. Mepau Ira i Ue ndi ongkue, ”Sompoomo! Siimo mbo'u pauo mongkona atuu saru Ongkue. 27Pewuatakomo a punsuno Torukuno Pisiga ka pengkitamo i sumooano oleo, i utara, i selata ka i sabaano oleo. Kitaomo temoiko, hangano nahi kosumakio Koro Yarade andio. 28Weeakonomo parenta ndi Yosua saru pokorosoo ka pokomoleoo aroano, hangano onaemo anu ta mesakiako i arodo tongku andio ka onaemo anu ta wawa ira ranta ka dompe'ueo wita anu ta kinitamu atuu.” 29Kanatuumo tompo'ia i lembono i asatowano Beti-Peori.

Currently Selected:

Winali 3: XMZ

Highlight

Compare

Copy