Winali 34

Mateano i Musa

34:1-12

1Ka i'amba i Musa mewuatako inso i lembono Moabi, motilaloi wawono torukuno Nebo, a punsuno Pisiga, anu i asambalino Yeriko. Ka i'amba Ondae i Ue mopokitaakono luwuno wita atuu; wita Gileadi hawe i kota Dani, 2luwuno Napatali, wita Eparai, ka Manase, luwuno wita Yehuda hawe i tahi i somooano oleo, 3wita Nege, ka Lembono Yarade, lembono Yeriko, kota keu kuruma atuu, hawe i Soare. 4#Teg. 12:7; 26:3; 28:13Mepau Iramo i Ue ndi onae, ”Onaemo andio wita anu Kudandiakono sumpa ndi Burahima, ndi Saki, ka ndi Yako, kanandio: ’A inulemiumo Aku weengakono wita atuu.’ Kupo'ineeko kumitaakono matamu, sine nahi komesakiako raane.”

5Ka i'amba i Musa tetenaa-Do i Ue atuu mate I ra'ai, i wita Moabi, menunu saru pau-Do i Ue. 6Dokaburuo i aasa lembono i wita Moabi tepo'aro saru Beti-Peori, ka nahina mia anu tumo'orio kaburuno hawe a oleo andio. 7Tinuwuno i Musa asa etu rua pulu nta'u tempono kai mate. Matano napi morawu ka roso napi tetadi. 8To Isaraeli mensabangio i Musa i lembono Moabi i larono tolu pulu oleo. Ka i'amba tampulaomo oleo ponsabangia ka masusaakono i Musa.

9Ndiomo i Yosua anano i Nuni bukeako penaa ponto'ori, hangano i Musa umari numaao kaeno i wawono. To Isaraeli mperorongeakono ka meweweuo kana peparenta-Do i Ue ndi Musa. 10#Pel. 33:11Nami hina mbo'u nabi anu mentade i olodo to Isarali kana i Musa anu tino'ori-Do i Ue tepopo'aro rupa; 11i larono luwuno petondoni ka anu kinohali-haliako, anu wineweuno a parenta-Do i Ue i wita Masiri ndi Pirao, luwuno pegawaino, ka luwuno witano 12luwuakoano mbo'u peleluno i Musa bukeako pabawa, ka wineweuno anu mongkokongiri i arodo luwuno to Isaraeli.

Currently Selected:

Winali 34: XMZ

Highlight

Compare

Copy