Winali 33
33
Poronsono i Musa a luwuno suku Isaraeli
33:1-29
1Ndiomo ronso anu iweeako ira i Musa, tetenaa-Do Ue Ala atuu, a nto Isaraeli se'eluno imate. 2Ipotae,
”Ondae i Ue aiwa inso i Sinai
ka mesabaako ndi ondae i Seiri,
Mewanta inso a torukuno Parani.
Aiwa Ira meronga saru bawaa mempori mapasowu-sowu hadiono;
i koana-Do tengkita ndi ondae api anu melanga.
3Mentee ntu'u Dopehohawa ira bawaa-Do,
luwuno mia-Do anu mempori, a laro ngkae-Do i Ue.
A ngkaru-Miumo dompentoro,
morako aasa inso a mpau-Miu.
4I Musa mohaweo songka Taura ndi ontae,
aasa tiado bawaano i Yako.
5Ondae i Ue gagi mokoledo to Yesuruni,
tempono luwuno petewawado tongku mpepumpu,
luwuno suku i Isaraeli mperonga-ronga.
6Po'ineeomo i Rube tuwu kasi mate,
sine porokono miano tedei.”
7Ndiomo anu pinauno mongkona i Yehuda,
”Irongeomo, oo Ue, peboolino i Yehuda
ka wawaomo a tongkuno.
Ikaduduiakonomo kae-Miu
ka gagi pontulungi umewaio iwalino.”
8 #
Pel. 17:7; 28:30; Pod. 20:13 Mongkona i Lewi, ipotae,
”Po'ineeomo Tumimi ka Urimi-Miu
gagi tiano mia pinehohawa-Miu,
anu umariomo I'arahakono i Masa.
Omiu teposangki saru onae umpeda mata uwoi Meriba.
9Onae anu motae mongkona ama ka ineno,
’Nahi kuperio ira.’
Onae anu nahi behe tumo'ori ira pepaekompono
ka nahi perio ira anano.
Sine to Lewi mpekariao pau-Miu
ka mpe'ini a mpedandia-Miu.
10Dopaguruako ira atora-Miu ndi Yako,
songka-Miu a nto Isaraeli;
mponaa ira pesomba anu mana mo'ahii aro-Miu
ka pesomba anu tinunu luwu i wawono meda pontunua pesomba ndi Omiu.
11Ironsoomo, oo Ue, rosono
ka Ipekonaomo inanggano.
Ipuroakonomo lompeno mia
anu umewaio ka anu umo'aliaakono, ranta nahi dompoko mpentade.”
12Mongkona i Benami, ipotae,
”Pinehohawa-Do i Ue
mo'ia rodo umpeda ndi Ondae!
Ondae i Ue kumaduduio sompo tempo
ka mo'ia a luwuno pongku witano.”
13Mongkona i Yusupu ipotae,
”Po'ineeomo witano Doronsoakono i Ue
uwoi tontoru anu lalu moiko inso i langi,
ka tahi malua anu mo'ia i totono;
14saru hasili anu lalu moiko inso a mata oleo,
ka pinopaho anu lalu moiko inso a wula;
15saru anu ko'aasa inso a luwuno torukuno nse'elu,
anu moiko ntu'u inso a luwuno pongku wita anu nahi bali,
16ka anu lalu moiko inso i tolino saru ihino;
saru mpo'ehe-Do i Ue anu kongko a laro rui.
Po'ineeomo luwuno atuu metii a wawo uluno i Yusupu,
a ntoro uluno mia bininiki i olono pepaekompono.
17Marambano kana ana sapi amba-ambano,
ka tanduno kana tandu onua.
Onae ta tumanduo luwuno tongku,
asa wawontolino, inso i tompano hawe i tompano.
Kanatuumo pulunsowuno to Eparai,
ka sowuno to Manase.”
18Mongkona to Sebulo, ipotae,
”Mawongkomo, hei Sebulo, a pelempaamu,
ka omue mbo'u, hei Isakari, a nkemamu.
19Luwuno tongku ira mempinoboi a ntorukuno;
i ra'aimo dompopesombaako pesomba anu mentee.
Ondae ira mpo'oso hadio ntu'u ihino tahi
ka arataa anu tetano a laro one.”
20Mongkona i Gadi, ipotae,
”Unde-unde Iramo anu mokomaluao witano i Gadi.
Kana singa mo'ia
ka momperangkami tokia, maupo banga ulu.
21Ibinikio anu ko'aasa,
hangano i ra'aimo ininaa tiano tadulako,
i ra'aimo dome'aiwa luwuno petewawa tongku.
Iweweuo anu pinementee-Do i Ue
saru pohuku-Do meronga to Isaraeli.”
22Mongkona i Dani, ipotae,
”I Dani onaemo anano singa
anu melonso meluarako inso i Basani.”
23Mongkona i Napatali, ipotae,
”I Napatali mowohiako po'ehe-Do
ka bukeako poronso-Do i Ue;
pe'ueomo rano ka wita i selata.”
24Mongkona i Asieri, ipotae,
”Rinonsoomo i Asieri i olodo luwuno ana ntama;
po'ineeomo dome'ineheakono pepaekompono,
ka i'emoo karuno a lana.
25Po'ineeomo inso a labu ka mala lansono tondono,
rosomu asa ntinuwumu.
26Nahina kana Ondae Ue Ala, hei Yesuruni.
Ondae mepole ilangi gagi pontulungimu
ka luwuno seru a laro maramba-Do.
27Ondae Ue Ala anu nahi bali onaemo puu pongkaduduimu;
i totomu hinao tokia anu nahina tampulaano.
Dosaario iwali inso i aromu
ka mepau, ’Ropuomo.’
28I Isaraeli mo'ia rodo
a mata uwoino i Yako nahi umonsoio
i asa wita anu hinao gandu ka anggoro;
maupo langino mompo'iti tontoru.
29Manangaikomo, hei Isaraeli!
Isemake anu mengkena saru omue,
aasa tongku anu kinadudui-Do i Ue,
kanta pontulungi
ka ponai ponangimu?
Iwalimu ira mpetuundu mpesile'i ndi omiu,
ka omue kolumolandao pongku witado.”
Currently Selected:
Winali 33: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
