Winali 27
27
Watu pepopoto'ori ka meda pontunua pesomba i Torukuno Ebali
27:1-10
1I Musa ka luwuno mia memota'u Isaraeli parenta ira mbo'u tongku atuu, ”Impe'inimo a luwuno parenta anu kupohaweakomiu oleo andio. 2#Yos. 8:30-32A oleo imensakio Koro Yarade melako a wita anu Doweeakomiu i Ue, Ue Alamiu, omiu asalakono mpontade ira watu melolangkai, ka imengkapuruo. 3Ka i'amba a watu atuu asalakono imeburio luwuno pauno songka Taura andio, umarimiu mensaki komiu mpewinso a wita anu Doweeakomiu i Ue, Ue Alamiu, asa wita anu hadio ntu'u susu ka siu hoanino, kana anu Dodandiakomiu i Ue, Ue Alado uempu'umiu. 4Umarimiu mensakio Koro Yarade, asalakono luwuno watu atuu impontadeo i torukuno Ebali ka imengkapuruo, kana anu kuparentaakomu oleo andio. 5#Pel. 20:25I ra'ai asalakono imewanguo meda pontunua pesomba ndi Ondae i Ue, Ue Alamiu, asa pontunua pesomba inso a watu anu nahi pina'oako parewa labu. 6Asalakono inso a watu anu nahi pina'o imewanguo meda pontunua pesomba ndi Ondae i Ue, Ue Alamiu, ka i wawono asalakono impesombaakono pesomba tinunu ndi Ondae i Ue, Ue Alamiu. 7Impesombaakono mbo'u pesomba tekaduduia, ka i'amba mengkaano i ra'ai ka memawongko i aro-Do i Ue, Ue Alamiu. 8Umarino atuu, asalakono imeburio a luwuno watu atuu luwuno pauno songka Taura andio temengkaa ntu'u.”
9Ka i'amba i Musa ka luwuno sando mpesomba to Lewi mepau a luwuno to Isaraeli, kanandio, ”Impomperodo ka imerongeomo hei to Isaraeli. Ia oleo andio megagi komiumo bawaa-Do i Ue, Ue Alamiu. 10Onaemo pu'uno, asalakono imperorongeakono pau-Do i Ue, Ue Alamiu, ka meweweuo parenta ka pompakosi-Do, anu kupohaweakomiu a oleo andio.”
Hopulu ka orua pau pontotonaa
27:11-26
11A oleo atuu i Musa moweeako ira parenta tongku atuu,
12 #
Win. 11:29; Yos. 8:33-35 ”Umarimiu mensakio Koro Yarade, onaemo suku Simeo, Lewi, Yehuda, Isakari, Yusupu, ka Benami asalakono mpentade i Torukuno Gerisimi ka doronso ira tongku atuu. 13Sekono suku Rube, Gadi, Asere, Sebulo, Dani saru Napatali asalakono mpentade i Torukuno Ebali ka dototonaa ira. 14Ka i'amba luwuno to Lewi ira mpepau meroku ka mpotaeako ira luwuno to Isaraeli,
15 #
Pel. 20:4; 34:17; Ima. 19:4; 26:1; Win. 4:15-18; 5:8 ’Tetotonaaomo mia anu moweweu tinaha pina'o ke tinaha tinawa, aasa mokoburu-Do i Ue, wineweuno kaeno asa mia puu mpo'angga, ka montadeo mewuni-wuni.’ Luwuno tongku atuu, asalakono mpotae, ’Ami!’
16 #
Pel. 20:12; Win. 5:16 ’Tetotonaaomo mia anu me'uru-uruo ineno ka amano.’ Luwuno tongku atuu, asalakono mpotae, ’Ami!’
17 #
Win. 19:14
’Tetotonaaomo mia anu mompahe tida wita a mpe'asa miano.’ Luwuno tongku atuu, asalakono mpotae, ’Ami!’
18 #
Ima. 19:14
’Tetotonaaomo mia anu mowawa asa mia morawu a nsala anu nahi mentee.’ Luwuno tongku atuu asalakono mpotae, ’Ami!’
19 #
Pel. 22:21; 23:9; Ima. 19:33-34; Win. 24:17-18 ’Tetotonaaomo mia anu morontu tiano mia hawe, nana'ote nahina amano, ka tuwu beine.’ Luwuno tongku atuu asalakono mpotae, ’Ami!’
20 #
Ima. 18:8; 20:11; Win. 22:30 ’Tetotonaaomo mia anu mewowaliakono kombiano amano, hangano isungkeaomo tapu hawuno amano.’ Luwuno tongku atuu asalakono mpotae, ’Ami!’
21 #
Pel. 22:19; Ima. 18:23; 20:15 ’Tetotonaaomo mia anu mewowaliakono pinotuwu hapamo koa.’ Luwuno tongku atuu asalakono mpotae, ’Ami!’
22 #
Ima. 18:9; 20:17 ’Tetotonaaomo mia anu mewowaliakono pepaekompono beine, anano amano ke anano ineno.’ Luwuno tongku atuu asalakono mpotae, ’Ami!’
23 #
Ima. 18:17; 20:14 ’Tetotonaaomo mia anu mewowaliakono ponino beine.’ Luwuno tongku atuu asalakono mpotae, ’Ami!’
24’Tetotonaaomo mia anu mewuni-wuni mompepate pe'asa miano.’ Luwuno tungku atuu asalakono mpotae, ’Ami!’
25’Tetotonaaomo mia anu montarima pompowee nahi moleo ta mompepate mia anu nahina salano.’ Luwuno tongku atuu asalakono mpotae, ’Ami!’
26 #
Gal. 3:10
’Tetotonaaomo mia anu nahi rongeo pauno songka Taura andio ka weweuo.’ Luwuno tongku atuu asalakono mpotae, ’Ami!’ ”
Currently Selected:
Winali 27: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
