Winali 28

Ronso

28:1-14

1 # Ima. 26:1-13; Win. 7:12-24; 11:13-17 Tewala mentee ntu'u imperorongeakono pau-Do i Ue, Ue Alamiu, ka mpetenunu meweweuo luwuno parenta-Do anu kupohaweakomiu a oleo andio, manasa Ondae i Ue, Ue Alamiu, Ira tumande komiu i wawono luwuno tongku i tolino. 2Luwuno ronso andio ta hawe ndi omiu ka ta gagi tiamiu, tewala imperorongeakono pau-Do i Ue, Ue Alamiu.

3Rinonso komiumo i kota ka rinonso komiumo i lere.

4Rinonsoomo pe'anakaamiu, hasilino witamiu ka hasilino pinotuwumiu, onaemo ana nsapimiu ka pe'anaado asa bawaa bembe bimbamiu. 5Rinonsoomo bakimiu ka ponsaloamiu tarigu.

6Rinonso komiumo tempono impewinso ka impeluarako.

7Ondae i Ue Ira weweuo iwali anu aiwa sumapoi komiu tenangi i aromiu. Asa nsala insoado mpeluarako sumapoi komiu, sine opitu nsala ira mpolai inso i aromiu. 8Ondae i Ue Ira parentao poronso-Do i wawomiu ia nsi'emiu ka i luwuno inangano kaemiu. Ira rumonso komiu i wita anu Doweeakomiu i Ue, Ue Alamiu. 9Ondae i Ue Ira pakosi komiu gagi bawaa-Do anu mempori, kana anu dinandi-Do saru sumpa ndi omiu, tewala mpe'ini komiu a parenta-Do i Ue, Ue Alamiu, ka mentuwu montonda sala anu tiniso-Do. 10Manasa luwuno tongku i tolino ira mengkitao, nine nee-Do i Ue pinau ndi omiu, ka ira medoito ndi omiu.

11Ondae mbo'u i Ue Ira mokohadioo ntu'u moikoa a laro mpe'anakaamiu, hasilino pinotuwumiu ka hasilino witamiu, i wita anu dinandi-Do i Ue saru sumpa ndi ondae uempu'umiu Ira weeakomiu. 12Ondae i Ue Ira umungkahiakomiu langi, ponaapa-Do anu hadio ntu'u, Ira mompotii usa a witamiu ka rumonsoo luwuno inanggamiu, komiu mpoweeako ira mponsabo a hadio tongku, sine omiu nahi komiu mpo'ema ponsabo. 13Ondae i Ue Ira tumande komiu gagi ulu ka komba iki, komiukoa mpewuatako mpiha ka komba mpetii, tewala imperorongeakono parenta-Do i Ue, Ue Alamiu, anu kupohaweo ndi omiu a oleo andio, kai mpetenunu meweweuo. 14Inso a luwuno parenta anu kuweeakomiu a oleo andio simepansia i koana ke i manggali, saru mpontonda pinesombai susua ka mpesomba ndi onae.

Totonaa

28:15-46

15 # Ima. 26:14-31 Sine tewala nahi mperorongeakono pau-Do i Ue, Ue Alamiu ka nahi mpetenunu meweweuo luwuno parenta ka pompakosi-Do, anu kupohaweo ndi omiu a oleo andio, manasa luwuno pontotonaa andio ta metii ndi omiu ka ta humawe komiu:

16Tetotonaa komiumo i kota ka tetotonaa komiu i lere. 17Tetotonaaomo bakimiu ka ponsaloamiu tarigu.

18Tetotonaaomo pe'anakaamiu, hasilino witamiu, ana nsapimiu ka anano asa bawaa bembe bimbamiu. 19Tetotonaa komiumo i tempono impewinso ka tetotonaa komiumo tempono impeluarako.

20Ondae i Ue Ira mompotii pohuku, marisua, ponsepi i olomiu a laro angaa anu inanggano kaemiu ranta ka imeropu ka metampula. Hangano mosa'o wineweumiu mpebungkui Ira Ue. 21Ondae i Ue Ira mompotako haki lele ndi omiu, ranta kai mepingko inso i wita ba isua imelako komiu mpentorokio. 22Ondae i Ue Ira humukuakomiu mehengge mokari, biibi ka haki buroko, mokula nsa'o ka wita mokari, ponsolangi mpinopaho ka hakino gandu. Luwuno atuu ta lumulu komiu ranta kai tampula. 23Langi mbo'u anu iwawono ulumiu ta gagi mala ka wita mbo'u anu i totono gagi labu. 24Ondae i Ue Ira mompotii usa awu ka pampawu a wawo witamiu. Inso i langi ta metii luwuno atuu i wawomiu, ranta ka imeropu. 25Ondae i Ue Ira weweukomiu ntenangi i arodo iwalimu. Inso a asa nsala impeluarako sumapoi ira, sine opitu nsala komiu mpolai inso i arodo. Komiu megagi mongkokongiriado luwuno poparentaa i tolino. 26Wata ngkoroimiu ta gagi kaangado luwuno manu-manu i laro meene saru luwuno kondehora i tolino, ka nahina anu sumosanggoli ira.

27Ondae i Ue Ira humukuakomiu haki mpiho Masiri ka lowe, saru haki ngkuli ka kumbi, ka nahi komiu hori metompa. 28Ondae i Ue Ira humukuakomiu pekombea, morawua, ka tetadi pinewowolo. 29Komiu mperare i tempono ntonga oleo, kana asa mia morawu merare a laro wongi-wongi. Pelempaamiu nahi ta me'ura, sine komiu wela mpino'emai ka merinontu, ka nahina anu montulungi. 30Komiu mpesamboraako asa mia beine, sine mia susua ta mewowaliakono. Komiu mpowangu raha, sine nahi komiu mpo'iangario. Komiu mpelere anggoro, sine nahi komiu mperapio wuano. 31Sapimiu ira mensumbeleo mia i aromiu, sine nahi komiu mpongkaa bauno. Kalidemiu ta rinontu i aromiu, ka nahi ta pinokule ndi omiu. Asa bawaa bembe bimbamiu ta wineeako iwalimiu ka nahina mia anu aiwa tumulungi komiu. 32Luwuno anamiu tama ka beine ta pineweengako a tongku susua, tekonai komiu mengkitaakono matamiu. Sompo oleo imengkekewoi ira, ka nahi mempolio mpoweweu hapa-hapa. 33Asa tongku anu nahi imento'orio ira mengkaano hasilino witamiu ka luwuno hasilino pe'iseiamiu; komiu wela mepinokonsii ka melinolanda. 34Komiu gagi mpekombe hangano hapa anu kinitano matamiu. 35Ondae i Ue Ira humukuakomiu haki mpiho mosa'o, inso a olontuu ka a mpa'amiu, tendeano inso a mpele ngkaru hawe a banga ulumiu. Hangano onae nahikomiu metompa. 36Ondae i Ue, Ira wawakomiu meronga saru mokole anu pinotoromiu a asa tongku anu nahi imento'orio maupo ondae uempu'umiu. I ra'aimo komiu mpesomba a pinesombai susua, a ngkeu ka a watu. 37Komiu megagi mongkokongiria, pompotundaa ka pompasinggiri i olono luwuno tongku, ba isua Ira lumiahako komiu i Ue. 38Hadio inii komiu mpowawa i lere, sine tedei wuano anu komiu mepumpuo, hangano ta pingkoo kosume. 39Luwuno lere anggoro komiu meweweuo ka me'anggao, sine nahi komiu mpo'inu ka mponaa anggoro, hangano ta kumaano ule-ule. 40Luwuno keu saitumiu komiu mpe'ueo a luwuno po'iangamiu, sine nahi komiu mpe'urapiako lana, hangano wua saitumiu ta rumonta. 41Komiu mpohawe ana ntama ka beine, sine komba ta tiamiu, hangano ira megagi mia ntinawa. 42Luwuno keumiu ka hasilino witamiu ira mempabawaio kosume. 43Mia hawe anu kongko i tonga-tongamiu ta tewuatako mantande lumaloi komiu, sine komiu ta ntepotii i totono. 44Onae ta momposaboakomiu, sine omiu nahi komiu momposaboako ira. Onae ta gagi ulu, sine omiu megagi iki.

45Luwuno pontotonaa atuu ta hawe ndi omiu, lumulu ka umalu komiu, ranta ka imeropu, hangano nahi mpomperorongeako pau-Do i Ue, Ue Alamiu, ka nahi mpe'ini a parenta ka a pompakosi anu Doparentaa komiu. 46Luwuno atuu ta gagi tondonino ka anu kinohali-haliako i olomiu ka a inulemiu ranta nahina tampulaano.

Peteaa ka pontadia

28:47-68

47 # Ima. 26:32-46 Omiu nahi mpe'atao koroimiu ndi Ondae i Ue, Ue Alamiu, a mawongkono aroa ka mpo'unde maupo hadio ntu'u luwuakoano. 48Hangano atuu, komiu mpe'atao koroimiu a iwali anu ta inoliwi-Do i Ue umewai komiu, ka komiu memokoninggo ka mokoranga, saru kolambe-lambe ka makuraako luwuakoano. Ira mempopotembiakomiu pasanga labu a banga we'umiu, ranta ka Doropu komiu. 49Ondae i Ue Ira montenaakomiu asa tongku inso i olaiano, inso i tompano tolino. Tongku atuu kana rajawali anu montiu ka pauno nahi imento'orio. 50Tongku atuu anu masii rupano, anu nahi perio ira mia memota'u ka nahi dompehohawa ira nana'ote. 51Tongku atuu ira mengkaano hasilino pinotuwumiu ka hasilino witamiu, ranta kai meropu. Nahi ira mpobintaakomiu moiko gandu, uwoi anggoro, ke lana, maupo ana nsapimiu ke anano asa bawaa bembe bimbamiu, ranta kai memasola. 52Komiu mengkinadu a luwuno kotamiu, ranta kai tehoa luwuno rerewatumiu anu mantande ka mebente, anu pinerorohimiu i luwuno witamiu. Tendeano komiu mengkinadu i larono luwuno kotamiu, a luwuno wita anu Doweeakomiu i Ue, Ue Alamiu. 53Komiu mpongkaa bauno anamu tama ka beine, pe'anakaa anu Doweeakomiu i Ue, Ue Alamiu, a laro pongkadua ka masusaa anu wineweudo iwali ndi omiu. 54Tama anu molusa-lusa ka pinetondai ntu'u i olomiu ta gagi lambaha a mpepaekompono da a ngkombiano anu pinehohawano ka a luwuno anano anu da kongko. 55A asa mia inso ndi ondae atuu nahi behe moweeakono maupo tedei inso a bauno anano anu kinaano, hangano nami hina mbo'u toreano ndi onae, a pongkadua ka masusaa anu wineweudo iwali ndi omiu a luwuno kotamu. 56Beine anu molusa-lusa ka pinetondai i olomiu, anu nahi bele melandaako pelengkaruno a wita hangano molusa-lusano ka pinetondai atuu, ta gagi lambaha a ntamano anu pinehohawano saru anano tama ka beine. 57#2Mok. 6:28-29; Pons. 4:10Hangano, tompapuhe anu meluarako inso a laro kompono maupo ana anu pine'anaakono ta kumaano mewuni-wuni, hangano makuraako luwuakoano i larono pongkadua ka masusaa anu wineweudo iwalimu i kotamu.

58Tewala nahi mpetenunu meweweuo luwuno pauno songka Taura anu binuri a laro wunta andio, ka nahi medoitoakono Nee anu maramba ka mongkokongiri andio, ndi Ondae i Ue, Ue Alamiu, 59manasa Ondae i Ue Ira motiio luwuno tula anu mongkokongiri, tedoa mahaki ka tehine, saru luwuno haki mobea ka tehine. 60Ira motiio mbo'u ndi omiu luwuno haki lele i wita Masiri anu imedoitoakono atuu, ka luwuno atuu metako ndi omiu. 61Mperupa-rupa mbo'u haki ka pohuku, anu nahi teburi a laro wunta Taura andio, Ira motiio i Ue ndi omiu, ranta kai meropu. 62Inso ndi omiu butu tedei mia anu ta kongko tuwu, ka hinaano omiu ba i ndi'ipua kana anano wula i langi hadiono, hangano nahi mperorongeakono pau-Do i Ue, Ue Alamiu. 63Kana mawongko-Do i Ue ndi omiu, Ira moweweu moiko ndi omue ka weweukomiu mehadio, kanatuumo mawongko-Do i Ue ndi omiu Ira sumolangi komiu ka rumopukumiu. Komiu mebinuta inso a wita, ba isua komiu melako mpetorokio. 64Ondae i Ue Ira sumiarawo komiu i olodo luwuno tongku inso i tompano tolino hawe i tompano tolino. I ra'aimo komiu mpesomba a mpesombaa susua anu nahi imento'orio ke maupo ondae uempu'umiu, pesombaa keu ka watu. 65Nahi komiu mpohawe rodoa i olodo luwuno tongku atuu ka nahi ta hina penaa-naano pelengkarumiu. I ra'ai Ira moweeakomiu i Ue aroa anu nahi rodo, mata anu mo'o'au ka sumanga anu me'i'isei. 66Tumuwumiu nahi manasa; meene ka wongi komiu medoito ka nahina manasano a larono tumuwumiu. 67Tempono mo'oru komiu mpotae, ”A, ande-andeno wongi andio!” ka tempono wongi komiu mpotae, ”A, ande-andeno mo'oru andio!” hangano aroamiu bukeako doito, ka hangano hapa anu kinitano matamiu. 68Ondae i Ue Ira wawa komiu mpekapala mpekule i wita Masiri, telalo a nsala anu Kupauomo ndi omiu, ”Nahi komiu mengkitao mbo'u.” I ra'ai komiu me'asao koroimiu a iwalimiu gagi ata ntama ka beine, sine nahina anu mo'oli.

Currently Selected:

Winali 28: XMZ

Highlight

Compare

Copy