Winali 26

Mompesombaako hasilino wita amba-ambano

26:1-11

1Tewala mewinsokomo a wita anu Doweeakomu i Ue, Ue Alamu, gagi tia pusakamu, ka upentorokio ka mo'ia i ra'ai, 2#Pel. 23:19asalakono kau alao hasilino wita amba-ambano anu pinumpumu inso a wita anu Doweeakomu i Ue, Ue Alamu. Asalakono kau naao a baki, ka u'amba lumako a mpo'ianga anu tiniso-Do i Ue, Ue Alamu, weweuo kai po'ia nee-Do i ra'ai. 3Asalakono kau tepohaweakono sando mpesomba anu kongko i tempo atuu, kau potaekono, ”Oleo andio kupauo ndi Ondae i Ue, Ue Alamu, nine mewinso akumo i wita anu dinandi-Do i Ue saru sumpa ndi ondae uempu'uto Ira meweengakono ndi ontae.” 4Ka i'amba sando mpesomba asalakono tumarimao baki atuu inso a ngkaemu ka inaao i arono meda pontunua pesomba ndi Ondae i Ue, Ue Alamu. 5Ka i'amba asalakono omue pauo i aro-Do i Ue, Ue Alamu, kanandio, ”Amaku i ndi'ipua to Arami, asa mia puu mpelakopi. Onae lumako saru tedeikoa mia i wita Masiri ka mo'ia i ra'ai gagi mia hawe. Sine i ra'ai gagi ira asa tongku langkai, moroso ka mehadio ira. 6Tempono to Masiri mebobarasai ka pokonsii kami ka mentena kami mpo'angga anu mobea, 7mpebooli kami ndi Ondae i Ue, Ue Alado uempu'u mami. Dororongeo i Ue pebooli mami ka Dokitao tebobarasai ka masukaraa mami ka pobobarasaido ndi omami. 8Ka i'amba Ondae i Ue wawa kami mpeluarako inso i wita Masiri saru kae-Do anu moroso ka tokia-Do tetaangako, saru mongkokongiria anu langkai ka saru luwuno petondoni ka anu mengkinohali-haliako. 9Dowawa kami a mpo'ianga andio, ka Doweeakami wita andio, asa wita anu hadio ntu'u susu ka siu hoanino. 10Onaemo pu'uno, i ndi'ai aku mowawa hasilino wita amba-ambano anu Iweeakakune, oo Ue.”

Umarino atuu, asalakono kau naao i aro-Do i Ue, Ue Alamu, ka menggolontu i aro-Do i Ue, Ue Alamu. 11Omue, to Lewi ka mia hawe i tonga-tongamu memawongko hangano luwuno anu moiko Doweeakomu i Ue, Ue Alamu, ka luwuno ihino rahamu.

Pesomba tia hopulu

26:12-15

12 # Win. 14:28-29 Tewala a nta'u ko'otolu, ta'u pesombaa tia hopulu, umari komo me'alao luwuno pesomba tia hopulu inso a hasilino witamu, asalakono imeweeako ira to Lewi, mia hawe, nana'ote nahina amano, ka tuwu beine, ka dompohawe mpongkaa a laro po'iangamu ranta mowohi. 13Asalakono kau pepau i aro-Do i Ue, Ue Alamu, ”Kuluarakonomo pesomba mempori atuu inso i rahaku, kuweeako iramo to Lewi ka a mia hawe, nana'ote nahina amano ka tuwu beine, menunu ntu'u kana parenta anu Iwee'akumo. Nahi kulaloo ke kukolupeo luwuno parenta-Miu atuu. 14I tempono kupo'inombo nahi kupongkaa maupo hapa inso a mpesomba mempori atuu, ke moluarako te'asa inso ndi onae tempono kumokoburu, nahi kupopesombaako mbo'u inso ndi onae a mia mate. Sine kurongeo pau-Do i Ue, Ue Alaku, ka weweuo menunu saru luwuno anu Iparentaakume. 15Ipensiroiomo inso a mpo'ianga-Miu anu mempori, i laro nsuruga, ka Ironso iramo bawaa-Miu Isaraeli, ka wita anu Iweekamimo, kana anu Idandiomo saru sumpa ndi ondae uempu'u mami, asa wita anu hadio ntu'u susu ka siu hoanino.”

Pau pokotompa mongkona pompaua songka Taura

26:16-19

16A oleo andio Ondae i Ue, Ue Alamu parenta komiu meweweuo pompakosi ka atora andio. Petenunumo weweuomo luwuno atuu a tompaano aroamu ka tompaano sumangamu. 17Oleo andio imentarimaomo nine Ondaemo i Ue, Ue Alamiu, ka nine komiu mentuwu montonda sala anu tiniso-Do, ka mpe'ini a pompakosi, parenta saru atora-Do, ka mperorongeakono pau-Do. 18#Pel. 19:5; Win. 4:20; 7:6; 14:2; Tit. 2:14; 1Pet. 2:9Oleo andio Dotarima komiumo i Ue nine omiumo bawaa anu pinehohawa-Do, kana anu dinandi-Do ndi omiu, ka asalakono impe'ini a luwuno parenta-Do. 19Kanandiomo Ira tumande komiu i wawono luwuno tongku anu pinokogagi-Do, ka igagi inunde-unde, tepalele nee ka pinelangkai. Komiu megagi bawaa anu mempori tia-Do i Ue, Ue Alamiu, kana anu dinandi-Do.

Currently Selected:

Winali 26: XMZ

Highlight

Compare

Copy