Winali 14

Gau po'inombo anu inonto

14:1-2

1 # Ima. 19:28; 21:5 Omiumo ana-Do i Ue, Ue Alamiu; si mensosorekio koroimiu ke mengkeruo wuu i wawono ra'imiu hangano mateno asa mia. 2#Pel. 19:5-6; Win. 4:20; 7:6; 26:18; Tit. 2:14; 1Pet. 2:9Hangano omiumo bawaa anu mempori tia-Do i Ue, Ue Alamiu, ka omiu bininiki-Do i Ue kai megagi bawaa pinehohawa-Do inso i olono luwuno tongku anu i wawontolino.

Kondehora nahi mokoburu ka anu mokoburu

14:3-21

3 # Ima. 11:1-23 Si mpongkaa maupo hapa anu gagi mokoburua. 4Ndiomo luwuno kondehora anu moiko imengkaano: sapi, bimba, ka bembe; 5rusa, lagiwa, rusa dandi, bembe ntobu, lagiwa i torukuno, sapi ntobu ka bimba ntobu. 6Sompo kondehora anu mekuku tebansi, kukuno me'olo ondau gagi orua, ka anu wali mongai kaangano i olono kondehora, moiko imengkaano. 7Sine, ndiomo anu si mengkaano inso i olono anu wali mongai kaangano ke inso i olono anu tebansi ka me'olo kukuno: unta, kelinci ntobu, ka maramoti. Hangano, luwuno atuu lano wali mongai kaangano, sine nahi tebansi kukuno; luwuno atuu mokoburu ndi omiu. 8Boe mbo'u mokoburu ndi omiu, hangano boe kukuno tebansi, sine nahi wali mongai kaangano. Bauno luwuno kondehora atuu si mengkaano ke medanggio wata ngkoroino.

9Ndiomo anu moiko imengkaano inso a luwuno anu tuwu i laro uwoi; luwuno anu melowiri ka mekaransa moiko imengkaano. 10Sine luwuno anu nahi pelowiri ka mekaransa si mengkaano; luwuno atuu mokoburu ndi omiu.

11Sompo manu-manu anu nahi mokoburu moiko imengkaano. 12Sine si mengkaano: manu-manu rajawali, singko medanggo ka singko a ntahi; 13singko motaha, singko mo'ito, ka dunggurio mperupa-rupa tadeno; 14sompo tadeno manu-manu paa-paa; 15manu-manu unta, koa, samari ka mperupa-rupa tadeno singko sikapi; 16manu-manu koa kodei, koa langkai, koa mopute; 17undani, singko eringi, ka dendangi uwoi; 18timba'u, ka mperupa-rupa manu-manu koro, meragai, ka poneki. 19Luwuno mbo'u kondehora mpehowu anu mepani, onae mbo'u anu mokoburu ndi omiu; si mengkaano. 20Luwuno manu-manu anu nahi mokoburu, moiko imengkaano.

21 # Pel. 23:19; 34:26 Si mpongkaa maupo wata ngkoroi maupo hapa, sine moiko iweeako ira mia mehawe ikita miu ka domengkaano ke moiko i me'asao a mia hawe. Hangano, omiumo bawaa anu mempori ndi Ondae i Ue, Ue Alamiu.

Si menahuo ana bembe a laro uwoi uono ineno.

Atora mongkona pesomba tia hopulu

14:22-29

22 # Ima. 27:30-33; Pod. 18:21 Asalakono imponsiao tia hopulu inso a luwuno wuano inii anu tuwu i leremiu, sompo ta'u. 23I aro-Do i Ue, Ue Alamiu, a mpo'ianga anu Ira binikio kai po'ia nee-Do i ra'ai, asalakono imengkaano tia hopulu inso a gandu, anggoro, ka lanamiu, ka mbo'u ana amba-ambano sapi ka asa bawaa bembe bimbamiu, kai mpepaguru doitoako Ira mpiha i Ue, Ue Alamiu. 24Bara'ura, sala lumako i tu'ai impe'olaio lahi ranta nahi mpokowawao luwu, hangano Ondae i Ue, Ue Alamiu rumonsokomiu ka po'ianga anu bininiki-Do i Ue, Ue Alamiu mokomengkaao nee-Do i ra'ai olai lahi inso ampo'iangamiu. 25Asalakono impokogagio doi ka mewawao doi atuu a ngkaemiu ka i'amba melako a mpo'ianga anu ta bininiki-Do i Ue, Ue Alamiu. 26Impe'oliakonomo doi atuu a luwuno anu ineheno aroamiu, ia nsapi ke a asa bawaa bembe bimba, a anggoro ke inua anu mompokomolangu, ke hapamo koa anu ineheno aroamiu, ka i'amba mpongkaa i ra'ai i aro-Do i Ue, Ue Alamiu, ka memawongko, omiu, ka luwuno ihino rahamiu. 27Kasi kolupe ira to Lewi i kotamiu, hangano ondae nahi mpohawe tia pusaka meronga saru omiu.

28Sompo pokotompaano otolu nta'u asalakono imewawao luwuno tia hopulu inso a hasilino witamiu a nta'u atuu ka imenaao i kotamiu. 29Hangano to Lewi nahi dompohawe tia pusaka meronga saru omiu, ira me'aiwa saru mia hawe, nana'ote nahina amano ka tuwu beine i kotamiu, ka do'amba mpongkaa mowohi. Ba kanandio Ira rumonsokomiu i Ue, Ue Alamiu, a luwuno inanggano kaemiu.

Currently Selected:

Winali 14: XMZ

Highlight

Compare

Copy