Winali 13

1Tewala i tonga-tongamiu me'umbaako asa nabi ke puu mpo'ipi, ka ipompauakomiu asa petondoni ke anu kinohali-haliako. 2Tewala petondoni ke anu kinohali-haliako anu pinohaweno ndi omiu atuu gagi, ka ipotae, ”Aiwa kato mpetonda a anu pinesombai susua,” anu nahi imento'orio, ”ka aiwa tompesomba ndi onae,” 3asalakono si mperorongeakono pinauno nabi ke puu mpo'ipi atuu. Hangano, Ondae i Ue, Ue Alamiu, umara-arahako komiu ka Doto'orio, ba mentee koa ntu'u impehohawa Ira a tompaano aroamiu ka a tompaano sumangamiu. 4Ondae i Ue, Ue Alamiu asalakono imentonda Ira ka asalakono imedoitoako Ira. Asalakono impe'ini a parenta-Do, imperorongeakono pau-Do, impesomba ndi Ondae ka mpe'ini moroso ndi Ondae. 5Nabi ke puu mpo'ipi atuu asalakono hinuku mate, hangano i'oluakomumo bintao pompe'ala-alamu ndi Ondae i Ue, Ue Alamiu, anu wawakomiumo mpeluarako inso i Wita Masiri ka tumolosi komiu inso a ntepe'ataa. Tinoono ta mokopansiakomiu inso a nsala anu Doparentaakomiu i Ue, Ue Alamiu kai mentondao. Kanatuumo asalakono imempahihio anu mosa'o atuu inso i tonga-tongamiu.

6Bara'ura pepaekompomiu tama, anano inemiu, ke anamiu tama ke beine ke kombiamiu ke sambe'e morosomiu mewuni-wuni popandei komiu, ipotae, ”Aiwa topesomba a anu pinesombai susua” anu nahi imento'orio ke ondae uempu'umiu, 7asa i olono anu pinesombaido luwuno tongku petengi-tengimiu, moiko anu umpeda ke olai inso ndi omiu, inso i tompano tolino hawe i tompano tolino. 8Si ntenangi ndi onae ka si perorongeakono. Si mokoko'unduakono, si pehohawao ka si mentutuwio salano, 9sine impepateomo! Amba-ambano kaemu omuemu anu melelu komepateo, ka i'amba kaedo luwuno palili. 10Asalakono imewunoakono watu, ranta kai mate, hangano montooomo moko'olaikomiu inso ndi Ondae i Ue, Ue Alamiu, anu wawa komiu mpeluarako inso i wita Masiri, a ntepe'ataa. 11Onaemo iramo merongeo luwuno to Isaraeli ka dogagi medoito, ranta nahi ira mpoweweu mbo'u wineweu mosa'o kanatuu i tonga-tongamiu.

12Bara'ura aasa i olono kota anu Doweeakomiu i Ue, Ue Alamiu, gagi mpo'iangamiu, kai merongeo 13nine hinao mia mosa'o gauno me'umbaako inso i tonga-tongamiu, anu mokopansia iramo palili i kotado, ipotae, ”Aiwa tompesomba a anu pinesombai susua” anu nahi imento'orio. 14Asalakono imemparesao, impenootio ka impesikeno temoiko. Tewala mentee ntu'u ka manasaomo nine wineweuomo anu mokoburu atuu i tonga-tongamiu, 15onaemo kai mpepateako ira ponai palili i kota atuu. Ropuako ira ponai kota atuu saru luwuno ihino ka pinotuwudo. 16Luwuno pinomuru asalakono imepumpuo i tonga-tongano tanalapa. Kota ka luwuno pinomuru atuu asalakono imentunuo kai pingko gagi pesomba tinunu anu soompo ndi Ondae i Ue, Ue Alamiu. Luwuno atuu ta mo'ia mpiha gagi howuno hanga ngkota rinopu ka nahi ta winangu mbo'u. 17Hapamokoa inso a sangka anu pinesusua ta rinopu atuu si tedanggi a ngkaemiu, ka Dopenaa-naa i Ue inso a ntekuda-Do anu tensila atuu, mopokitao pompehohawa-Do ndi omiu, mokoko'unduakomiu ka mokohadio komiu, kana anu dinandi-Do saru sumpa ndi ondae uempu'umiu. 18Hangano, imperorongeakono pau-Do i Ue, Ue Alamiu, saru mpe'ini a luwuno parenta-Do, anu kupohaweakomiu a oleo andio, ka mpoweweu hapa anu mentee a pongkita-Do i Ue, Ue Alamiu.

Currently Selected:

Winali 13: XMZ

Highlight

Compare

Copy