Winali 15

Ta'u po'oninia pasua

15:1-11

1Sompo pokotompaano opitu ta'u, asalakono imeweweu po'oninia pasua. 2Ndiomo pesalaano po'oninia pasua atuu: sompo mia anu mompesaboako asalakono i'oninio hapa anu pinesaboakono a mpe'asa miano. Siimo iponsinga inso a mpe'asa miano ke a mpepaekompono, hangano pinaleleomo po'oninia pasua a nee-Do i Ue. 3Moiko imposinga inso a mia hawe, sine pinesaboakomiu a mpepaekompomiu, asalakono ime'oninio. 4Sine nahi ta hina mia mongkokolaro i olomiu, hangano mentee ntu'u Ondae i Ue Ira rumonso komiu i wita anu Doweeakomiu i Ue, Ue Alamiu, kai gagi tia pusakamiu, 5polomo koa kai mentee ntu'u imperorongeakono pau-Do i Ue, Ue Alamiu, ka mpetenunu meweweuo luwuno parenta anu kupohaweakomiu a oleo andio. 6Tewala Doronso komiu i Ue, Ue Alamiu, kana anu Dodandiakomiu, asalakono impoweeako ira mponsabo a hadio tongku, sine omiu nahi komiu mpo'ema mponsabo. Komiu pabawai ira hadio tongku, sine ondae nahi ira pabawai komiu.

7 # Ima. 25:35 Tewala hinao i olomiu mia mongkokolaro, asa mia i olono pepaekompomiu i asa kotamiu, i wita anu Doweeakomiu i Ue, Ue Alamiu, asalakono si memotea aroa ke mpokungku kae a mpepaekompomiu anu mongkokolaro atuu. 8Tendeano, asalakono imewileakono kaemiu temalua ka impoweeakono monsabo tehadio ntu'u, kai sompo kinereno, maupo te'opia anu kinereno. 9Impompe'inandaimo, kasi haweako i laro aroamiu pinewowolo mosa'o, kanandio, ”Rangkuomo ta'u ko'opitu, ta'u po'onini pasua,” ka nahi perioo pepaekompomiu anu mongkokolaro atuu ka nahi mpoweeakono hapa-hapa. Onae ta mebooli ndi Ondae i Ue mongkona omiu, ka mongkona atuu gagi halamiu. 10Asalakono impoweeakono tehadio ntu'u kasi mobea aroamiu ba impoweeakono. Hangano onaemo pu'uno ka Doronso komiu i Ue, Ue Alamiu i laro luwuno anu inanggano kaemiu. 11#Mat. 26:11; Mrk. 14:7; Yoh. 12:8Hangano mia mongkokolaro nahi'otu, ta hina mpiha i wita atuu. Onaemo pu'uno kupoweeakomiu parenta, kanandio, ”Asalakono imewileo kaemiu temalua a mpepaekompomiu, anu tepokonsii ka mongkokolaro i witamiu.”

Mompokomaradeka to Ibarani

15:12-18

12 # Pel. 21:1-11; Ima. 25:39-46 Tewala inasa ndi omue aasa pepaekompomu, moiko tama ke beine to Ibarani, onae ta mo'angga ndi omue i larono onoo nta'u, ka a nta'u ko'opitu, asalakono upotolao gagi mia maradeka. 13Tewala upotolao gagi mia maradeka, si potolao saru kae mooa. 14Asalakono upoweeakono pebakuno tehadio ntu'u inso a asa bawaa bembe bimbamu, inso a mposesaamu, ka a mpomporo'iamu. Asalakono upoweeakono menunu saru poronso anu Doweeakomu i Ue, Ue Alamu, 15Asalakono upewowoloo nine omue mbo'u i ndi'ipua ata i wita Masiri ka omue Dotolosiko i Ue, Ue Alamu. Onaemo pu'uno kuweeakomu parenta atuu a oleo andio.

16Sine tewala ipotaeakomu, ”Nahi kubehe meluarako bintako,” hangano ipehohawako ka somborimu, hangano moikono ipo'ia ndi omue, 17ka omue asalakono mo'ala asa parewa poduhu ka boloo lewe birino a mpewowa, ranta kai gagi atamu asa ntinuwuno. Kanatuu koa mbo'u weweuo ndi atamu beine.

18Si mpompemobea aroa, ba upotolao gagi mia maradeka, hangano i larono onoo nta'u mo'anggaomo ndi omue, anu po'anggano meluka orua tambono mia megadi oleo. Manasa Ondae i Ue, Ue Alamiu, Ira rumonsoko a laro luwuakoano anu inanggamu.

Ana amba-ambano pinotuwu

15:19-23

19 # Pel. 13:12 Luwuno ana amba-ambano lakino anu pine'anaakodo sapimiu ka asa bawaa bembe bimbamiu, kai pinesusuakoa tia-Do i Ue, Ue Alamiu. Si mpo'anggaako ana amba-ambano sapimiu, kasi megontio wuluno ana amba-ambano bimbamiu. 20Sompo-sompo ta'u imengkaanokoa bauno i aro-Do i Ue, Ue Alamiu, a mpo'ianga anu Ira binikio i Ue, omiu ka luwuno ihino rahamiu. 21Sine tewala hinao tataano, tewala tiimpa karu ke morawu, tendeano maupo hapa tataano anu nahi moiko, si mensumbeleo tia-Do i Ue, Ue Alamiu. 22I laro kotamiu, omiu, moiko mia mokoburu maupo mia morina, moiko ikaano, kana bau lagiwa ke rusa. 23#Teg. 9:4; Ima. 7:26-27; 17:10-14; 19:26; Win. 12:16, 23Butu koa, reano si mengkaano, tendeano ime'uwuo a wita kana uwoi.

Currently Selected:

Winali 15: XMZ

Highlight

Compare

Copy