Winali 10

Watu anu wo'ohu

10:1-11

1 # Pel. 34:1-9 I tempo atuu mepau Ira i Ue ndi ongkue, ”Pa'oomo orua watu anu mengkena saru amba-ambano, ka pewuatakomo i wawo ntorukuno tepohaweaKune. Weweuomo asa burua inso a ngkeu. 2Ka Aku burio a watu atuu luwuno pau anu hina a watu amba-ambano anu upehaomo atuu, ka u'amba nunaao orua watu atuu i larono burua.”

3Onae kaku weweuo asa burua inso a ngkeu akasia ka mompa'o orua watu anu mengkena saru anu amba-ambano. Ka ku'amba morake i torukuno saru orua watu atuu a ngkaeku. 4Awatu atuu Doburio i Ue Songka Hopulu mengkena kana burino anu amba-ambano, anu Dopauomo ndi omiu i wawo ntorukuno inso i tonga-tongano api a oleo pepumpuamiu. Umarino atuu Dopeweengakono i Ue ndi ongkue. 5Ka ku'amba wali metii inso i wawo ntorukuno, ka kunaao watu atuu a laro burua anu kuweweuomo. Ka i tu'aimo po'iangano, kana parenta-Do i Ue ndi ongkue.

6 # Pod. 20:28; 33:38 Onaemo ka dompelungka to Isaraeli inso i Be'eroti Bene-Ya'akani melako i Mosera. I ra'aimo imate i Haruni ka kinaburu. Ka i'amba i Eleasa, anano gagi sando mpesomba umeuo. 7Inso i ra'ai mpelungka ira melako i Gudagodi, ka inso i Gudagodi melako i Yotabata, aasa wita anu hadio korono.

8 # Pod. 3:5-8 I tempo atuu Ondae i Ue mesusua ira suku Lewi anu mewawao burua pedandia-Do i Ue, ka dompo'angga mekakaako Ira i Ue ka domporonso a nee-Do, hawe kanandio-andio. 9Onaemo pu'uno suku Lewi nahina tia pusakado mperonga-ronga saru luwuno pepaekompodo. Ondaemo iUe tia pusakado, kana anu pinau-Do i Ue, Ue Alamiu, ndi onae.

10 # Pel. 34:28 Mo'ia aku i wawo ntorukuno pato pulu oleo ka pato pulu wongi tehineno, kana anu amba-ambano, ka pohona mbo'u andio Doronge aku i Ue. Nahi Ira rumopu komiu i Ue. 11Umarino atuu mepau Iramo i Ue ndi ongkue, ”Rongamo lako ka pelempa i arodo tongku atuu, ka dompewinsokio ka mpetorokio wita anu Kudandiakono sumpa ndi ondae uempu'udo ka domewineeako.”

Po'oluako mehohawa Ira i Ue ka mia memolema

10:12-22

12Kanandio-andio, hei to Isaraeli, hapa anu tinuntu-Do i Ue, Ue Alamiu, inso ndi omiu, sangkadio doitoako Ira i Ue Alamiu, tuwu montonda luwuno sala-Do, mehohawa Ira, mesomba ndi Ondae i Ue, Ue Alamiu a tompaano aroamiu ka a tompaano sumangamiu, 13me'ini a parenta ka pompakosi-Do i Ue anu kupohaweakomiu a oleo andio, kai moiko tumuwumiu. 14Menteeano Ondae i Ue, Ue Alamiu anu me'ueo langi, tendeano langi anu i wawoio luwuno langi, ka tolino saru luwuno ihino. 15Sine butu koa ndi ondae uempu'umiu tepadii aroa-Do i Ue, ranta ka Dopehohawa ira, ka omiumo inuledo, anu bininiki-Do inso a luwuno tongku, kana anu gagi kanandio-andio. 16Onaemo pu'uno imebaliomo aroamiu ka siimo mbo'u impe'ulu watu. 17#Tin. 10:34; Rom. 2:11; Gal. 2:6; Eps. 6:9; 1Tim. 6:15; Meng. 17:14; 19:16Hangano Ondaemo i Ue, Ue Alamiu, Ue Alano luwuno anu pinesombai susua ka Ueno luwuno ue, Ue Ala anu langkai, moroso ka mongkokongiri, anu nahi Dopobiniki mia ke montarima pompowee komba tiano. 18Ondae mo'alaako tiado nana'ote nahina amado ka tuwu beine ka mehohawa ira mia hawe saru moweeako ira kaanga ka sangka. 19Onaemo pu'uno, asalakono impehohawa ira mia hawe, hangano omiu i ndi'ipua mia komiu mehawe i wita Masiri. 20Asalakono imedoitoako Ira i Ue, Ue Alamiu. Ndi Ondae asalakono impesomba ka mpe'ini moroso, ka impesumpa a nee-Do. 21Ondaemo pu'uno po'unde-undeamiu ka Ondaemo Ue Alamiu, anu umariomo weweuo i olomiu luwuno wineweu anu langkai ka mongkokongiri, anu imengkitaakonomo matamiu. 22#Teg. 15:5; 22:17; 46:27Butu pitu pulu mia uempu'umiu melako i wita Masiri, sine kanandio-andio Ondae i Ue, Ue Alamiu weweu komiumo hadio kana anano wula i langi.

Currently Selected:

Winali 10: XMZ

Highlight

Compare

Copy