Winali 11

Langkaino pabawa-Do i Ue

11:1-7

1Asalakono impehohawa Ira i Ue, Ue Alamiu, ka imeweweuo anu lano ta wineweumiu ndi Ondae saru mpe'ini mpiha a luwuno pompakosi, atora ka parenta-Do. 2Pewowoloomo kanandio-andio, kupepau komba ndi ondae anamiu anu nahi domento'orio ka nahi domengkitao pohuku-Do i Ue, Ue Alamiu, pewowoloomo langkaino pabawa-Do, kae-Do anu moroso ka tokia-Do anu tetande, 3#Pel. 7:8–12:13petondoni ka wineweu-Do i wita Masiri ndi Pirao, mokole i wita Masiri, ka luwuno witano; 4#Pel. 14:28saru mbo'u hapa anu wineweu-Do a nsorodadudo to Masiri, ngarado ka karetado, onaemo kana'umpe Doweweuo uwoi Tahi Teberau lulua ka itutuwi ira, tempono domelulu komiu, ranta Dopepate ira i Ue hawe oleo andio; 5kanatuu koa mbo'u hapa anu wineweu-Do ndi omiu i pada one, ranta ka imehawe a mpo'ianga andio; 6#Pod. 16:31-32hapa mbo'u anu wineweu-Do ndi Datani ka ndi Abirami, anano i Eliabi, anano i Rube, onaemo tempono ipenganga wita ka itele ira saru luwuno pe'asa rahado, kema ka luwuno anu pinekariado, i tonga-tongado to Isaraeli. 7Hangano, imengkitaakonomo matamiu luwuno wineweu-Do i Ue anu langkai.

Ronso ka totonaa

11:8-32

8Gagi, asalakono impe'ini a luwuno parenta anu kupohaweakomiu a oleo andio, ka imemoroso mpewinso ka mpentorokio wita, ba isua komiu mpesakiako kai mpentorokio, 9ka imelai tinuwumiu i wita anu dinandi-Do i Ue saru sumpa ndi ondae uempu'umiu ka Doweeako ira ka a inuledo, asa wita anu hadio ntu'u susu ka siu hoanino. 10Hangano wita, ba isua impewinso komiu mpentorokio, komba kana i wita Masiri, ba isua impeluarako, anu umari rinawoako inii asalakono mpe'iseiakono umuwoio, kana lere pompahoa inahu. 11Sine wita, ba isua imelako komiu mpetorokio, onaemo wita anu hadio torukuno ka lembono, anu mohawe uwoi montonda hadiono usa anu metii inso i langi. 12Wita atuu Dopekariao i Ue, Ue Alamiu. Mata-Do i Ue, Ue Alamiu dumagaio mpiha inso a pumpu'uano hawe a pokotompaano ta'u.

13 # Ima. 26:3-5; Win. 7:12-16; 28:1-14 Tewala mentee ntu'u imperorongeakono parenta anu kupohaweakomiu a oleo andio, ranta kai mpehohawa Ira i Ue, Ue Alamiu, ka mpesomba ndi Ondae a tompaano aroamiu ka a tompaano sumangamiu, 14onaemo ka Dopompowee usa tiano witamiu a tempono, usa pompu'uano ka usa pokotompaano, ranta ka upokopopumpu gandu, anggoro ka lanamiu. 15Ka Ira mompowee ewo i padamiu tiado pinotuwumiu, ranta kai mpohawe mpongkaa ka gagi mowohi. 16Impope'inandaimo, kasi ntepopandei, ranta kai mepansia saru mpesomba a anu pinesomba susua ka mpenggolonto mpelangkaio. 17Tewala kanatuu, tekuda-Do i Ue ta tesingka ndi omiu ka Ira tumondoo langi, ranta nami hina usa ka wita nahi ta moluarako hasilino, ka i'amba ronga mepiingko inso a wita moiko anu Doweeakomiu i Ue. 18#Win. 6:6-9Sine, asalakono imenaao pinauku andio i laro aroamiu ka i laro sumangamiu; asalakono impetanggoakono gagi petondoni a ngkaemiu ka gagi petondoni ira'imiu. 19Asalakono imempaguruako ira anamiu saru mempopauo ba impentoro i rahamiu ka ba kontongaamiu pelempa, ba mpepombole komiu ka ba impewangu. 20Asalakono imeburio pinauku a ngkaru pewowano rahamiu ka a mpewowa langkai kotamiu. 21Kanandio omiu ka luwuno anamiu mentuwu melai i wita anu dinandi-Do i Ue saru sumpa ndi ondae uempu'umiu ka domewineeako, ba dahinao langi i wawontolino.

22Hangano tewala mentee ntu'u impe'ini komiu a parenta anu kupohaweakomiu kai wineweu, ka mehohawa Ira i Ue, Ue Alamiu, saru mentuwu montonda luwuno sala anu Dotisoakomiu ka saru mpe'ini moroso ndi Ondae, 23manasa Ondae i Ue sumaari ira luwuno tongku andio inso i aromiu, ranta kai mpetorokio witado luwuno tongku anu langkaiopo ka morosoopo sekono omiu. 24#Yos. 1:3-5Sompo po'ianga anu linandano pele ngkarumiu, omiumo anu mpe'ueo. Mompu'u inso i pada one hawe i torukuno Libano, ka inso a ngkoro Eparata, hawe a ntahi i sumooano oleo, ta gagi witamiu. 25Nahina anu ta polio mekorahako umaropi komiu. Ondae i Ue, Ue Alamiu Ira weweuo luwuno wita anu linandamiu atuu gagi mpondende ka doito ndi omiu, kana anu dinandi-Do i Ue ndi omiu.

26Kitaomo, kupopo'aroo ndi omiu a oleo andio ronso ka totonaa: 27ronso, tewala imperorongeakono parenta-Do i Ue, Ue Alamiu, anu kupohaweo ndi omiu a oleo andio; 28ke totonaa, tewala nahi mpoperorongeako parenta-Do i Ue, Ue Alamiu, ka mepansia inso a nsala anu kuparentaakomiu a oleo andio, kai mpotonda anu pinesombai susua anu nahi imento'orio.

29 # Win. 27:11-14; Yos. 8:33-35 Gagi, mansano Dowawa komiumo i Ue, Ue Alamiu a wita anu pinewinsokimiu kai mpetorokio, asalakono impokomengkaao ronso i wawo ntorukuno Gerisimi ka totonaa i wawono torukuno Ebali. 30Kombake oruano mo'ia i asa towano koro Yarade, i sumooano oleo sala langkai, te'aro i sumooano oleo i witado to Kana'a anu mpo'ia i Araba-Yarade, tepo'aroako Giliga umpeda a luwuno keu tarabanti i More? 31Hangano omiu andio nami ta tehine komiu mensakio koro Yarade kai mpewinsokio ka mpetorokio wita anu Doweeakomiu i Ue, Ue Alamiu. Ka tewala komiu mpetorokio ka mpo'iangario, 32asalakono impetenunu meweweuo luwuno pompakosi ka atora anu kuweeakomiu a oleo andio.

Currently Selected:

Winali 11: XMZ

Highlight

Compare

Copy