KOLOSE 1
1
Tabea
1:1-2
1Inso ndi Paulu, tinena-Do i Kerisituu, hangano po'ehe-Do Ue Ala, ka i Timotiu pepaekompoto, 2a luwuno pepaekompo anu mempori ka anu mpompe'ala-ala ndi Ondae i Kerisituu i kota Kolose. Pe'aroa ka rodoa inso ndi Ondae Ue Ala, Amato, kumongkomi komiu.
Pontarinakasi ka pekakai
1:3-14
3Pontarimakasi kami mpiha ndi Ondae Ue Ala, Ama Ueto i Yesu Kerisituu, sompo kimpekakaiakomiu, 4hangano kimerongeomo mongkona pompe'ala-alamiu ndi Ondae i Yesu Kerisituu ka mongkona pompehohawamiu a luwuno mia mempori, 5hangano pomperorohia, anu imempinatindaako i suruga. Mongkona pomperorohia atuu se'eluomo imerongeo a mpau menteea, onaemo Lele Mawongkoa, 6anu haweomo ndi omiu. Lele Mawongkoa atuu mewua ka koteti-tetiangino i asa wawontolino, kanatuu koa mbo'u i olomiu mompu'u tempono imerongeo ka mento'orio ntu'u pe'aroa-Do Ue Ala. 7#Kol. 4:12; Plm. 23 Luwuno atuu imento'oriomo inso ndi Eparasi, walimami pompekakaako anu pinehohawamami, anu ndi omiu onaemo puu pompekakaako-Do i Kerisituu anu metenunu. 8Onae koa mbo'u anu mokomengkaao ndi omami pompehohawamiu a mpabawa-Do Penaa.
9Onaemo pu'uno mompu'u tempono kimerongeo, nahi kimpenaa-naa mpekakaiakomiu. Kime'emao, ka imentarimao mperupa-rupa ponto'ori anu mentee, ka imento'orio koa ntu'u po'ehe-Do i Ue, 10ka ipototono koa tuwumiu i aro-Do saru Dopemoikoo a luwuakoano, ka komiu mpewua a luwuno inangga anu moiko ka mentuwu a ponto'ori anu mentee mongkona Ondae Ue Ala, 11ka mempinokorosoako luwuno roso hangano pabawano maramba-Do ka imoroso aroamiu ka mensabara mentembio luwuakoano, 12ka pontarimakasi saru memawongko ndi Ondae i Ama, anu weweu komiu ka intekona mpohawe tia a hapa anu domempinakosiako mia memempori a poparentaa mewine. 13Dopotola kitamo inso a mpabawano wongi-wongi ka lumimba kita a laro Poparentaa-Do ana-Do anu pinehohawa; 14#Eps. 1:7 ndi Ondae ka tompohawe tetolosiato, onaemo po'ampunia hala.
Polalua-Do i Kerisituu
1:15-23
15Ondaemo gambara-Do Ue Ala anu nahi tengkita, anu amba-ambano, lalua Irapo sekono luwuno anu pinokogagi, 16hangano ndi Ondaemo ka ipinokogagi luwuakoano, anu kongko i suruga ka anu kongko i tolino, anu tengkita ka anu nahi tengkita, moiko kadera poparentaa, maupo poparentaa, moiko anu mpeparenta, maupo anu mempabawa; luwuakoano Dopokogagi ira ka tia-Do. 17Kongko Iramo se'elu sekono luwuakoano ka luwuakoano kongko ndi Ondae. 18#Eps. 1:22-23 Ondaemo uluno koroi, onaemo bawaa. Ondaemo anu amba-ambano, anu mewangu amba-ambano inso i olodo mia mate, onaemo ka Dolalua a luwuakoano. 19Hangano luwuno sompo-Do Ue Ala ka ipo'ia i laro-Do, 20#Eps. 2:16 ka hangano Ondae Dopokompesintuwu ira luwuakoano saru koroi-Do, moiko anu kongko i tolino, maupo anu kongko i suruga, umari-Do moweweu pesintuwua hangano rea a ngkeu pinotamba-Do i Kerisituu. 21Omiu mbo'u anu i ndi'upua mentuwu olai inso ndi Ondae Ue Ala ka anu mpe'iwaliako Ira i laro aroa ka pinewowolo kana anu mengkaa a mpoweweumiu anu mosa'o, 22kanandio-andio Dopokosintuwuo, a ngkoroi-Do i Kerisituu hangano mate-Do, ka Donaa komiu mempori ka nahina tisoano ka nahina tataano i aro-Do. 23Onaemo pu'uno asalakono ka imemoroso aroa a pompe'ala-ala, memoroso mpiha ka nahi ntelelu, ka si mebehe ntepahe inso a pomperorohia Lele Mawongkoa, anu imerongeomo ka anu pinaleleomo i asa wawontolino i totono langi, ka anu ongkue andio, i Paulu, gagi akumo puu pompekakaakono.
Pompekakaako ka marasaino i Paulu
1:24–2:5
24Kanandio-andio kupo'undeakono marasaiku hangano omiu, ka mokosompoo a ngkoroiku hapa anu makura a ntebobarasai-Do i Kerisituu, tiano koroi-Do, onaemo bawaa. 25Gagi akumo puu pompekakaako bawaa atuu menunu saru anggaa anu Dope'ala-alaakune Ue Ala ka kupauakomiu luwu pau-Do, 26onaemo rahasia anu tewuni mapa'etu-etu nta'u ka inso a inule hawe a inule, sine anu kanandio-andio pinokomengkaa a mia memempori-Do. 27Ndi ondae Dopopoto'oriako ira Ue Ala, ba kana'umpe kaeano ka marambano rahasia atuu i olodo luwuno tongku susua, onaemo: Ondae i Kerisituu kongko Ira i tonga-tongamiu, Ondae i Kerisituu anu onaemo pomperorohia marambaa! 28Ondaemo anu pinalelemami, tewala sompo-sompo mia kimempatudu ira ka sompo-sompo mia kimempaguru ira a luwuno ponto'ori, ka kiwawa ira sompo-sompo mia a morosono pompe'ala-ala ndi Ondae i Kerisituu. 29Onaemo anu kuteahakono ka kupelulukuakono tompaano roso menunu saru pabawa-Do, anu mo'angga moroso i laroku.
Currently Selected:
KOLOSE 1: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
