Amosi 5

Ponsabangi mongkona Isaraeli

5:1-3

1Rongeomo pau andio anu kupenaniako gagi ponsabangia mongkona omiu, hei tongku Isaraeli,

2”Tebangkuomo, nahi ta mewangu mbo'u

ana beine Isaraeli.

Onae kombole-mbole a wawo witano,

nahina anu wanguo.”

3Hangano kanandiomo pau-Do Ue Ala a tongku Isaraeli,

”Inso a ngkota anu lumako metea asa nsowu mia,

toreano asa etu miamo koa,

ka inso anu lumako metea asa etu mia,

toreano hopulu miamo koa.”

Sala lumako a ntuwua

5:4-6

4Menteeano kanandiomo pau-Do i Ue a tongku Isaraeli,

”Ime'ungke Aku, ka komiu mentuwu!

5Siimo ime'ungkeo Beteli,

siimo imelako i Giliga

ka siimo impe'asambaliako i Bereseba,

hangano Giliga manasa tinadi a mpontadia

ka Beteli ta tampula.”

6Ungke Iramo i Ue, ka komiu mentuwu,

kasi Dotiuo inuleno i Yusupu anu piingko kana ikaano api,

nahina anu mepateakono Beteli.

Pongkuahako a nahi moleoa

5:7-13

7Hei omiu anu mpobali moleoa gagi rasu mopa'i

ka anu metadiakono menteea a wita!

8 # Ayb. 9:9; 38:31 Ondaemo anu moweweu anano wula opitu ka anano wula anu otolu

anu balio wongi-wongia gagi mo'oru

ka anu weweuo meene gagi wongi-wongi kana wongi.

Ondae anu moboio uwoi ntahi

ka umuwuo a wawo ntolino,

Ondae i Ue, onaemo atuu nee-Do.

9Ondae anu moweweu masolaa montiu anu moroso,

ranta masolaa umaluo kota mebente.

10Dome'o'aliaakono mia anu mongkuahako a mpewowa langkai,

ka motewedo mia anu mepau moleo.

11Omiu mopokonsii mia anu molema

ka mpo'ema sima'uluno gandu.

Onaemo pu'uno, maupo imewangu ira raha inso a watu pina'o,

nahi komiu mpo'iangario;

maupo impoweweu lere anggoro anu tekosi,

nahi komiu mpo'inu anggorono.

12Kuto'orio kana'umpe hadio ntu'u wineweumiu anu mosa'o

ka kogagi-gagino ntu'u halamiu,

hei omiu anu pokonsii ira mia mentee,

anu montarima pompowee nahi pototono

ka anu mebungkui ira mia mongkokolaro a mpewowa langkai.

13Onaemo pu'uno mia anu moleo pinewowolono ta mo'ia i tempo atuu,

hangano tempo atuu tempo anu mosa'o.

Tuwu ke mate

5:14-17

14Ungkeomo anu moiko ka osi'i anu mosa'o,

ka imentuwu.

Bakanandio Ondae i Ue, Ue Alano luwuakoano, Ira kumongkomi komiu,

kana anu pinaumiu.

15O'aliaakonomo anu mosa'o, kekewoiomo anu moiko

ka weweuomo moleoa a mpewowa langkai.

Bara'ura Ondae i Ue, Ue Alano luwuakoano Ira mehohawao inuleno i Yusupu anu da mentuwu.

16Menteeano, kanandiomo pau-Do i Ue, Ue Alano luwuakoano, Ondae Ueku,

”A luwuno tanalapa ta hina ponsabangia

ka a luwuno sala kodei ira mpebooli mia, ’Adoo! Adoo!’

Puu mpelere pinoboi ka ipo'inombo

ka luwuno anu monsabangi ka iposabangi.

17A luwuno lere anggoro ta hina ponsabangia,

hangano Ongkue telalo i tonga-tongamiu,”

pau-Do i Ue.

Oleo-Do i Ue

5:18-20

18Memasola iramo ntu'u anu me'ineheakono oleo-Do i Ue!

Hapa tuduno oleo-Do i Ue atuu ndi omiu?

Oleo atuu wongi-wongia, komba mewine!

19Kana asa mia molai inso a nsinga,

asa berua tumowokio,

sahaweno i raha metumboakono kaeno a rere,

asa ule tumungkuo!

20Kombake oleo-Do i Ue atuu wongi-wongia ka nahi mewine,

wongi mpusu ka nahina wanta ndi onae?

Pesombado to Isaraeli Do'o'aliaakono i Ue

5:21-27

21 # Yes. 1:11-14 ”Ku'o'aliaakono, Kupekodeio porame-ramemiu

ka nahi Kupe'eheo tepumpua langkaimiu.

22Maupo impesombaakono ndi Ongkue luwuno pesomba tinunu ka pesomba kaangamiu,

nahi Kubehe,

ka pesomba tekaduduiamiu onaemo pinotuwu anu mewalo,

nahi Aku kumitao.

23Poko'olaimo inso ndi Ongkue maroano penani-nanimiu,

unino gambusumiu nahi Aku rumongeo.

24Sine laluopo moleoa mekalu-kalulu kana uwoi

ka menteea kana uwoi korono anu waa mpiha.”

25 # Tin. 7:42-43 ”Nde impesombaakonoke ndi Ongkue pesomba sinumbele ka pesomba kaanga, i larono pato pulu nta'u i pada one atuu, hei Isaraeli? 26Komiu mewawao lahumoa Sakuti, mokolemiu ka i Kewani, anano wula lahumoamiu, luwuno tinahamiu anu imeweweuomo tiamiu atuu, 27ka Aku wawa komiu a pontadia olai i asambalino Damasi,” pau-Do i Ue, Ue Alano luwuakano, nee-Do.

Currently Selected:

Amosi 5: XMZ

Highlight

Compare

Copy