Amosi 4
4
Pohuku ia beine Samaria anu molanguako mare'ea
4:1-3
1”Rongeomo pau-Do i Ue andio, hei luwuno sapi Basani,
anu mekongko i torukuno Samaria,
anu pinokonsii mia molema, anu bobarasai ira mia mongkokolaro,
anu mpotaeako ira tamamiu:
wawaomo ramai, kato po'inu-inu!
2Ondae Ue Ala mesumpa Iramo a mempori-Do:
menteeano, ta hawe tempono ndi omiu
nine komiu mediniiako kai
ka anu tebinta i olomiu, mompake pomeka bou.
3Komiu mpeluarako telalo a tebansiano rere watu,
singge mia moleo lumako i arono,
ka komiu merinende te'aro i Heremoni,”
kanandiomo pau-Do i Ue.
Pesombado to Isaraeli gagi pontutuwi mosa'oa
4:4-5
4”Aiwamo i Beteli ka poweweumo wineweu mosa'o,
i Giliga ka pokohadioomo wineweu mosa'o!
Wawaomo pesomba sinumbelemu i tempono mo'oru,
ka pesomba tia hopulumu a oleo ko'otolu!
5Tunuomo pesomba pontarimakasi inso a roti meragi
ka popoto'oriomo luwuno pesomba a moleono aroa; paleleomo atuu!
Nde komba anu kanandioke inehemiu, hei to Isaraeli?”
kanandiomo pau-Do i Ue Ala.
To Isaraeli nahi dompepokule ndi Ondae i Ue
4:6-13
6”Maupo hanganomo Ongkue ka imorina
ngisimiu nahina kaanga i luwuno kotamiu
ka imemakuraako roti i luwuno po'iangamiu,
kongkomiu nahi mpepokule ndi Ongkue,”
kanandiomo pau-Do i Ue.
7”Nahi Kupotiio usa ndi omiu,
otolu wula se'eluno imensowi.
Kupotiio usa a wawo ngkota anu asa
ka nahi pinotii a wawo ngkota susua;
lere anu asa i'aluo usa,
ka lere anu nahi pohawe usa gagi mokari;
8palilino orua otolu kota melako kobangku-bangku i asa kota
ira mpo'inu uwoi, sine nahi domentende.
Sine, nahi mpepokule ndi Ongkue,”
kanandiomo pau-Do i Ue.
9”Kusapoiakomiumo ponsolangi pinopaho ka haki mpinopaho.
Kupokomoleuo luwuno pinopahomiu ka luwuno lere anggoromiu.
Luwuno keu ara ka keu saitu piingko ikaano kosume.
Sine nahi mpepokule ndi ongkue,”
kanandiomo pau-Do i Ue.
10”Kupotolaomo haki lele i tonga-tongamiu
kana a nto Masiri.
Kupepateako iramo ponai inulemiu
i tempono ngaramiu pinomuru.
Kuweweuo mewoo pekemaamiu,
iwooo engemiu.
Sine nahi mpepokule ndi Ongkue,”
kanandiomo pau-Do i Ue.
11 #
Teg. 19:24
”Kuwowangunsuleomo luwuno kota i olomiu,
kana Dowowangunsuleo Ue Ala Sodomo ka Gumora,
ranta ka imegagi kana tompa api anu inala inso a langano api.
Sine nahi mpepokule ndi Ongkue,”
kanandiomo pau-Do i Ue.
12”Onaemo pu'uno, kanandiomo Aku weweu komiu, hei Isaraeli.
Hangano Aku weweuo mongkona atuu ndi omiu,
pepatindamo tepohaweakono pinesombaimiu, hei Isaraeli!”
13Hangano Ondaemo anu weweuo luwuno torukuno ka mokogagio angi,
anu pauakono mia hapa anu pinewowolo-Do,
anu weweuo wanta ka wongi-wongi
ka anu melempa a wawo luwuno pongku tolino;
Ondae i Ue, Ue Alano luwuakoano, onaemo atuu nee-Do.
Currently Selected:
Amosi 4: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
