Amosi 3
3
Nabi puu mpau-Do Ue Ala
3:1-8
1Rongeomo pau andio, anu pinau-Do i Ue mongkona omiu, hei to Isaraeli, mongkona luwuno suku anu umariomo Kutaateo meluarako inso i wita Masiri,
2”Butu omiu anu tino'ori-Ku
inso a luwuno suku i wawontolino.
Onaemo pu'uno Aku humuku komiu
hangano luwuno salamiu.
3Melempa irake orua mia meronga-ronga,
ba napi dopedandi?
4Mengaolike asa singa a ntobu,
ba nahi pohawe kaangano?
Mohohoike singa mongura inso a nsenono,
ba napi porako hapa-hapa?
5Kona ohoke manu-manu,
ba nahina pinotakoako oho a wita?
Tesembike oho inso i wita,
ba nahina anu koona?
6Tewala pinuuri tawuwua i asa kota,
nahi dompondidi-ndidi ke palilino?
Tewala gagi urasa'o i asa kota,
kombake Ondae i Ue anu weweuo?
7Mentee ntu'u, Ondae Ue Ala nahi Doweweu
ba nahi Dopokomengkaao pomputusi-Do a ntetenaa-Do, luwuno nabi.
8Singa mengaoliomo,
isemake nahi doito?
Ondae Ue Ala mepau Iramo,
isemake anu nahi pompau anu ta gagi?”
Isaraeli ta rinawo-rawo
3:9-15
9Paleleomo a luwuno bente i Asidodi
ka a luwuno bente i wita Masiri,
pauomo, ”Impepumpumo a ntorukuno Samaria
ka mengkitaomo tewukaa langkai i tongano kota atuu
ka popokonsiia anu hina i tu'ai.”
10”Nahi domponto'ori mpoweweu anu mentee,” kanadiomo pau-Do i Ue,
”Ondae mpompokonsii ka pobobarasai i luwuno bentedo.”
11Onaemo pu'uno kanandiomo pau-Do Ue Ala,
”Iwali ta hina a mpetengi-tengino witamiu,
rosomu ta inonini inso ndi omue,
ka luwuno bentemu ta pinomuru!”
12Kanandiomo pau-Do i Ue,
”Kana puu mpopakambi mompotola inso a ngangano singa
orua tangkelari ke lewe biri,
kanatuumo to Isaraeli anu mpo'ia i Samaria ira mempinotola
butu kana tompano poturia
ke asa mpole karuno dasa.”
13”Rongeomo, ka popoto'oriomo inuleno i Yako,”
kanandiomo pau-Do Ue Ala, Ue Alano luwuakoano,
14 #
2Mok. 23:15
”Menteeano i tempono Kuhukuo Isaraeli a luwuno wineweuno mosa'o,
Aku mompotiiakono pohuku a luwuno meda pontunua pesombano Beteli.
Tandu-tanduno meda pontunua pesomba atuu pinudu
ka tedonta a wita.
15Aku mobangkuo po'ianga i tempono morini saru po'ianga tempono mokula;
terawo-rawoomo luwuno raha tindu,
ka pingkoomo luwuno raha langkai ka tekosi,”
kanandiomo pau-Do i Ue.
Currently Selected:
Amosi 3: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
