Amosi 2
2
1 #
Yes. 15:1–16:14; 25:10-12; Yer. 48:1-47; Yeh. 25:8-11; Sep. 2:8-11 Kanandiomo pau-Do i Ue,
”Hangano otolu wineweuno Moabi anu mosa'o, ke opaa,
nahi Aku balio mbo'u pomputusi-Ku.
Hangano itunuomo luwuno wukudo mokole i Edomi gagi kapuru.
2Aku motolao api i larono Moabi,
ranta luwuno bente mo'ai luwu.
I Moabi ta mate a laro ntewukoa,
itondao pohio i tempono me'uni tawuwua.
3Aku mokotampulao anu pabawa inso i tonga-tongano
ka mepateo luwuno anu langkai potorono saru onae,”
pau-Do i Ue.
Pohuku tiano Yehuda
2:4-5
4Kanandiomo pau-Do i Ue,
”Hangano otolu wineweuno Yehuda anu mosa'o, ke opaa,
nahi Aku balio pomputusi-Ku.
Hangano nahi domentarimao songka-Do i Ue,
ka nahi dompe'ini a luwuno pompakosi-Do.
Dompokopansia ira lahumoa mpegaupi
anu tinondado uempu'udo.
5Aku mompotola api a laro Yehuda,
ranta luwuno bente Yerusale mo'ai luwu.”
Pohuku tiano Isaraeli
2:6-16
6Kanandiomo pau-Do i Ue,
”Hangano otolu wineweuno Isaraeli anu mosa'o, ke opaa,
nahi Aku balio mbo'u pomputusi-Ku.
Ondae me'asa ira mia mentee hangano doi
ka mia mongkokolaro hangano asa pasa sandala.
7Ondae melolanda ira uludo mia molema a laro pampawu
ka mebungkui ira mia marasai inso a nsala moleoa;
ana ka ama lumako mewowaliako asa ana beine,
ranta molinggei memporino nee-Ku.
8Ondae mpepombole i horino sompo meda pontunua pesomba
a wawo sangka ginadedo mia,
ka me'inuo anggorodo mia anu medinenda
a raha-Do Ue Alado.
9 #
Win. 3:8-11
Kahinaano inso i arodo Kuropu iramo to Amori,
anu ondaudo kana ondauno keu arasi
ka rosodo kana keu tarabanti.
Kupokotampulaomo wuano inso i wawono
ka hakano inso i totono.
10Kahinaano Ongkuemo anu tumaate komiu mpeluarako inso i wita Masiri
ka wawa komiu i larono pato pulu nta'u i pada one,
ka impetorokio witado to Amori.
11 #
Pod. 6:1-8
Kupotoro iramo asa ntia anamiu gagi nabi
ka inso a luwuno mangalitaumiu megagi mia anu meweengakono tumuwuno ndi Ondae.
Komba kanatuuke, hei to Isaraeli?”
Kanandiomo pau-Do i Ue.
12”Sine omiu mpoweeako ira mia anu meweengakono tumuwuno ndi Ondae mpo'inu anggoro
ka parenta ira nabi:
Si mpopau anu ta gagi!
13Menteeano, Aku lumeluo pelandaamiu
kana teleluno kareta anu bukeako wuano gandu.
14Anu magasi nami ta mokompolai mbo'u,
anu moroso nami mentudu rosono,
ka anu moroso ntu'u ka mosia nahi pokompetolahako.
15Puu pompana nahi pokompekorahako,
anu magasi pelempano nahi ta tepotola
ka anu mesawi a ngara nahi pokompetolahako.
16Ka anu lalu mosia i olodo luwuno puu mpetea
ta molai kolambe-lambe ia oleo atuu,”
kanandiomo pau-Do i Ue.
Currently Selected:
Amosi 2: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
