2 TIMOTIU 3
3
Teweweuno mia a oleo pokotompa
3:1-9
1To'oriomo nine a luwuno oleo pokotompa ta hawe tempo anu masukara. 2Mia ta kumekewoio koroino onaeno ka gagi atano doi. Ira mengkopau-pau anu nahi mentee ka mpompelangka-langkai, ira megagi puu pomposebe, ira me'ewa a mia mota'u ka nahi domponto'ori mpontarimakasi, nahi domperioo agama, 3nahi domponto'ori mpompehohawa, nahi domebehe mpesintuwu, inehedo popau mosa'o ira mia, nahi sabara, marantekuda, nahi domebehe anu moiko, 4inehedo mpohapu pedandia, nahi dompompewowolo ondau, mpompeto'o-to'ori, laluaopo domentondao po'eheno aroado sekonopo tumonda Ira Ue Ala. 5Montonda koroi domeweweuo pesombado, sine a menteeano domehapuo rosono. Olaiako iramo atuu! 6Hangano i olodo hinao mia anu menongkoako lumako a rahado mia susua ka dompokobenge-benge ira beine anu molema anu bukeako hala ka ipabawai ira mperupa-rupa po'eheno aroa, 7anu maupo inehedo wela mempinaguru, sine nahi dohori mento'orio menteea. 8#Pel. 7:11 Mengkena kana i Yanesi ka i Yamberesi umewaio i Musa, kanandio koa mbo'u dome'ewaio menteea. Pinewowolodo mosa'o ka pompe'ala-alado nahi moroso. 9Sine manasaomo nahi ira ntedada lahi, hangano kana mongkona i Yanesi ka i Yamberesi, benge-bengedo mbo'u ta mengkaa a luwuno mia.
Pompe'ala-ala tuwu a laro pobobarasaia ka a laro pobasaa Wunta Mempori
3:10-17
10Sine omue utondaomo pompaguruku, sala ntumuwuku, pohaweno aroaku, pompe'ala-alaku, sabaraku, pompehohawaku ka modatoaku. 11#Tin. 13:14–14:20 Omue metondaakomo marasaiako pobobarasaia ka masukaraa kana anu kupemarasaio i Antiokia ka i Ikoniu ka i Lisitera. Luwuno pobobarasaia atuu kupemarasaio ka Dopotola akumo i Ue inso ndi onae. 12Lano sompo mia anu ineheno tuwu mesomba ndi Ondae i Kerisituu Yesu ta marasaiako pobobarasai, 13sekono mia mosa'o ka anu mompopo'oo ta tetiangi mosa'o, ondae pompopo'oo ka pinopo'oo, 14Sine po'ineeomo ka upe'ini mpiha a menteea anu utarimaomo ka upe'ala-alao, saru wela rumambeo mia anu paguruakomu. 15Pewowolo koa mbo'u nine inso kodei uto'oriomo Wunta Mempori anu mokompoweeakomu ponto'ori mentee katumaateko a ntekaduduia hangano pompe'ala-ala ndi Ondae i Kerisituu Yesu. 16Luwuno binuri anu inso a Mpenaa-Do Ue Ala lano mentudu a pompaguru, mokomengkaao saala, mokomoikoo pelelu ka paguruo mia a menteea. 17Hangano kanandio sompo-sompo mia-Do Ue Ala pinatinda tiano sompo poweweu moiko.
Currently Selected:
2 TIMOTIU 3: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
