2 TIMOTIU 2
2
Pepoboi metonda marasai
2:1-13
1Onaemo pu'uno, hei anaku, gagimo moroso hangano pe'aroa ndi Ondae i Kerisituu Yesu. 2Hapa anu urongeomo inso ndi ongkue i arodo hadio sakosii, pe'ala-alaakonomo atuu a mia anu tekona domempine'ala-ala, anu mempande koa mbo'u mpompaguru mia susua. 3Petondamo marasai kana aasa sorodadu anu moiko inso ndi Ondae i Kerisituu Yesu. 4Aasa sorodadu anu kontongaano metea nahi mokoliliakono koroino mongkona pepotuwuno, hangano kanandio ka ipemoikoo tadulakono. 5Asa mia megolo butu mokompohawe ramba-ramba ulu gagi tondonino poponangi, tewala onae metandi tumondao luwuno atora megolo. 6Asa mia puu mpelere anu mokua ntu'u asalakono anu merapio amba-ambano hasilino inanggano. 7Pekokoongakonomo hapa anu pinauku; Ondae i Ue Ira moweeko ponto'ori a luwuakoano.
8Pewowoloomo andio: Ondae i Yesu Kerisituu, anu mewangu Iramo inso i olodo mia mate, anu pine'anaako Iramo gagi inuleno i Daudi, onaemo Lele Mawongkoa anu pinaleleku. 9Hangano pompalelea Lele Mawongkoa andio ka kumarasai, tendeano pinongu mengkena mia mosa'o, sine pau-Do Ue Ala pinalele mpiha. 10Onaemo pu'uno kupedatoo tumembio luwuno atuu tiado mia bininiki-Do Ue Ala, ka dompohawe koa mbo'u tekaduduia ndi Ondae i Kerisituu Yesu saru marambaa anu nahina tampulaano. 11Menteeomo pau andio,
”Tewala memate kita saru Ondae,
kita koa mbo'u mentuwu saru Ondae;
12 #
Mat. 10:33; Luk. 12:9 tewala mpompesu'ui kita,
kita koa mbo'u mpetonda mpomparenta saru Ondae;
tewala tomehapu Ira,
Ira koa mbo'u humapu kita;
13tewala nahi tompetenunu, Ondae pine'ala-ala mpiha,
hangano nahi Dopokohapuo koroi-Do.”
Patudu a mpo'aropi puu pompaguru anu mompopo'oo
2:14-26
14Pewowoloomo ka pesu'uiomo pauo luwuno atuu ndi ondae i aro-Do Ue Ala, ka si domempande mpau, hangano mongkona atuu nahina ntu'u tuduno, tendeano mokobulalingo ira mia merongeo. 15Ungkeakonomo ka ipototomu i aro-Do Ue Ala kana asa mia puu mpo'angga anu siimo imokoko'ii, pauo manasa paleleo pau menteea atuu. 16Sine olaiakonomo pau anu nahina tuduno ka anu nahi mempori anu butu montiangi gau mosa'o. 17Paudo lumele kana haki kangkere. I olodo tewinso i Himeneu ka i Piletu, 18anu pansiaomo inso a menteea saru mompaguru nine pewanguto kontongaanomo ka hangano kanandio sumolangio pompe'ala-alado asa ntia mia. 19Sine empehino anu ninaa-Do Ue Ala atuu moroso ka tondonino onaemo, ”Ondae i Ue tumo'orio isema mia-Do” ka ”Sompo mia anu pauo nee-Do i Ue asalakono ka ibintao mosa'oa.” 20A laro raha anu langkai komba butu hinao parewa inso a wulaa ka salaka, tendeano inso mbo'u a ngkeu ka wita; anu amba-ambano pinake a ntinoo anu maramba ka anu poko'ariano a ntinoo anu komba maramba lahi. 21Tewala asa mia mokomemporio koroino inso a luwuno anu mosa'o, onae ta gagi parewano raha a ntinoo anu maramba, onae pinokomempori, ipetekonao ueno pakeo ka pinatinda tiano sompo anggaa anu maramba. 22Onaemo pu'uno olaiakono po'eheno aroado mia mongura, ungkeomo moleoa, petenunua, pompehohawa ka sintuwu meronga saru ondae anu mpebooli ndi Ondae i Ue a aroa anu morina. 23Polaiakono luwuno anu inungke-ungkeako, anu benge-benge ka nahi tekona. Uto'orio nine luwuno atuu mompokohina pengengea, 24sekono asa mia tetenaa-Do i Ue nahi moiko ipengenge, sine asalakono me'aroa a luwuno mia. Onae asalakono pande mompaguru, sabara 25ka saru mepau molusa-lusa mokotaate ira mia anu inehedo me'ewa, hangano bara'ura Dopoweeako ira i Ue tempo ka dontepidi ka wawa ira ranta ka domento'orio menteea, 26ka ba kanandio gagi ira wali ntelike aroado, hangano mentola inso a ohono i Mosa'o anu umonggo ira a mpo'eheno.
Currently Selected:
2 TIMOTIU 2: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
