2 TESALONIKA 3
3
Mekakai ka mo'angga
3:1-15
1Ka i'amba, pepaekompo luwu-luwu, impekakaiakami, ka ikotele-teleleno koa pau-Do i Ue ka pinokomaramba, mengkena kana anu gagiomo i olomiu, 2ka kintepotola inso a luwuno anu mporisui ka mia memosa'o gaudo, hangano komba luwuno mia mohawe pompe'ala-ala. 3Sine Ondae i Ue pine'ala-ala Ira. Ira mokorosoo aroamiu ka mekaria komiu inso a wineweu anu mosa'o. 4Ka kimpe'ala-alao ndi Ondae i Ue, nine hapa anu kime'oliwiakomiu, imeweweuo ka komiu meweweuo. 5Po'ineeomo ka Dopo'aroo mpiha i Ue aroamiu a pompehohawa-Do Ue Ala ka a pompedato-Do i Kerisituu. 6Sine kime'oliwi komiu, pepaekompo luwu-luwu, a nee-Do Ue Yesu Kerisituu, ka ime'olaiakono sompo pepaekompo anu nahi weweuo anggaano ka anu nahi tondao pompaguru anu imentarimaomo inso ndi omami. 7Hangano omiu isa'a mento'orio, ba kana'umpe asalakono imentondao pandirimami, hangano komba ntekolupe kami mpo'angga i olomiu, 8ka komba kimengkaano mpena rotido mia, sine mpeteahako kami ka mpe'isei meene wongi, ka si hina maupo isema anu pinokonsusamami i olomiu. 9Komba hangano nahi tekona kimeweweuo atuu, tendeano hangano inehemami ka kimegagi pandiri, ka imentondao. 10Hangano, tempono mbo'u kimekongko i olomiu, kime'oliwiakomiu andio: tewala asa mia nahi behe mo'angga, siimo ipongkaa. 11Kimempauo andio hangano kimerongeo, nine hinao mia anu nahi te'atora tuwuno ka nahi po'angga, tendeano osupoako anu nahina tuduno. 12Mia anu kanandiodo kimempauakono ntu'u ka patuduo ndi Ondae Ue Yesu Kerisituu, ka domerodo koa mpiha me'anggao anggaado ka ba kanandio domengkaano kaangado ondaedo. 13Ka omiu, pepaekompo luwu-luwu, si mente'osa mpoweweu hapa anu moiko. 14Tewala hinao mia anu nahi behe merorongeakono hapa anu pinaumami a wunta andio, impetondonio, ka si mpewali-waliakono, ka igagi mokoko'ii, 15sine si mentuduo kana iwali, sine imengkuahakono kana aasa pepaekompo.
Tabea
3:16-18
16Ka Ondae, Ueno rodoa, po'ineeomo ka Dopoweeakomiu mpiha rodoa-Do, a luwuakoano. Ondae i Ue kumongkomi komiu luwu. 17Tabea inso ndi ongkue, i Paulu. Tabea andio kuburiakono kaeku. Ndiomo tondonino a sompo wuntaku: kanandiomo binuriku. 18Pe'aroa-Do i Yesu Kerisituu, Ueto, kumongkomi komiu luwu!
Currently Selected:
2 TESALONIKA 3: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
