1 TIMOTIU 1
1
Tabea
1:1-2
1Inso ndi Paulu, tetenaa-Do i Kerisituu Yesu montonda petena-Do Ue Ala, Puu pongkaduduito, ka Ondae i Kerisituu Yesu, pu'uno pomperorohito, 2#Tin. 16:1 hawe ndi Timotiu, anaku ntu'u a pompe'ala-ala: pe'aroa, pompehohawa ka rodoa inso ndi Ondae Ue Ala Ama ka Ondae i Kerisituu Yesu, Ueto, kumongkomi komiu.
Mongkona pompaguru nahi mentee
1:3-11
3Tempono ka kumingki motilaloakono pelempaaku lumako i Makedonia, kudadaikomo ka upo'ia i Epesu ka upompauako ira ba opia mia, ka si dompompaguruako pompaguru susua 4ke maupo me'osupoako tutu-tutulu ka potudano tumuwu anu nahina otu-otuno, anu butu mompokohina tepokerea mpena, ka nahi te'atora tumuwu tekaduduia anu pinowee-Do Ue Ala a pompe'ala-ala. 5Tinoono patudu atuu onaemo pompehohawa anu meluarako inso a aroa anu mempori, inso i laro aroa anu moiko ka inso a pompe'ala-ala anu moleo. 6Sine hinao mia anu nahi haweako a ntinoo atuu ka anu tepopo'oo a mpinau anu nahina tuduno. 7Ondae atuu mingki megagi pompaguru songka Taura maupo nahi domento'orio pinaudo ondaedo ka puu mpau anu pauado. 8Tomento'orio nine songka Taura atuu moiko tewala pinolempa a menteeano, 9onaemo ka itino'ori nine songka Taura atuu komba tiano mia mentee, tendeano tiano mia anu umewai Ira Ue Ala ka mia lambaha, tiano mia mosa'o gauno ka mia tehala, tiano mia tuwu ntolino ka anu nahi pe'agama, tiano mia mompepate amano ka mompepate ineno, tiano anu mompepate, 10tiano mia belesu ka mewowaliako pe'asa ntamano, tiano anu mompolaisako, tiano anu megaupi, tiano mia mesumpa megaupi ka luwuakoano anu nahi penunu saru pompaguru mentee 11anu me'empehiako Lele Mawongkoa inso ndi Ondae Ue Ala anu maramba ka tekona inunde-unde, kana anu pine'ala-alaako ndi ongkue.
Pontarimakasi a pe'aroa-Do Ue Ala
1:12-17
12Montarimakasi aku ndi Ondae, anu mokomoroso aku, onaemo Ondae i Kerisituu Yesu, Ueto, hangano Dotudu aku metenunu ka me'ala-alaakune pompekakaakoa andio – 13#Tin. 8:3; 9:4-5 ongkue anu se'eluno asa mia anu mompepaukiako ka asa mia anu mobobarasai ka asa mia anu lambaha, sine Dopehohawa akumo, hangano luwuno atuu kuweweuo nahina ponto'oriku onaemo nahina pompe'ala-ala. 14Tendeano pompehohawa-Do Ueto atuu wineeako akumo hadio ntu'u saru pompe'ala-ala ka pompehohawa ndi Ondae i Kerisituu Yesu. 15Pau andio mentee ka tekona itinarima luwu, ”Ondae i Kerisituu Yesu hawe i wawontolino mongkadudui mia tehala,” ka i olodo ongkuemo anu tehala ntu'u. 16Sine onaemo pu'uno ka kupinehohawa, ka Dopopokitao i Yesu Kerisituu luwuno sabara-Do a ngkoroiku andio, gagi mia anu tehala ntu'u. Nde ba kanandio gagi aku pandirido anu lembui dompe'ala-ala Ira ka mohawe tuwua anu nahina tampulaano. 17Petabe ka marambaa hawe nahina tampulaano ndi Ondae Mokoleno luwuno tempo, Ondae Ue Ala anu nahina tampulaa-Do, anu nahi Dokinita, anu asa-asa-Do! Ami.
Anggaano i Timotiu
1:18-20
18Anggaa andio kuweeakomu, Timotiu anaku, menunu saru hapa anu pinauomo anu ta gagi mongkona koroimu, ka ipokomorosoko pinau anu ta gagi atuu umanggao anggaa anu moiko a pompe'ala-ala ka aroa mewine anu mentee. 19Ba opia mia domperioo aroa mewinedo anu mentee atuu, ka onaemo pu'uno nami hina pompe'ala-alado, 20i olodo i Himeneu ka i Alesande, anu kupeweengako iramo ndi Mosa'o, ka dontepidi mpompepaukiako.
Currently Selected:
1 TIMOTIU 1: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
