2 TESALONIKA 2
2
Pe'ewaa se'eluno napi Dohawe i Ue
2:1-12
1 #
1Tes. 4:15-17
Mongkona hawe-Do Ueto i Yesu Kerisituu ka tepumpuato saru Ondae kime'emao ndi omiu, pepaekompo luwu-luwu, 2ka si ronga mebulalingo ka mensalalaro, moiko hangano pontiso inso a Mpenaa, maupo hangano pompalele ke wunta anu pinau inso ndi omami, kana haweomo oleo-Do i Ue. 3Maupo ba kana'umpe si mebehe dompopo'oo komiu mia! Hangano se'eluno Oleo atuu asalakono hawe se'elu pepoura ka asalakono pinokomengkaa se'elu mia mo'ewai songka, anu asalakono mate, 4#Yeh. 28:2; Dan. 11:36 onaemo anu umewa tumuduo koroino mantande i wawono luwuno anu pinau ke anu pinesombai kana Ondae Ue Ala. Tamoako onae mentoro a Raha-Do Ue Ala ka ipepokomengkaa kana Ondae Ue Ala. 5Nahi impewowolooke, nine mongkona atuu mararuomo kupauakomiu, tempono da kupe'asaa komiu? 6Ka kanandio-andio imento'orio hapa anu umonsoio, ranta ka i'amba ta mepokomengkaa a tempo anu ipinakosiako. 7Hangano mewuni-wuni pe'ewaa mompu'uomo mo'angga, sine kandio-andio da hinao anu mo'onsoi. Tewala inoniniomo anu mo'onsoi atuu, 8#Yes. 11:4 i tempomo atuu anu umewa a songka ka i'amba ta mepokomengkaa, sine Ondae Ue Yesu Ira mepateakono penaa inso a nganga-Do ka Ira rumopuo, ba Dowali hawe. 9#Mat. 24:24 Haweno anu umewa a songka atuu onaemo po'anggano i Mosa'o, ka ta tinondaako mperupa-rupa wineweu kihohali-haliako, luwuno petondoni ka anu mengkinohali-haliako nahi mentee, 10saru mperupa-rupa pompopo'oo mosa'o a mia anu asalakono ira memate hangano nahi domentarimao ka mpehohawao menteea anu mokokadudui ira. 11Ka onaemo pu'uno ka Dopotiio Ue Ala pompopo'oo ndi ondae, anu weweu ira mpe'ala-alao pegaupi, 12ka domehinuku luwu mia anu nahi dompe'ala-alao menteea ka anu inehedo mosa'oa.
Bininiki ta kinadudui
2:13-17
13Sine omami asalakono wela pontarimakasi ndi Ondae Ue Ala hangano omiu, pepaekompo luwu-luwu, anu pinehohawa-Do i Ue, hangano inso a pompu'uano Dobiniki komiumo Ue ala ka imengkinadudui a Mpenaa anu mokomempori komiu ka a menteea anu pine'ala-alamiu. 14Onaemo ka Dopoboi komiumo hangano Lele Mawongkoa anu pinalelemami, onaemo ka impohawe maramba-Do i Yesu Kerisituu, Ueto. 15Onaemo pu'uno, impentademo temoroso ka impe'inimo a luwuno pompaguru anu tinarimamiu inso ndi omami, moiko anu pinau, maupo anu binuri. 16Ka Ondae, Ueto i Yesu Kerisituu, ka Ondae Ue Ala, Amato, anu a mpe'aroa-Do Dopehohawa kitamo ka anu moweeakitamo pontarero anu nahina tampulaano ka pomperorohi moiko ndi ontae, 17po'ineeomo ka itareroo ka mokorosoo aroamiu a anggaa ka pau anu moiko.
Currently Selected:
2 TESALONIKA 2: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
