2 TESALONIKA 1
1
Tabea
1:1-2
1 #
Tin. 17:1
Inso ndi Paulu, i Siliwanu ka i Timotiu, hawe a bawaado to Tesalonika ndi Ondae Ue Ala Amato ka ndi Ondae i Yesu Kerisituu. 2Pe'aroa ka rodoa inso ndi Ondae Ue Ala, Amato, ka inso ndi Ondae Ue Yesu Kerisituu kumongkomi komiu.
Pontarimakasi ka pekakai
1:3-12
3Omami asalakono pontarimakasi mpiha ndi Ondae Ue Ala hangano omiu, pepaekompoku luwu-luwu. Ka lano tekona ka ikanandio, hangano pompe'ala-alamiu koteti-tetiangino ka mambe pehohawamiu komoro-morosono i olomiu, 4ranta a luwuno bawaa-Do Ue Ala mpo'unde kami mongkona omiu hangano pompeteamiu ka pompe'ala-alamiu a luwuno poweweunsa'o ka pompokonsiia anu pinemarasaimiu: 5aasa tondonino mongkona moleono pobitara-Do Ue Ala, anu mokomengkaao nine omiu tekona gagi palili a Poparentaa-Do Ue Ala, omiu anu kanandio-andio memarasai hangano Poparentaa atuu. 6Hangano lano ndi Ondae Ue Ala ka Dopombaloakono pompokonsii ndi ondae anu mempokonsii komiu 7ka ndi omiu anu mempinokonsii Dopowee komiu sanaa aroa ka ndi omami mbo'u, i tempono Dopesabaako i Yesu inso i laro nsuruga meronga saru luwuno mala'eka-Do, a mpabawa-Do, a laro api anu kolanga-langa, 8ka moweweu pombaloa ndi ondae anu nahi domebehe mento'ori Ira Ue Ala ka nahi domperorongeakono Lele Mawongkoa-Do i Yesu, Ueto. 9Ondae andio ira mehinukuako matea anu nahina tampulaano, pinoko'olai inso i aro-Do i Ue ka inso a marambano roso-Do, 10tewala hawe Ira a oleo atuu ka Dopinokomaramba i olodo mia mempori-Do ka domengkohali-haliakono luwuno mia anu mpompe'ala-ala, hangano ponsakosiimami ndi omiu impe'ala-alaomo. 11Onaemo pu'uno ka kiwela mpekakaiakomiu mbo'u, ka Dopetekona komiu Ue Ala a mpepoboi-Do ka saru roso-Do mokosompoo po'ehemiu mpoweweu moiko ka mokosompoo inanggano pompe'ala-alamiu, 12ranta ka ipinokomaramba nee-Do i Yesu, Ueto, ndi omiu, montonda pe'aroa-Do Ue Alato ka Ondae Ue Yesu Kerisituu.
Currently Selected:
2 TESALONIKA 1: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021