1 TESALONIKA 5
5
Petangkoro
5:1-11
1Sine mongkona tempo ka oleo, pepaekompo luwu-luwu, siimo imebinuriako, 2#Mat. 24:43; Luk. 12:39; 2Pet. 3:10 hangano omiu isa'a mento'orio ntu'u, nine oleo-Do i Ue hawe kana mia monako tempono wongi. 3Tewala mpotae ira: Luwuno sintuwu ka rodo nahina marisua – ka borono i'alu ira masolaa, kana aasa beine anu mentia i'aluo mahaki me'ana – manasa nahi ira mentola. 4Sine omiu, pepaekompoku, komba mentuwu komiu a laro wongi-wongia, ranta ka imansa humawe komiu oleo atuu kana mia monako, 5hangano luwumiu ana mewine ka ana meene. Ontae komba miano wongi ke miano wongi-wongia. 6Onaemo pu'uno moikoopo si tompoturi kana mia mehano, sine tompetangkoro ka molike. 7Hangano ondae anu mpoturi, mpoturi tempono wongi ka ondae anu memolangu, molangu tempono wongi. 8#Yes. 59:17; Eps. 6:13-17 Sine ontae, anu mia meene, moikoopo tomemolike, mpelemba labuako pompe'ala-ala ka pompehohawa, ka mpe'ulu-uluako pomperorohi tekaduduia. 9Hangano komba Dopakosio Ue Ala ka i'alu kita pontekudaako, sine ka tompohawe tekaduduia hangano Ondae i Yesu Kerisituu, Ueto, 10anu mateakitamo, ke moiko mpetangkoro kita ke mpoturi kita, ka tomentuwu mperonga-ronga saru Ondae. 11Onaemo pu'uno imemambe patudumo ka memambe pokoroso kana anu lano imeweweuomo.
Luwuno patudu
5:12-22
12Kime'emao ndi omiu, pepaekompoku luwu-luwu, ka impelangkai ira anu mpe'isei mpo'angga i olomiu, anu wawa komiu ndi Ondae i Ue ka anu kumuahako komiu; 13ka ipompesu'i mentulungi ira a pompehohawa hangano inanggado. Imentuwumo memambe sintuwu mpiha.
14Kimempatudu komiu mbo'u, pepaekompo, imengkuahako iramo anu mentuwu nahi te'atora, imentarero iramo anu motewe aroado, impokoroso ira anu memolema, imemauruako iramo luwuno mia. 15Impekokoongakono, ka si hina mia anu mombaloako mosa'o ka anu mosa'o, sine ime'ungkeakono mpiha anu moiko, ndi omiu nte'o'asa mia ka a luwuno mia.
16Imemawongkomo mpiha. 17Impekakaimo mpiha. 18Impontarimakasimo a luwuakoano, hangano onaemo po'ehe-Do Ue Ala ndi omiu a ntepo'asaa ka Ondae i Kerisituu Yesu.
19Si mpepateo Penaa, 20ka si mperuanahio luwuno pinau anu ta gagi. 21Impepenteeomo luwuakoano ka ime'iniomo anu moiko.
22Impoko'olaiomo koroimiu inso a mperupa-rupa anu mosa'o.
Tabea
5:23-28
23Po'ineeomo Ondae Ue Alano rodoa mokomempori komiu luwu ka po'ineeomo penaa, sumanga ka koroimiu sompo itepekaria saru nahina tataano a hawe-Do i Yesu Kerisituu, Ueto. 24Ondae anu moboi komiu mempori Ira, Ondae koa mbo'u Ira umihiio.
25Pepaekompoku luwu-luwu, impekakaiakamimo.
26Impohaweakono pewoo-woo anu mempori tabeamami a luwuno pepaekompo.
27A nee-Do i Ue ku'emao ntu'u ndi omiu, ka ibinasa wunta andio a luwuno pepaekompo.
28Pe'aroa-Do i Yesu Kerisituu, Ueto, kumongkomi komiu!
Currently Selected:
1 TESALONIKA 5: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
