2 Samueli 1
1
Lele mateno i Saulu irongeo i Daudi
1:1-16
1Mansano mate i Saulu, tempono ipekule i Daudi umarino numangi ira to Amale, mo'iaomo i Sikila orua oleo. 2Ia oleo anu ko'otolu haweomo asa mia sorodaduno i Saulu mesangka teberi-beri ka wita a uluno. Sahaweno ndi Daudi, menggolontuomo mesomba hawe i wita.
3Mesikeno i Daudi ndi onae, ”Isuake insoamu?” Sangkino ndi ondae, ”Molai aku inso a nsorodadudo to Isaraeli.” 4Motae i Daudi ndi onae, ”hapake anu gagi? Tutuluomo ndi ongkue.” Ipotae, ”Sorodadu mpolai iramo inso ia mpeteaa, hadio anu mate. I Saulu ka i Yonata, anano, mate ira koa mbo'u.” 5Ka i'amba motae i Daudi a mangalitau anu mowawa lele ndi onae atuu, ”Kana'umpe kau to'orio motae i Saulu ka i Yonata anano, mate iramo?” 6#1Sam. 31:1-6; 1Taw. 10:1-6 Mangalitau anu mowawa lele atuu, motae, ”Tekonai aku i mentorukuno Giliboa. Kukitao i Saulu metumboako kansaino, kontongaano kareta ka sorodadu mpengara anu meluluo umpeda iramo. 7Mansano mewolili i bungkuno, ikita aku ka ipoboi aku. Motae aku, ’O, ueku.’ 8Mesikeno ira ndi ongkue, ’Isemake omue?’ Sumangki aku ndi ondae, ’Ongkue to Amale.’ 9Motae iramo ndi ongkue, ’Aiwamo ramai ka upepate aku, nde tedoa akumo mompemarasai, mokoa penaaku anu kongko.’ 10Kurangkuhi ira ka kupepate ira, nde kuto'orio, nami ira tuwu mansado tebangku. Ku'alao ramba-ramba uludo ka mala-mala a ngkaedo, ka kuwawao ndi omiu ueku.”
11Ka i'amba i Daudi uminio sangkano ka ipeberisakono, kanatuu koa mbo'u luwuno mia anu merongaakono. 12Mponsabangi ira, mpengese ka mempuasaakono i Saulu ka i Yonata anano, bawaa-Do i Ue ka suku Isaraeli, ranta sumoo oleo, hangano memateako iramo ponai.
13Ka i'amba mesikeno i Daudi a mangalitau anu mowawa lele atuu ndi onae, ”Isuake insoamu?” Sangkino, ”Ongkue anano asa mia hawe, to Amale.” 14Motae i Daudi ndi onae, ”Kana'umpe ka nahi udoito tumandeo kaemu mepateo mia anu inurapi-Do i Ue?” 15Ka i'amba i Daudi moboio asa mia atano ka ipotae, ”Aiwa, pepateo.” Mia atuu moko'ario, ranta ka i mate. 16Motae i Daudi ndi onae, ”Ususuruo omuemu reamu, nde hangano paumu omuemu gagiomo sakosii umewaiko ka upotae: Kupepateomo mia anu inurapi-Do i Ue.”
Ponsabangino i Daudi hangano i Saulu ka i Yonata
1:17-27
17Ponsabangino i Daudi andio mongkona i Saulu ka i Yonata, anano, 18#Yos. 10:13ka onae mompowee parenta ka domempinaguruako Penani ”Pana” a inuleno i Yehuda. Kanandiomo anu teburi a Wunta Mia Moleo:
19Marambamiu, oo to Isaraeli, tebangku pinepate a pongku-pongkumu!
Memate iramo luwuno tadulako.
20Simempaleleo atuu i Gati,
simempaleleo atuu a nsala Asikelo,
kasi dompo'unde ana beinedo to Pelisiti,
kasi dompo'unde-unde ana beinedo mia anu nahi petindi!
21Oo luwuno torukuno i Giliboa!
Sihina tontoru, ke usa i wawomu,
ba tonga mpada anu mewalo,
nde i ra'aimo kantado pongkiari tetadiako,
kantano i Saulu nami inurapiako mbo'u lana.
22Maupo nahina reado mia mempinepate
maupo nahina tabado pongkiari
panano i Yonata nahi ta tepokule,
ponaino i Saulu nahi ta mekule mpena.
23I Saulu ka i Yonata anu pinehohawa, ka pinesanaa,
a ntumuwu ka matedo nahi teponsia.
Magasi irapo sekono rajawali,
moroso irapo sekono singa.
24Oo luwuno ana beine Isaraeli, impengesemo hangano i Saulu,
anu moweeakomiu sangka motaha kirimisi anu tedoa tekosi,
anu mompokonaa komiu ramba-ramba wulaa a sangkamiu.
25Memate iramo luwuno pongkiari
a laro mpeteaa!
I Yonata pinepate a pongku witamiu.
26Aroaku masusa hangano omue Yonata pepaekompoku.
Tedoa upokonsanaa aku;
pompehohawamu tedoa mo'urense laroku,
sekono pompehohawano beine.
27Memate iramo luwuno pongkiari
ka ropuomo luwuno sangka petea!
Currently Selected:
2 Samueli 1: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
