2 Samueli 2

I Daudi gagi mokoledo to Yehuda

2:1-7

1Ba'opia tempo lembuino, i Daudi mo'ema pontiso ndi Ondae i Ue, ”Asalakono aku lumako ke a aasa kota i Yehuda?” Pau-Do i Ue ndi onae, ”Lakomo.” Motaeomo i Daudi, ”Isuake asalakono ba kulako?” Pau-Do, ”i Heberoni.” 2#1Sam. 25:42-43Lumakoomo i Daudi i ra'ai, saru orua ira kombiano: i Ahinoa beine to Yisireli ka i Abigai umari kombiano i Naba to Karameli. 3I Daudi wawa ira mia anu tumondao singge mia saru somborino. Mpo'ia ira a kota-kota Heberoni. 4#1Sam. 31:11-13Ka do'amba mehawe to Yehuda, ka dome'urapio i Daudi i ra'ai gagi mokoledo to Yehuda.

Ka i'amba domempauakono i Daudi kanandio, ”To Yabesi-Gilea domengkaburuomo i Saulu.” 5Onaemo i Daudi ka ipontena mia lumako a nto Yabesi-Gilea saru pe'oliwi, ”Doronsokomiumo i Ue, hangano impopokitaomo pompehohawa ka petenunumiu a ue miu i Saulu, ka imengkaburuo. 6Kanandio-andio, po'ineeomo Ondae i Ue tumisoakomiu pompehohawa ka pongkongkomi-Do ndi omiu. Ongkue mbo'u aku moweweu moikoa anu mengkena ndi omiu, hangano imeweweuomo anu kanatuu. 7Kanandio-andio impokorosoomo aroamiu ka imegagimo mosia. Lano uemiu i Saulu mate iramo, sine dome'urapi akumo to Yehuda gagi mokoledo.”

Pe'iwaliado miano i Daudi ka miano i Saulu

2:8–3:1

8I Abinere anano i Nere, tadulako sorodaduno i Saulu, i'alaomo i Isibose, anano i Saulu ka iwawao i Mahanai. 9I Abinere montoroo gagi mokoledo to Gileadi ka to Asuri, to Yisireeli, to Eparai ka to Benami, ka a luwuno to Isaraeli. 10Isibose anano i Saulu tinuwuno pato pulu nta'u tempono igagi mokoledo to Isaraeli ka ipoparenta orua nta'u tehineno. Sine to Yehuda mentondao i Daudi. 11Tehineno i Daudi moparenta i Heberoni a nto Yehuda, opitu nta'u ka onoo wula.

12I Abinere anano i Nere ka luwuno atano Isibose, anano i Saulu mpelungka inso i Mahanai melako i Gibeo. 13I Yoabi, anano i Seruya ka luwuno atano i Daudi mpelungka ira koa mbo'u. Pada ira ntepo'aro i limbo Gibeo. Anu asa ntia mo'ala po'ianga a wiwino limbo ngkoramai ka asa ntiano mbo'u a wiwi limbo ngkoraane. 14Motaeomo i Abinere ndi Yoabi, ”Po'inee iramo mangalitau dompentade ka metea i aroto.” Sumangki i Yoabi, ”Moiko.” 15Mpentade ira ka domelako ka dinoa hadiodo: hopulu ka orua mia sarungkoroido suku Benami ka i Isibose anano i Saulu, ka hopulu ka orua mia inso a miano i Daudi. 16Ka do'amba singge me'inio uluno tarono ka ipentoboakono ponaino a kompono tarono ranta ka dontebangku mperonga-ronga. Kanandiomo po'ianga atuu nineeako Helikati-Hasurimi, anu mo'ia i Gibeo. 17A oleo atuu gagiomo peteaa langkai. I Abinere ka to Isaraeli ntenangi ira a miano i Daudi.

18I Yoabi, i Abisai, ka i Asaeli, otolu ira ana ntamano i Seruya, kongko ira i ra'ai. I Asaeli magasi peluluno kana lagiwa a mpada. 19I Asaeli lumuluo i Abinere ka nahi pewolili i koana ke i manggali tumondario i Abinere. 20I Abinere mewolili i bungkuno ka ipotae, ”Omueke atuu Asaeli?” Sumangki, ”Humbee, mentee.” 21Motae i Abinere ndi onae, ”Pansiamo i koana ba i manggali, rakoomo te'asa mia inso a mangalitau atuudo ka alaomo sangka peteano.” Sine, i Asaeli nahi behe melimba inso a pepoluluano. 22I Abinere motae mbo'u ndi Asaeli, ”Penaa-naamo lumulu aku. Tembio ka aku mepateko? Kana'umpe ka aku mokokitao rupano i Yoabi pepaekompomu?” 23Sine i Asaeli nahi behe menaa-naa. Ka i'amba i Abinere tumoboakono kansai kompono i Asaeli ranta kansai atuu lompahi i bungkuno. Tebangku ka mate i tu'ai. Luwuno mia anu hawe a mpo'ianga tebangkuano ka mateano i Asaeli atuu mpenaa-naa i tu'ai.

24Sine i Yoabi ka i Abisai lumuluo i Abinere. Itempono sumoomo oleo, hawe iramo umpeda Pongku Ama anu tepo'aro saru pada one Gibeo. 25Inuleno i Benami mpepumpu i bungkuno i Abinere gagi asa bawaa ka mpo'ala po'ianga i asa pongku wita. 26Mebooli i Abinere ndi Yoabi, ”Nde asalakonoke ponai ta mompepate mpiha? Nahi uto'orioke nine tedoa mopa'i anu ta gagi lembuiano? Hawe te'ipia mbo'u ke nahi ubehe parenta ira sorodadumu ka dompenaa-naa lumulu ira pepaekompomu?” 27Sumangki i Yoabi, ”A nee-Do Ue Ala anu tuwu, ande-andeno nahi upepau, asalakono sorodaduku nahi ira mpenaa-naa lumulu ira pepaekompodo hawe mo'oru.” 28Ka i'amba i Yoabi puurio tawuwua ka luwuno sorodadu mpenaa-naa. Nami dolulu ira mbo'u, to Isaraeli ka nami dompetea.

29Asa wongi i Abinere ka luwuno miano mpelempa ntelalo i Araba-Yarade ka sumakio koro Yarade. Mpelempa ira mpiha asa mo'oru, ka domehawe i Mahanai. 30I Yoabi mekule mansano menaa-naa lumuluo i Abinere. Tempono ipumpu ira luwuno sorodadu, mengkaaomo hopulu ka osio mia inso a miano i Daudi tetadi saru i Asaeli. 31Sine miano i Daudi mpompepate tolu etu ka nomo pulu mia inso a nsuku Benami, i olono luwuno miano i Abinere. 32Domentandeo wata ngkoroino i Asaeli ka domengkaburuo a laro ngkaburuno amano i Beteleme. Ka i'amba i Yoabi ka luwuno miano mpelempa asa wongi ka domehawe i Heberoni, tempono meeneomo.

Currently Selected:

2 Samueli 2: XMZ

Highlight

Copy

Compare