1 Samueli 31

Mateno i Saulu

31:1-13

1 # 1Taw. 10:1-12 Tempono dompe'iwali to Pelisiti ka to Isaraeli, to Isaraeli mpolai inso i arodo to Pelisiti ka hadio mempinepate tumambole a mentorukuno Giliboa. 2To Pelisiti lumulu ira mpiha i Saulu ka luwuno anano. Dompepateo i Yonata, i Abinada, ka i Malikisua, luwudo anano i Saulu. 3Peteaa atuu komobe-mobeano ipembasaio i Saulu. Domehaweo puu mpompana ka domebelaio tedoa ondalo. 4Motae i Saulu a mia mowawa sangka mpeteano, ”Butao ponaimu, ka tobo aku, kasi mansa mia anu nahi dompetindi andio mentobo aku ka dompemae-maeakune.” Sine mia anu mowawa sangka mpeteano atuu nahi behe, hangano tedoa doito. Onaemo ka i'alao i Saulu ponai atuu ka ipebangkuako i wawono ponai atuu. 5Ikitao mateomo i Saulu, mia mowawa sangka mpeteano atuu mebangkuako mbo'u i wawo ponai atuu, ka mate ira meronga. 6Kanandiomo teweweuno i Saulu, otolu ira anano, ka mia anu mowawaakono sangka mpeteano, saru luwuno miano memate ira luwu oleo atuu. 7Mansano domengkitao mpolai iramo sorodadu Isaraeli ka i Saulu saru otolu ira anano memate iramo, luwudo to Isaraeli anu mpo'ia i asambalino lembono ka anu i asatowano koro Yarade mpolai mebintao luwuno kotado. Ka do'amba mehawe to Pelisiti mpo'ia i ra'ai.

8Tisomono tempono to Pelisiti me'aiwa lumolohi ira mia mempinepate atuu, domehaweo i Saulu ka otulu ira anano tepombole a mentorukuno Giliboa. 9Domempoleo uluno i Saulu ka melolohio sangka mpeteano. Ka do'amba mpontena mia mempaleleo lele atuu i asa wawo wita Pelisiti, i raha pelahumoaado ka a mpalili. 10Ka i'amba luwuno sangka peteano i Saulu domenaao a raha mpelahumoaado i Asitore ka wata ngkoroino domendoeo a bente kota i Beti-Seani.

11Mansado merongeo palili i Yabesi-Gilea anu wineudo to Pelisiti ndi Saulu, 12mpelungka iramo luwuno mia moroso ntu'u, ka dompelempa asa wongi. Dome'alao wata ngkoroino i Saulu ka luwuno wata ngkoroido anano inso a bente i Beti-Seani. Ka do'amba mpekule i Yabesi ka domentunuo wata ngkoroido i ra'ai. 13Dome'alao wukudo ka domengkaburuo a ntoto ngkeu tamarisika i Yabesi. Umarino atuu, mempuasa ira opitu oleo tehineno.

Currently Selected:

1 Samueli 31: XMZ

Highlight

Copy

Compare