2 PETURU 3
3
Oleo-Do i Ue
3:1-16
1Pepaekompo anu kinekewoi, ndiomo wunta anu ko'orua, anu kuburiakomiu. I larono orua wunta atuu ku'usahao poponto'orimiu anu mentee hangano luwuno pompopoto'ori, 2ka impewowoloo koa pau anu i ndi'upua domempauomo nabi mempori ka impewowoloo parenta-Do i Ue ka Puu Pongkadudui anu domempauomo tinena ndi omiu. 3#Yud. 1:18 Anu lalua asalakono ka imento'orio onaemo, nine a luwuno oleo pokotompaano tempo ira mehawe anu mpopopodeu-deuako pompopodeu-deudo, onaemo luwuno mia anu mentuwu montonda po'eheno aroado. 4Dompotae, ”Isuake dandi mongkona hawe-Do atuu? Hangano umarino domemate ue mpu'uto, luwuakoano kongko mpiha kana amba-ambano, tempono ipinokogagi wawontolino.” 5#Teg. 1:6-9 Dompe'inungakono nahi dobehe mento'orio, nine hangano pau-Do Ue Ala hinaomo langi inso i ndi'upua, ka tolino mbo'u anu tepu'uano inso a uwoi ka hangano uwoi, 6#Teg. 7:21 ka nine hangano uwoi atuu, tolino anu i ndi'upua masolaomo, iropuo lolowi. 7Sine hangano pau koa mbo'u atuu langi ka tolino anu kanandio-andio tepekaria inso a api ka ninaa tiano oleo pobitaraa ka mateado mia mosa'o gaudo. 8#Pud. 90:4 Sine, pepaekompo luwu-luwu anu kinekewoiku, anu aasa andio si mengkolupeo, onaemo, nine i aro-Do i Ue aasa oleo mengkena kana asa nsowu nta'u ka asa nsowu nta'u mengkena kana aasa oleo. 9Ondae i Ue nahi Dotekolupe umihiio dandi-Do, maupo hinao mia anu tumuduo kana tekolupe, sine sabara Ira ndi omiu, hangano po'ehe-Do ka si hina anu mate, tendeano luwuno mia ka dompepokule ntepidi. 10#Mat. 24:43; Luk. 12:39; 1Tes. 5:2; Meng. 16:15 Sine oleo-Do i Ue ta hawe kana anu monako. A oleo atuu langi ta moliu saru ruundu anu mongkokongiri ka luwuno anu hina i wawontolino ta mo'ai a laro langano api, ka tolino ka luwuno anu kongko i wawono ta tetadi moliu. 11Gaagi, tewala luwuakoano andio ta kanandio teweweuno iterawo-rawo, asalakono ka imentuwu tedoa mempori ka mpesomba ntu'u 12onaemo omiu anu mensikorio ka ironga hawe oleo-Do Ue Ala. A oleo atuu langi ta loono a laro api ka luwuno anu hina i wawontolino ta terawo hangano langano. 13#Yes. 65:17; 66:22; Meng. 21:1 Sine menunu saru dandi-Do, tomensikorio langi anu wo'ohu ka tolino anu wo'ohu, po'iangano menteea.
14Onaemo pu'uno, pepaekompo anu kinekewoiku, kontongaano mensikorio luwuno andio, asalakono impeteahako, ka imehinawe nahina tataamiu ka nahina anu mosa'o i aro-Do, a laro pesintuwua saru Ondae. 15Imentuduomo mauru-Do Ueto kana tempomiu mpohawe tekaduduia, kana koa mbo'u i Paulu, pepaekompoto anu kinekewoi, moburiomo ndi omiu montonda ponto'ori mentee anu iwineeako. 16Mongkona atuu iweweuo a laro luwuno wuntano, ba ipepau mongkona luwuno andio. A laro luwuno wuntano atuu hinao ba opia anu motungko itino'ori, ranta mia anu nahi dompokonto'orio ka anu nahi moroso pompe'ala-alano, mewolitekio gagi mateado ondaedo, mengkena kana anu mewineweudo mbo'u a luwuno binuri anu susua.
Pokotompaano
3:17-18
17Sine omiu, pepaekompo anu kinekewoiku, imento'oriomo se'eluno mongkona andio. Onaemo pu'uno impetangkoromo, ka si ntetonda a ntesosaelodo mia anu nahi domponto'ori songka, ka si tetadi pe'iniamiu anu moroso. 18Sine imentuwumo a mpe'aroa ka ponto'orimiu Ondae i Ue ka Puu Pongkaduduito, Ondae i Yesu Kerisituu. Marambaa ndi Ondae, kanandio-andio ka ranta nahina tampulaano.
Currently Selected:
2 PETURU 3: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
