2 KORINTI 7
7
1Pepaekompo anu pinehohawaku, hangano ontae kanandio-andio mehaweo luwuno dandi atuu, aiwamo tompokomemporio koroito inso a luwuno anu kumokoburutio koroi ntolino ka rohani, ka ba kanandio mokobobotolio memporiato doitoako Ira Ue Ala.
Mawongkoa umari mompemasusa
7:2-16
2Imentarima kamimo i laro aroamiu! Nahi kimehori sala mpoweweu maupo a asa mia, nahina maupo te'asa mia anu pinokorugimami, ka nahi kimpo'ungke uramami maupo inso a mia te'asa. 3Kupepau kanandio, komba ndio aku mokonsala komiu, hangano hieno kupauomo, nine ndio komiumo i laro aroamami, ranta ka tompe'asa aroa mentuwu ka memate. 4Kupauo ntu'u a menteeano ndi omiu; sine tedoa mbo'u kupo'undeakomiu. A laro luwuno marasaiamami tetarero aku ntu'u ka tedoa aku ntu'u mo'unde.
5 #
2Kor. 2:13
Tamoako tempono kimehawe i Makedonia, nahina penaa-naano koroimami. I sua-suamo koa mpompembasai kami masusaa: inso i bungkuno pe'u'uaa ka inso i larono doitoa. 6Sine Ondae Ue Ala, anu montarero mia anu me'urumako, Dotarero kamimo haweno i Titu. 7Komba butu hangano haweno, sine hangano mbo'u pontarero anu hinaweno inso ndi omiu. Hangano ipauakamimo mongkona tekewoimiu, pinemasusamiu, bobotolino aroamiu umala-alaakune, onaemo ka itetiangi po'undeku.
8Gaagi maupo kupokomasusaomo aroamiu a wuntaku atuu, sine nahi kupe'o'oleakono. Lano hori aku me'o'oleakono, hangano kukitao, nine wunta atuu mokomasusao aroamiu – maupo kanatuu sarai koa –, 9sine kanandio-andio mo'unde aku, komba hangano mpompemasusa komiumo, tendeano hangano pompemasusamiu weweu komiu ntepidi. Hangano pompemasusamiu atuu onaemo montonda po'ehe-Do Ue Ala, ranta nahina marugimiu maupo tedei hangano omami. 10Hangano pompemasusa montonda po'ehe-Do Ue Ala mompokotepidi anu mowawa tekaduduia ka anu nahi ta pine'o'oleako, sine pompemasusa anu inso i wawontolino andio mowawa matea. 11Hangano impepenteeo tendeano pompemasusa anu montonda po'ehe-Do Ue Ala atuu umanggao ndi omiu pompesu'ui anu langkai, maupo pepokomentee, o'alia, doitoa, tekewoi, anggaa, pohukua! I larono luwuno atuu impopokitaomo, nine nahina salamiu.
12Onaemo pu'uno, tewala kupoburiakomiumo wunta, ka komba hangano mia moweweu anu sala, ke hangano mbo'u mia anu marasaiako poweweu anu sala, tendeano ka igagi mengkaa ndi omiu i aro-Do Ue Ala moputeno aroamiu ndi omami. 13Onaemo pu'uno ka kigagi ntetarero.
Ka umarino pontarero anu hinawemami atuu, laluaopo mbo'u po'undemami hangano po'undeno i Titu, hangano luwumiu mpokorosoakono aroano. 14Kumawongkoakomiu ndi onae, ka komba impokoko'ii aku. Omami wela mpompau hapa anu mentee ndi omiu, kanandio koa mbo'u mawongkomami i arono i Titu mengkaaomo mentee. 15Ka pompehohawano koteti-tetiangino ndi omiu, tewala irambeo pomperorongeakomiu luwu, kana'umpe imentotowoo haweno saru doito ka mpondidi-ndidi. 16Mo'unde aku, hangano kupokomperorohi komiu a luwuakoano.
Currently Selected:
2 KORINTI 7: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
