2 KORINTI 8
8
Pompowee petulungi
8:1-15
1 #
Rom. 15:26
Pepaekompo, kami mempauakomiu mongkona pe'aroa anu domewineeako luwuno bawaa i Makedonia. 2Kontongaado me'inara-arahakoako anu mobea a laro mperupa-rupa marasaia, tedoa ira memawongko ka maupo domemongkokolaro ntu'u, sine mengkaea ira a mpe'aroa. 3Ongkue mesakosii, nine mpompowee iramo montonda pompolido, tendeano lumaloio pompolido. 4A moleono aroa dome'emao ka mpedada ndi omami, ka dompohawe koa mbo'u pompehohawa ka dompo'ala tia a pompekakaakoa mia memempori. 5Ondae mpompowee hadioopo sekono anu pinerorohimami. Dompeweengakono koroido, amba-ambano ndi Ondae Ue Ala, ka i'amba ndi omami mbo'u hangano po'ehe-Do Ue Ala. 6Onaemo pu'uno ka kimedadaio i Titu, ka i'aiwa tepohaweakomiu ka ipoko'umario petulungi atuu ba kana'umpe umariomo ipu'uo. 7Ka kanandio-andio, mengkena kana mengkaea komiu a luwuakoano, – a pompe'ala-ala, a mpau, a ponto'ori, a pontulungi inso i aroa, ka a pompehohawamiu ndi omami – ka ikanandio koa mbo'u imengkaea a pontulungi andio.
8Kupauo mongkona atuu komba kana parenta, tendeano, mopokitao peteahakodo mia susua mpontulungi, aku kumitao menteeno pompehohawamiu. 9Hangano imento'oriomo pompehohawa-Do Ueto i Yesu Kerisituu, nine Ondae, anu hangano omiu gagi mongkokolaro, maupo kaea Ira, ka igagi mengkaea hangano mongkokolaro-Do.
10Onaemo andio pohaweku mongkona anu atuu, anu bara'ura mentudu ndi omiu. Lano asa nta'u anu laloomo impompu'u meweweuo ka mempakosio ka impoko'umario koa. 11Ka kanandio-andio, impoko'umariomo wineweumiu atuu! Moikoano imeweweuo menunu saru pohaweno aroamiu, ka imeweweuomo atuu saru hapa anu hina ndi omiu. 12Hangano tewala inso i aroamiu mompowee, asalakono pompoweemiu ta tinarima, tewala pompoweemiu atuu me'empehiako hapa anu hina ndi omiu, komba me'empehiako hapa anu nahina ndi omiu.
13Hangano mempinopotembi komiu komba ka dompohawe monongkoa mia susua, sine ka ihina koa pengkenaa. 14Ka moikoano kanandio-andio anu torea ndi omiu mokosompoo makurado, ka ilembuino anu torea ndi ondae mokosompoo makuramiu, ka ihina koa pengkenaa. 15#Pel. 16:18 Kana hinao teburi,
”Mia anu mopumpu hadio, nahi ta torea
ka mia anu mopumpu tedei, nahi makura.”
I Titu tinena
8:16-24
16Pontarimakasi ndi Ondae Ue Ala, anu hangano omiu pinoweeako mbo'u mokua anu kanandio i laro aroano i Titu tumulungi komiu. 17Lano itarimao po'emamami, sine a mokuano ntu'u atuu lumakoomo ndi omiu a mpo'eheno aroano onaeno. 18Meronga saru onae kimentenao pepaekompoto, anu inunde-unde a luwuno bawaa hangano po'anggano a pompalelea Lele Mawongkoa. 19Ka komba butu onae atuu! Onae mbo'u domentisoomo luwuno bawaa ta walimami a pompowee pe'aroa andio, anu kimeweweuo pokomaramba-Do i Ue ka gagi tondonino inso i aroamami.
20Hangano kimetangkoroo mongkona andio: nine hinao mia anu mokotata kami mongkona pompowee petulungi anu pinelempaakomami ka anu hasilino langkai andio. 21Hangano omami mpompewowolo anu moiko, komba butu i aro-Do i Ue, sine i arodo mbo'u mia.
22Meronga saru ondae kimentenao mbo'u asa mia susua, onaemo pepaekompoto, anu ba pempiamo kime'arahakono ka mengkaa wela meteahako mompokowali. Ka kanandio-andio tepaheomo meteahako hangano langkaino pompe'ala-alano ndi omiu. 23I Titu onaemo waliku pe'asa mpo'anggaku ndi omiu; pepaekompomami anu mehano atuudo onaemo tinenado luwuno bawaa ka aasa maramba-Do i Kerisituu. 24Onaemo pu'uno impopokitaako iramo i arodo luwuno bawaa pompehohawamiu ka tondonino pompehohawamiu ka tondonino mawongkoku ndi omiu.
Currently Selected:
2 KORINTI 8: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
