2 KORINTI 6
6
I Paulu a laro pompekakaakono
6:1-10
1Gagi wali-wali mpe'asa mpo'angga, kime'emao ntu'u ndi omiu, ka si meweweuo gagi nahi mentudu pompehohawa-Do Ue Ala, anu imentarimaomo. 2#Yes. 49:8 Hangano mepau Ira Ue Ala,
”I tempono Kupemoikoo, Aku merorongeakomu,
ka a oleo Kupongkadudui, Aku tumulungiko.”
Menteeano, tempo andio onaemo tempo pinemoiko atuu; menteeano, oleo andio onaemo oleo pongkaduduia atuu. 3Maupo a laro mongkona hapa nahi kimpompau pu'uno mia ka itetidu, ka si mansa tinata pompekakaakomami. 4Tendeano, a laro luwuakoano kimempopokitao, nine omami puu pompekakaako-Do Ue Ala, onaemo: alaro pompetea anu bukeako sabaraa a laro marasaia, ma'isoa ka masukaraa, 5#Tin. 16:23 monsusuru kona nsepi, a laro torungku ka marisua, a mpe'iseia mo'angga, petangkoromo ka puasa; 6a molinono aroa, ponto'ori, sabaraa, ka pe'aroa; a laro Mpenaa Mempori ka pompehohawa anu nahi po'onde-onde; 7a pompalelea menteea ka pabawa-Do Ue Ala; memparewa mpeteaako moleoa monsapoi ke maupo mo'alaako 8tempono pinelangkai ka tempono pinokongkodei; tempono pinepaukiako ke tempono inunde-unde; tempono tinuluri mompopo'oo, sine pine'ala-ala, 9kana mia anu nahi tino'ori, sine teto'ori; kana mia anu ilawu mate, ka mentee ntu'u mentuwu kami; kana mia anu tinunduhi, sine nahi kimemate; 10kana mia anu mompemasusa, sine memawongko mpiha, kana mia mongkokolaro, sine mompokokaea hadio mia; kana mia anu nahina hapa-hapano, maupo luwuakoano hinao ndi omami.
Si hina mbo'u anu tetosa'aiako lambaha
6:11–7:1
11Hei to Korinti! Mpepau kamimo a menteeano ndi omiu, aroamami te'ungkahi malua ndi omiu. 12Ka omiu hinao po'ianga anu malua i laro aroamami, sine ndi omami butu tepatinda po'ianga anu ma'iso i laro aroamiu. 13Ka kanandio-andio, ka tomambesulo – kupepau kana a luwuno anaku –: Ime'ungkahiomo aroamiu temalua ntu'u! 14Si mengkana tarono anu nahi petoto saru mia anu nahi dompompe'ala-ala. Hangano hapake pengkenano anu hina i olono menteea ka lambaha? Ke kana'umpe mewine mokompe'asa saru wongi-wongi? 15Hapake anu mengkena hinawe i olo-Do i Kerisituu ka i Beliali? Hapake pe'asaado mia mpompe'ala-ala saru mia anu nahi dompompe'ala-ala? 16#Ima. 26:12; Yeh. 37:27; 1Kor. 3:16; 6:19 Hapake penggoeano raha-Do Ue Ala saru lahumoa? Hangano ontae onaemo raha-Do Ue Ala anu tuwu montonda pau-Do Ue Ala andio,
”Aku mo'ia me'asaako ira
ka tuwu i tonga-tongado,
ka Aku gagi Ue Alado,
ka ondae gagi bawaa-Ku.
17 #
Yes. 52:11
Onaemo pu'uno:
Impeluarakomo inso i olodo,
ka impensuaako iramo, pau-Do i Ue,
ka si mpo'angga anu mokoburu,
ka Aku tumarima komiu.
18 #
2Sam. 7:14; 1Taw. 17:13; Yes. 43:6; Yer. 31:9 Ka Aku gagi Amamiu,
ka komiu megagi ana-Ku tama ka ana-Ku beine
ka kandiomo pau-Do i Ue, Anu Tedoa Pabawa.”
Currently Selected:
2 KORINTI 6: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
