2 KORINTI 5
5
1Hangano kimento'orio, nine tewala rinongka kema po'iangato i tolino andio, Dopatindaomo Ue Ala aasa po'iangato i suruga, aasa po'ianga anu nahina tampulaano, anu komba wineweuno kaeno mia. 2Tempono ontae a laro ngkema andio, pompemapari kita, hangano tomengkekewoio mpokonao po'ianga nsuruga i wawono po'iangato anu kanandio-andio, 3hangano ba kanandio mpesangka kita ka nahi tomehinawe kolambe-lambe. 4Hangano tempono da mpo'ia a laro ngkema andio, pompemapari kita hangano mobeano tinembi, hangano ineheto mpokonao sangka anu wo'ohu atuu maupo nahi linohu anu laano, ka iteleo tuwua anu ta mate atuu. 5Sine tendeano Ondae Ue Ala anu patinda kita mongkona anu kanatuu ka anu moweeakita Penaa, gagi pe'inia a luwuakoano anu Dopatindaakitamo.
6Ka onaemo pu'uno ka imoroso mpiha aroamami, maupo kimento'orio, nine tempono kimekongko a ngkoroi andio, da me'olai kami inso ndi Ondae i Ue, 7– hangano tuwumami andio onaemo tuwu hangano pompe'ala-ala, komba hangano mongkita – 8sine aroamami moroso, ka inehemamipo mpelimba inso a ngkoroi andio ka kimpo'ia mpiha ndi Ondae i Ue. 9Onaemo mbo'u pu'uno ka kimpeteahako, moiko kimpo'ia a ngkoroi andio, maupo kimpo'ia i bungkuno, ka Dopemoiko kami. 10#Rom. 14:10 Hangano luwuto asalakono mewinawa mpe'aro a ngkadera pobitaraa-Do i Kerisituu, ka ihaweo sompo mia hapa anu tekona itarimao, menunu saru anu wineweuno a laro ntumuwuno andio, moiko ke maupo mosa'o.
Pompekakaako tiano pesintuwua
5:11-21
11Kimento'orio hapa pengkonaano doitoako Ira i Ue, onaemo pu'uno ka kimpeteahako mokomanasaako ira mia. Ndi Ondae Ue Ala aroamami mengkaa saru mewine ka kuperorohio aroamami mengkaa koa mbo'u kanandio a mpontimbangamiu. 12Mongkona andio komba mpeteahako kami tepohona mbo'u me'unde-undeo koroimami ndi omiu, sine kimpoweeakomiu tempo ka imemawongkoakami, ka impoko'aropi ira mia anu memawongko hangano anu kinita ka komba anu i laro aroa. 13Hangano tewala nahi kimempabawaio koroimami, mongkona atuu onaemo a laro pompekakaako-Do Ue Ala, ka tewala kimempabawaio koroimami, mongkona atuu onaemo moikoamiu. 14Hangano pompehohawa-Do i Kerisituu pabawai kami, hangano kimempokonto'oriomo, nine tewala asa mia mateomo tiado luwuno mia, ka memate iramo luwu. 15Ka Ondae i Kerisituu mate Iramo tiado luwuno mia, ka ondae anu mentuwu, nahi domentuwu mbo'u tiano koroido ondaedo, sine tia-Do, anu mate Iramo ka winangu Iramo hangano ondae.
16Onaemo pu'uno nahi kimengkitao maupo te'asa mia montonda pompewowolono mia. Ka tewala hori kami kumita Ira i Kerisituu montonda pompewowolono mia, kanandio-andio nami kimengkita Ira mbo'u kanatuu. 17Gaagi isema anu kongko ndi Ondae i Kerisituu, onae pinokogagi wo'ohu: anu tehine telaloomo, menteeano anu wo'ohu haweomo. 18Ka luwuno andio inso ndi Ondae Ue Ala, anu mesala ndi Ondae i Kerisituu mpesintuwu kitamo saru Ondae ka anu meweengakonomo pekakaakoano pesintuwua atuu ndi omami. 19Hangano Ondae Ue Ala mokosintuwuo wawontolino saru koroi-Do hangano Ondae i Kerisituu ka nahi Dopototoiako ira halado. Lele pesintuwua atuu Dopeweengakonomo ndi omami.
20Gaagi omami andio onaemo tinena-Do i Kerisituu, kana Ondae Ue Ala patudu komiu mesala ndi omami; a nee-Do i Kerisituu kime'emao ndi omiu: imesintuwumo saru Ondae Ue Ala. 21Ondae anu nahi Dotehala Doweweu Iramo gagi hala hangano ontae, ka tomempinokomentee ndi Ondae hangano Ondae Ue Ala.
Currently Selected:
2 KORINTI 5: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
