2 KORINTI 4
4
Arataa rohani a laro bolusa wita
4:1-15
1Hangano pe'aroa-Do Ue Ala kimentarimaomo anggaa andio. Onaemo pu'uno nahi motewe aroamami. 2Sine nahi kimentarimao luwuno wineweu tewuni anu mompokoko'ii; nahi kimpompopo'oo ka nahi kimebalio pau-Do Ue Ala. Tendeano kimpokomengkaao menteea ka hangano kanandio kimpeweengakono koroimami ka domentimbangao luwuno mia i aro-Do Ue Ala. 3Tewala Lele Mawongkoa anu pinalelemami da tetutuwi mbo'u, ka onae tetutuwi ndi ondae, anu ira memate, 4onaemo mia anu nahi dompompe'ala-ala, anu pinewowolodo dompokomorawuomo pinesombai susua tempo andio, onaemo ka nahi domengkitao wantano Lele Mawongkoa mongkona maramba-Do i Kerisituu, anu onaemo gambara-Do Ue Ala. 5Hangano komba koroimami anu pinalelemami, sine Ondae i Yesu Kerisituu anu Ue, ka koroimami gagi atamiu hangano po'ehe-Do i Yesu. 6#Teg. 1:3 Hangano Ondae Ue Ala anu mepau Iramo, ”Inso a laro wongi-wongi ta saaba mewine!”, Ondae koa mbo'u anu weweuo mewine-Do ka imewanta i laro aroato, ka tompohawe mewine inso a ponto'ori mongkona maramba-Do Ue Ala anu tengkita a rupa-Do i Kerisituu.
7Sine arataamami andio a laro bolusa wita pulu, ka imengkaa, nine roso anu langkai ntu'u atuu inso ndi Ondae Ue Ala, komba inso ndi omami. 8A luwuakoano pinokonsii kami sine nahi kinte'asi; mentedungku kami, sine mpompe'osai kami mpiha; 9mebinobarasai kami, sine nahi kimebininta, mempinepasiako kami, sine nahi kimemate. 10Kimewawao mpiha mate-Do i Yesu a laro ngkoroimami, ka igagi mengkaa mbo'u tuwu-Do i Yesu a ngkoroimami. 11Hangano omami anu da mentuwu andio, wela kami mempineweengako a matea hangano Ondae i Yesu, ka igagi mbo'u mengkaa tuwu-Do i Yesu a ngkoroimami anu ta mate andio. 12Ka kanandiomo matea mo'angga a ngkoroimami ka tuwua mo'angga ndi omiu.
13 #
Pud. 116:10
Sine hangano ndi omami hinao Penaa pompe'ala-ala anu mengkena, kana hinao teburi, ”Kupe'ala-alao, onaemo pu'uno ka kupepau”, ka omami mbo'u mpompe'ala-ala onaemo mbo'u pu'uno ka kimpepau. 14Hangano kimento'orio, nine Ondae, anu wangu Iramo Ue Yesu, Ira koa mbo'u wangu kami meronga saru Ondae i Yesu. Ka Ira wawa kami mpe'aro ndi Ondae meronga saru omiu. 15Nde ka igagi luwuno atuu hangano omiu, ka ikolangka-langkaino pompehohawa hangano kohadi-hadiono mia anu mpompe'ala-ala, onaemo ka ikohadi-hadiono anu umunde-undeo maramba-Do Ue Ala.
Si motewe aroa, maupo mbo'u tempono mo'aropi matea
4:16–5:10
16Onaemo pu'uno ka nahi motewe aroamami, sine maupo koroi ntolinomami komara-marasaino, sine aroamami pinokowo'ohu sompo oleo. 17Hangano marasaia anu monongko kanandio-andio, mo'anggaakami marambaa anu nahina tampulaano anu lumaloio luwuakoano, laluaopo langkai sekono marasaimami. 18Hangano nahi kimperioo anu tengkita, tendeano anu nahi tengkita, hangano anu tengkita sarai koa, sine anu nahi tengkita nahina tampulaano.
Currently Selected:
2 KORINTI 4: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
