2 KORINTI 2
2
1Kupakosiomo i laro aroaku, nine nahi aku aiwa mbo'u ndi omiu a laro masusaa. 2Hangano, tewala kupokomasusao aroamiu, isema mbo'u anu mokomawongko aku ba nahi onae anu mompemasusa hangano ongkue. 3Ka onaemo tinoono wuntaku andio, onaemo tewala hawe aku, ka si kupompemasusa hangano ondae, anu asalakono mpokomawongko aku. Hangano kupe'ala-ala komiu luwu, nine po'undeku onaemo mbo'u po'undemiu. 4Kupoburiakomiu wunta saru aroa anu tedoa salalaro ka mompema'iso saru hadio uwoi mataku nte'i'iti, komba ka imasusa aroamiu, sine ka imento'orio tedoa langkai pompehohawaku ndi omiu luwu.
Asalakono inampuni mia anu sala
2:5-11
5Sine tewala hinao mia anu mompokomasusa, ka komba aroaku anu pinokomasusano, tendeano aroamiu luwu, ke ba naahi – ka si lalo pauku –, aroado ba opia mia i olomiu. 6A mia anu kanandio sompoomo pongkuahako inso a asa ntia langkai ndi omiu, 7onaemo omiu tendeano ka ime'ampunio ka imentareroo, ka si mate hangano tedoa masusa aroano. 8Onaemo pu'uno ka kupauakomiu, ka impehohawao koa ntu'u. 9Hangano onaemo tinoono ka kupoburi wunta ndi omiu, onaemo umarahako komiu, ba mpetenunu komiu koa a luwuakoano. 10Hangano ba isema anu inampunimiu salano, ku'ampunio koa mbo'u. Hangano tewala ku'ampunio, – ba hinao anu asalakono ka ku'ampunio –, ka mongkona atuu kuweweuo hangano omiu i aro-Do i Kerisituu, 11ka si me'ura i Mosa'o ndi ontae, hangano tomento'orio tinoono.
Salalaro ka sanaano i Paulu i kota Toroasi ka i Makedonia
2:12-17
12 #
Tin. 20:1
Tempono kuhawe i Toroasi paleleo Lele Mawongkoa-Do i Kerisituu, kuhaweo nine Do'ungkahiomo i Ue sala a mpo'anggaa i ra'ai. 13Sine nahi rodo aroaku, hangano nahi kutepohaweakono pepaekompoku i Titu. Onaemo pu'uno ka kupetompa ka melungka lumako i Makedonia.
14Sine tarimakasi ndi Ondae Ue Ala, anu wela wawa kami a nsala poponangia-Do ndi Ondae i Kerisituu. Ka mesala ndi omami Dopaleleo i sua-suamo koa mana mo'ahino tumo'ori Ira. 15Hangano ndi Ondae Ue Ala omami onaemo woo anu mana mo'ahi inso ndi Ondae i Kerisituu i tonga-tongado anu mengkinadudui ka i olodo anu memate. 16A anu pokotompa omami onaemo woono matea anu mompepate ka a anu amba-ambano woono tuwua anu mompotuwu. Sine isemake anu polio umanggao anggaa anu kanandio? 17Hangano nahi kimpengkena saru hadio mia susua anu mpo'ungke urado inso a mpau-Do Ue Ala. Tendeano ndi Ondae i Kerisituu kimempauo a menteeano saru luwuno tinoo anu molino a mpetena-Do Ue Ala ka i aro-Do.
Currently Selected:
2 KORINTI 2: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
