2 KORINTI 1
1
Tabea
1:1-2
1 #
Tin. 18:1
Inso ndi Paulu, anu hangano po'ehe-Do Ue Ala gagi tinena-Do i Kerisituu Yesu, ka inso ndi Timotiu pepaekompoto, hawe a bawaa-Do Ue Ala i Korinti saru luwuno mia mempori i asa wawo wita Akaya.
2Pompehohawa ka rodoa inso ndi Ondae Ue Ala, Amato, ka inso ndi Ondae Ue Yesu Kerisituu kumongkomi komiu.
Pontarimakasi
1:3-11
3Inunde-unde Iramo Ue Ala, Ama-Do Ueto i Yesu Kerisituu, Ama anu buke pompehohawa ka Ondae Ue Ala pu'uno luwuno pontarero, 4anu tumarero kami a luwuno marasaiamami, onaemo ka kipolio tumareroako ira pontarero anu tinarimamami inso ndi Ondae Ue Ala, anu mekongko a laro mperupa-rupa marasaia. 5Hangano mengkena kana omami mohawe tia hadio ntu'u a ntebobarasai-Do i Kerisituu, kanandio koa mbo'u hangano Ondae i Kerisituu montarima kami pontarero hadio ntu'u. 6Tewala marasai kami, onaemo gagi pontarero ka tekaduduimiu; tewala tinarero kami, onaemo atuu pontareromiu, ranta ka impohawe roso ka imensabara marasaiako tebobarasaia anu mengkena kana anu pinembasaimami koa mbo'u. 7Ka pomperorohimami mongkona omiu moroso, hangano kito'orio, nine mengkena kana omiu mpo'ala komiu tia a ntebobarasaimami, mpo'ala komiu koa mbo'u tia a pontareromami. 8#1Kor. 15:32 Hangano inehemami, luwumiu pepaekompo, ka imento'orio marasaia anu pinembasaimami i wita Asia Kodei. Tembia anu kipinopotembiako tedoa langkai ka tedoa mobea, ranta nami hina pompe'osaia da kami tuwu. 9Tendeano kana hinuku mate kamimo. Sine ka igagi kanatuu, ka si kipe'ala-alao koroimami, sine butu ndi Ondae Ue Ala anu wangu ira mia memate. 10Inso a matea anu tedoa mongkokongiri Dokadudui kamimo ka Ira kumadudui kami: ndi Ondae kipomperorohi, nine Ira kumadudui kami mbo'u, 11hangano imentulungi kami koa mbo'u mpekakaiakami, ka ihadio mia montarimakasi a pompowee anu hinawemami nde mararu dompekakaiakami.
Tebalino sinongkano i Paulu
1:12–2:4
12Ndiomo anu kipo'undeako, onaemo nine i laro aroamami mesakosii ndi omami, nine tuwumami i wawontolino andio, tamoako a mpenggoeamami saru omiu, ipabawaio moleoa ka memporia inso ndi Ondae Ue Ala komba hangano ponto'ori ntolino, sine hangano rosono pompehohawa-Do Ue Ala. 13Hangano omami butu buriakomiu hapa anu pinokobasa ka pinokonto'orimiu. Ka kuperorohio, ka impokonto'oriomo luwu, 14kana anu impokonto'oriomo asa ntiano inso ndi omami, onaemo nine a oleo-Do Ue Yesu komiu mpo'undeakami kana koa mbo'u omami kami mo'undeakomiu.
15Me'empehiako pompe'ala-ala andio hori aku mosongka aku tepohaweakomiu se'elu, ka impontarima pe'aroa anu kompenduano. 16#Tin. 19:21 Ka ku'amba motilaloakono pelempaaku lumako i Makedonia, ka i'amba inso i Makedonia mekule mbo'u ndi omiu, ka imentulungi aku a laro pelempaaku lumako i Yudea. 17Gaagi, momperuanahike i larono kusongka kanandio? Ke sinongkaku atuu montonda po'eheku ongkueku, ranta ndi ongkue meronga hinawe ”humbee” ka ”naahi”? 18A nee-Do Ue Ala anu nahi bali pe'aroa-Do, dandimami ndi omiu komba meronga ”humbee” ka ”naahi”. 19#Tin. 18:5 Hangano Ondae i Yesu Kerisituu, Ana-Do Ue Ala, anu kimempaleleomo i tonga-tongamiu, onaemo ongkue ka i Siliwanu ka i Timotiu, komba ”humbee” ka ”naahi”, sine tendeano ndi Ondae butu hinao ”humbee.” 20Hangano Ondae i Kerisituu onaemo ”humbee” a luwuno dandi-Do Ue Ala. Onaemo pu'uno hangano Ondae ka tompotae ”Ami” melangkai Ira Ue Ala. 21Hangano Ondaemo anu mokoroso kami saru omiu ndi Ondae i Kerisituu, onaemo Ondae Ue Ala anu mo'urapi Iramo, 22tumondoniakono pontondoni-Do ndi ontae ka anu moweeakita Penaa Mempori i laro aroato gagi pe'inia inso a luwuno anu pinatindaomo tiato. 23Sine mebooli aku ndi Ondae Ue Ala gagi sakosiiku – Doto'ori aku –, nine pu'uno ka nahi ku'aiwa i Korinti onaemo ka kupehohawa komiu. 24Komba hangano kami mpetena hapa anu asalakono impe'ala-alao, nde mpentade komiu moroso a pompe'ala-alamiu. Tendeano, kami mpopokowali mpo'angga tiano mawongkoamiu.
Currently Selected:
2 KORINTI 1: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
