1 KORINTI 16
16
Pontulungi tiado bawaa i Yerusale
16:1-4
1 #
Rom. 15:25-26
Mongkona popumpua doi tiado mia memempori, po'ineeomo ka impoweweu menunu saru luwuno pontiso anu kuweeako ira luwuno bawaa i Galatia. 2A oleo amba-ambano sompo-sompo minggu po'ineeomo omiu singge mia – menunu saru hapa anu hinawemiu – impompesusua hinawemiu ka imenaao i raha, ka si amba mpopumpu, ba hawe akumo. 3Tewala hawe akumo, aku tumena ira mia, anu mempine'ala-alamiu, melako i Yerusale mpowawa wunta ka dompohaweo pompoweemiu. 4Tewala mengkaa kinere ka kulako mbo'u, asalakono ira melako mperonga saru ongkue.
Sinongkano i Paulu
16:5-9
5 #
Tin. 19:21
Aku koa aiwa ndi omiu, umariku lumaloo Makedonia, hangano aku koa lumaloo Makedonia. 6Ka i Korinti bara'ura aku mo'ia saru omiu ba te'opia tehineno ke bara'ura aku mo'ia i larono tempo morini, ka impokotulungi aku motilaloakono pelempaaku. 7Hangano kanandio-andio nahi kubehe butu telalo sarai kumita komiu. Momperorohi aku ka kupokompo'ia tehi-tehine saru omiu, tewala Dope'eheo koa i Ue. 8#Ima. 23:15-21; Win. 16:9-11 #Tin. 19:8-10 Sine aku mo'ia i Epesu hawe oleo langkai Pentakosotaa, 9hangano i ndi'ai hadio tempoku umanggao anggaa anu langkai ka mentudu, maupo hadio anu umewaio.
Ba opia pompopoto'ori
16:10-18
10 #
1Kor. 4:17
Tewala hawe i Timotiu ndi omiu, impesu'uio ka si doito mo'ia i olomiu, hangano onae umanggao anggaa-Do i Ue, mengkena kana ongkue. 11Gaagi, si hina mia anu me'uru-uruo! Sine imentulungio, ka ipotilaloakono pelempaano temoiko, ka iwali hawe ndi ongkue, hangano ongkue i ndi'ai sumikorio haweano mperonga saru pepaekompo anu mehano. 12Mongkona pepaekompo i Apolo: mararuomo kudadaio ka iperongaako ira pepaekompo mehano aiwa tepohaweakomiu, sine nahi behe ntu'u aiwa kanandio-andio. Tewala hinao tempo moiko te'upua, ta koa aiwa.
13Impetangkoromo! Impentademo temoroso a pompe'ala-ala! Imemosia koa! Ka moroso mpiha! 14Ime'anggaomo luwuno anggaamiu a laro pompehohawa! 15#1Kor. 1:16 Hinao mbo'u aasa inema ndi omiu, pepaekompo. Imento'orio, nine i Setepanu ka somborino ondaemo mia anu amba-ambano ntepidi i Akaya, ka nine dompeweengakonomo koroido mpekakaako ira mia mempori. 16Onaemo pu'uno imperorongeako ira mia anu kanandio ka sompo mia anu metonda mo'angga ka me'isei. 17Mawongko aroaku hawedo i Setepanu, i Porotunatu ka i Akaiku, hangano ondae mpokosompoo hapa anu da makura ndi omiu; 18hangano dompokosanaao aroaku ka aroamiu. Imentudu ira mia anu kanandio!
Tabea
16:19-24
19 #
Tin. 18:2
Tabea ndi omiu inso a luwuno bawaa i Asia Kodei. I Akiwila, i Perisikila ka Bawaa i rahado mpo'oliwi tabea hadio ntu'u ndi omiu. 20Tabeado luwuno pepaekompo ndi omiu. Imambe pohaweako tabea saru pewoo-woo mempori. 21Kaeku ongkueku burio andio: Tabea inso ndi Paulu.
22Isema nahi kekewoi Ira i Ue, tetotonaaomo. Maranata!
23Pompehohawa-Do Ue Yesu kumongkomi komiu.
24Pompehohawaku kumongkomi komiu luwu a ntepo'asaa ndi Ondae i Kerisituu Yesu.
Currently Selected:
1 KORINTI 16: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
