2 Tawarika 14
14
1Ka i'amba i Abia mohawe penaa-naaano meronga uempu'uno ka onae kinaburu i kota Daudi. I Asa, anano, gagi mokole umeuo. I tempo poparentaano wita atuu rodo i larono hopulu nta'u.
Ponangino mokole Asa ndi Sera
14:2-15
(1Mok. 15:9-12)
2I Asa moweweu hapa anu moiko ka mentee a pongkita-Do i Ue, Ue Alano. 3Itadio luwuno meda pontunua pesomba susua ka luwuno po'ianga pesombaa, ipuroo luwuno tugu lahumoa, ka merawo-rawoo luwuno karuno lahumoa. 4Iparenta ira to Yehuda ka do'ungke Ira i Ue, Ue Alano uempu'udo, ka mpetuundu a songka ka parenta. 5Itadio luwuno po'ianga pesombaa ka luwuno pontunua dupa inso a luwuno kota i Yehuda. Poparentaa rodo i tempono poparentano. 6Iwanguo luwuno kota mebente i Yehuda, hangano i wita atuu rodo. Nahina anu meteaakono a luwuno ta'u atuu, hangano Ondae i Ue moweeakono rodoa. 7Ipotae a nto Yehuda, ”Aiwamo tompokorosoo luwuno kota andio ka lumimbuakono rere watu, luwuno menara, pewowa, ka luwuno lansono. Wita andio da a laro ngkaeto, hangano tome'ungke Ira Ue Alato ka Ondae umungke kita saru moweeakita rodoa a luwuno witato.” Domewanguo ka gagi. 8I Asa hinao bawaa sorodaduno inso i Yehuda tolu etu nsowu mia hadiono anu mpowawa kanta langkai ka kansai, ka inso i Benami rua etu ka halo pulu nsowu mia hadiono anu mpowawa kanta kodei ka mpompadii pana. Luwudo sorodadu anu moroso ka mosia.
9I Sera, to Etiopia lumako sumapoiako ira sorodadu asa juta mia hadiono ka tolu etu kareta. Onae hawe i Maresa. 10I Asa meluarako umaropio. Dome'atorao baresi mpeteado a lembono Sepata umpeda Maresa. 11I Asa mebooli ndi Ondae i Ue, Ue Alano, ”Oo Ue, sangkadio Omiu nahina anu mokontulungio anu molema mo'aropi anu moroso. Itulungi kamimo oo Ue, Ue Alamami, hangano ndi Omiumo kimpomperorohi ka a laro nee-Miu kami melako umewaio bawaano sorodadu anu langkai andio. Oo Ue, Omiumo Ue Alamami, si po'ineeo maupo te'asa mia hinao rosono ta umewai Komiu!” 12Ondae i Ue mokontenangi ira to Etiopia i arono i Asa ka to Yehuda. Luwuno to Etiopia atuu mpolai, 13sine i Asa meronga sorodaduno lumulu ira hawe i Gerari. Inso i olodo to Etiopia atuu hadio ntu'u anu mate, ranta nahina anu mo'ia tuwu, hangano meropu ira i aro-Do i Ue ka sorodaduno. Luwuno to Yehuda mpowawa pinomuru anu hadio ntu'u. 14Domenangio luwuno kota petengi-tengino Gerari, hangano dumoitoako Ira i Ue umaluo palilino. Dompomuruo luwuno kota atuu, hangano hadio pinomuru i ra'ai. 15Luwuno kemado anu mpope'ue pinotuwu dompoko'alao mbo'u, ka hadio bawaano bembe bimba ka unta domewawao gagi pinomuru. Ka do'amba mpekule i Yerusale.
Currently Selected:
2 Tawarika 14: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
