2 Tawarika 13
13
Mokole Abia
13:1–14:1
1A nta'u kohopulu ka oalu poparentaano mokole Yerobea, i Abia gagi mokole i Yehuda. 2Otolu nta'u tehineno ipoparenta i Yerusale. Neeno ineno i Mikaya, anano i Urieli inso i Gibea. Hinao peteaa olono i Abia ka i Yerobea. 3Saru sorodadu petea anu moroso ka mosia, pato etu nsowu mia bininiki, i Abia pu'uo peteaa, sekono i Yerobea mo'atora baresi mpeteano umewaio saru halu etu nsowu mia bininiki, anu moroso ka mosia. 4I Abia mentade i wawo ntorukuno Semaraimi, anu tewinso mentorukuno Eparai, ka ipotae, ”Imeronge akumo, Yerobea ka luwuno Isaraeli! 5Nahi imento'orio ke nine Ondae Ue Alano i Isaraeli meweengakono pabawa poparentaa i Isaraeli ndi Daudi ka a luwuno anano ranta nahina tampulaano saru asa pedandia ohia? 6Sine, i Yerobea anano i Nebati, atano i Salomo anano i Daudi, mentadeomo umewaio ueno. 7Luwuno mia mpelakopi ka mia lambaha, ntepo'asa saru onae. Moroso irapo sekono i Rehabea anano i Salomo, anu da mongura ka napi moroso aroano, saru nahi polio umaropi ira. 8Kanandio-andio impewowoloo nine komiu mempolio umaropio poparentaa-Do i Ue, anu a laro ngkaeno inuleno i Daudi, hangano mehadio komiu ka kongko ndi omiu anano sapi wulaa anu wineweuno i Yerobea gagi pesombaamiu. 9Kombake imeliahako iramo sando pesomba-Do i Ue, luwuno anano i Haruni atuu, ka luwuno to Lewi, ka i'amba mpopotoro sando mpesomba montonda gaudo mia i wita susua, ranta sompo mia anu aiwa kai pinokomempori mowawa asa sapi laki mongura ka opitu bimba laki, onae ta gagi sando mpesomba tiano anu susua komba Ondae Ue Ala. 10Sine ndi omami, Ondaemo i Ue, Ue Alamami ka nahi kimebinta Ira. Luwuno sando mpesomba anu mpekakaako Ira i Ue, onaemo luwuno anano i Haruni, sekono to Lewi a mpo'anggaado. 11Sompo mo'oru ka ngkiniwia to Lewi mpontunuako Ira i Ue pesomba tinunu ka dupa mo'ahi, mpopotuda roti pesomba a wawo meda anu morina ka me'atorao hulu mekaru inso a wulaa saru luwuno huluno ka ipinolanga sompo ngkiniwia. Menteeano, omami anu mpekakaakono anu asalakono kami meweweuo ndi Ondae i Ue, Ue Alamami, sine omiu mebinta Ira. 12Kitaomo, Ondae Ue Ala saru omami gagi petewawa. Luwuno sando mpesomba-Do tetinda mpopuuri petondoni sumapoi komiu saru napiri luwuno petondoni. Oo, to isaraeli, si mpetea umewai Ira i Ue, Ue Alado uempu'umiu, hangano nahi komiu mponangi!”
13Sine i Yerobea parenta ira asa bawaa sorodadu pontowoki melimbuo ka mensapoi ira inso i bungkudo, ranta sorodaduno mo'ia i arono Yehuda ka luwuno sorodadu pontowoki i bungkudo. 14Mansano to Yehuda mpewolili i bungkudo, mengkaa ondae asalakono mpo'aropi peteaa inso i arodo ka inso i bungkudo. Ka do'amba mpebooli ndi Ondae i Ue. Luwuno sando mpesomba mempuurio napiri, 15ka luwuno to Yehuda mpebooliako hio mpetea. I tempono to Yehuda atuu mpebooliako hio mpetea, Ondae Ue Ala mokontenangio i Yerobea ka luwuno to Isaraeli i arono i Abia ka Yehuda. 16To Isaraeli mpolai inso i arodo to Yehuda, sine Ondae Ue Ala meweengako ira a ngkaedo to Yehuda. 17I Abia ka sorodaduno numangi ira. Inso i olodo to Isaraeli memate ira lima etu nsowu mia bininiki. 18Kanandiomo to Isaraeli domeninangi i tempo atuu, sekono to Yehuda gagi moroso, hangano ondae mpomperorohi ndi Ondae i Ue, Ue Alano uempu'udo. 19I Abia lumuluo i Yerobea ka ipongko'alao luwuno kota inso ndi onae: Beteli saru luwuno kota kodeino, Yesana saru luwuno kota kodeino, ka Eperoni luwuno kota kodeino. 20I Yerobea nahi hori mbo'u mohawe roso i tempono i Abia. Onae Dosepio i Ue ranta kai mate.
21I Abia mokorosoo koroino. Onae mo'ala hopulu ka opaa kombiano ka hinao rua pulu ka orua ana ntamano ka hopulu ka onoo anano beine. 22Anu susuano inso a nteweweuno i Abia, luwuno peleluno ka petenano, teburi a laro wunta teweweuno nabi Ido.
Currently Selected:
2 Tawarika 13: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
