2 Tawarika 15
15
Pedandia saru Ondae i Ue ipokowo'ohuo i Asa
15:1-19
(1Mok. 15:13-15)
1I Asaria anano i Odedi ipewinsokio penaa-Do Ue Ala. 2Onae lumako tepohaweakono i Asa, ka ipotae ndi onae, ”Ronge akumo, omue Asa saru luwuno Yehuda ka Benami! Ondae i Ue saru omiu tewala omiu saru Ondae. Tewala ime'ungke Ira, Dopemoikoo intepohaweako Ira, sine tewala imebinta Ira, Ira binta komiu. 3To Isaraeli tehineomo ntu'u nahina Ue Alado anu mentee, nahina sando mpesomba anu mompaguru, ka nahina songka. 4Sine a laro masukaraa mpepokule ira ndi Ondae i Ue, Ue Alano i Isaraeli. Dome'ungke Ira i Ue ka Dopemoikoo dontepohaweako Ira. 5I tempo atuu mia nahi pokolako ka mekule tuwu, hangano hinao marisua langkai i olodo palili a luwuno wita. 6Tongku rumopuo tongku, kota rumopuo kota, hangano Ondae Ue Ala mokomarisuako ira mperupa-rupa masukaraa. 7Sine omiu andio, pokorosoomo aroamiu, si memolema, hangano hinao tambono anu hapa anu wineweumiu!”
8Mansano rumongeo i Asa pau andio ka pe'oliwi-Do i Ue ndi nabi Asaria anano i Odedi atuu, ipokorosoo aroano ka itadio luwuno pinesombai mokoburua inso a luwuno wita Yehuda ka Benami, ka inso a luwuno kota anu pinongko'alano i mentorukuno Eparai. Ipokomoikoo meda pontunua pesomba ndi Ondae i Ue anu kongko i arono bolongko Raha Mempori-Do i Ue. 9Ipumpuo luwuno Yehuda ka Benami, ka luwuno mia inso i Eperai, Manase ka Simeoni anu mpo'ia i olodo gagi mia mehawe. Hangano inso i Isaraeli hadio anu me'asambaliako me'alaako ndi onae tempono domengkitao nine Ondae i Ue, Ue Alano, kumongkomio. 10Mpepumpu ira i Yerusale ia wula ko'otolu, ta'u kohopulu ka olima poparentaano i Asa. 11Ia oleo atuu mpopesombaako ira ndi Ondae i Ue pitu etu sapi ka pitu nsowu inso a asa bawaa bembe bimba anu mpinomuru winawado mpekule. 12Ondae mpetonda saru tompaano aroado ka sumangado a laro pedandia umungke Ira i Ue, Ue Alano uempu'udo. 13Sompo mia anu nahi ungke Ira i Ue, Ue Alano i Isaraeli, moiko nana'ote maupo mia sompoomo tinuwuno, moiko tama maupo beine, asalakono hinuku mate. 14Mpesumpa ira ndi Ondae i Ue suarado meroku ka mpebooli mpo'unde, saru puurio napiri ka tawuwua. 15Luwuno Yehuda memawongkoakono sumpa atuu, hangano tompaanomo aroado dompesumpa. Ka i'amba saru pompo'asa aroa anu bobotoli do'ungke Ira i Ue. Ondae i Ue memoikoo dontepohaweako Ira ka moweeako ira rodoa ndi ondae i suamo koa. 16Tendeano i mokole Asa mokompenaa-naao i Ma'aka, ueno beine inso a mpotorono gagi inedo mokole, hangano ueno beine moweweu tinaha Asera anu minokoburuako. I Asa mobangkuo tinaha anu minokoburuako atuu, umisao ranta kai motutu ka tumunuo i koro Kidironi. 17Maupo luwuno po'ianga pesombaa nahi rongkao i Isaraeli, sine i Asa moleo mpiha aroano asa ntinuwuno. 18Iwawao a raha-Do Ue Ala luwuno pesomba memporino amano ka luwuno pesomba memporino onaeno, onaemo wulaa ka salaka saru luwuno sangka susua. 19Nahina peteaa hawe a nta'u kotolu pulu ka olima poparentaano i Asa.
Currently Selected:
2 Tawarika 15: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
