1 TIMOTIU 5
5
Mongkona luwuno pepaekompo pe'asa pompe'ala-ala
5:1-2
1Si tekuda a mia anu mota'u, tendeano kuahakono kana ama. Kuahako ira mia memongura kana pepaekompomu, 2luwuno beine memota'u kana ine ka luwuno beine memongura kana uaimu nahina po'onde-onde.
Mongkona tuwu beine
5:3-16
3Pelangkai ira tuwu beine anu mentee ntu'u tuwu beine. 4Sine tewala aasa tuwu beine hinao anano ke ana'ueno, moikoano ondae atuu amba-ambano ka dompepaguru mpompekakaako a mpe'asa rahado ka mensuloo moikodo mia mota'u ka uedo, hangano onaemo anu pinemoiko-Do Ue Ala. 5Sekono aasa tuwu beine anu mentee ntu'u tuwu beine, anu bininta asa-asano, momperorohi ndi Ondae Ue Ala ka mokua mo'ema ka mekakai meene wongi. 6Sine aasa tuwu beine anu tuwu mare'e ka laloomo lahi, mateomo tempono da ituwu. 7Popoto'oriako ira koa mbo'u tuwu beine atuudo mongkona luwuno andio ka domentuwu nahina tataado. 8Sine tewala hinao te'asa mia anu nahi pekakaako ira pe'etuno, tamoako pe'asa rahano, mia atuu mepoura ka mosa'oopo sekono mia anu nahina pompe'ala-alano.
9Anu mebinuri gagi tuwu beine, butu ondae anu nahi makura inso nomopulu nta'u tinuwudo, anu pohona koa ipekombia 10ka anu mengkaa mo'anggaomo anu moiko, kana mompekaria ana, ineheno metotoka, mowo'ohi karudo pepaekompo pe'asa pompe'ala-ala, montulungi mia anu laro pompema'isoa – owowaano ondae anu mempakeomo luwuno tempo mpoweweu moiko. 11Siimo buri ira tuwu beine anu da memongura. Hangano tewala tepohona koa ira mingki mpewowali anu monsia ira inso ndi Ondae i Kerisituu, ondae atuu mingki mpekombia 12ka saru mehapuo petenunudo anu amba-ambano ndi Ondae, dompowawaakono hukuno koroido. 13Tamoako mbo'u pewinso mpeluarako a rahado mia, mpepokoleleo mpeluweki ka komba butu mpeluwekimo koa, sine meme'ase mbo'u ka mensalo-saloo wineweuado mia susua ka mempau ira anu nahi tekona ipinau. 14Onaemo pu'uno ineheku tuwu beine anu da memongura ka dompekombia mbo'u, mpe'ana, mosongka a laro nsomborino ka si mpompauako tarono pu'uno mokomosa'oo neeto. 15Hangano ba opia ira tuwu beine mepansia iramo mentondao i Mosa'o. 16Tewala aasa tama ke beine anu mompe'ala-ala hinao pe'etuno anu tuwu beine, ka itulungi ira ka si domegagi to'oriado bawaa. Hangano kanandio ondae anu mentee ntu'u mentuwu beine ntetulungi ira inso a bawaa.
Ba opia pontiso ka patudu mbo'u
5:17–6:2a
17Luwuno penatua anu moiko ipetewawa tekona ipinelangkai meluka mpendua, tamoako ondae anu mpe'isei mpontutulu ka mpompaguru. 18#Win. 25:4; Mat. 10:10; Luk. 10:7 Kombake pinau a Wunta Mempori, ”Si ponguo ngusuno sapi anu kontongaano monsesa,” ka mbo'u ”mia mo'angga tekona ipohawe tambono.” 19#Win. 17:6; 19:15 Si tarimao petuluri a aasa penatua sangkadio tewala ipokorosoo orua ke otolu mia sakosii. 20Ondae anu mpoweweu hala asalakono kuahako ira i arodo luwuno mia ka domedoito koa anu susua. 21I aro-Do Ue Ala ka i Kerisituu ka luwuno mala'eka bininiki-Do ku'oliwiko ntu'u: pe'ihilaroomo pontiso andio si danggara ka weweuomo luwuakoano si po'ala-alaako. 22Si madara komedampoakono kaemu a asa mia ka si tetonda a halado mia susua. Dagaio koa memporino koroimu.
23Si koa mbo'u butu mo'inu uwoi, tendeano tiangiakonomo anggoro tedei, hangano kompomu nahi madoo ka koroimu mararu imolema.
24Halado ba opia mia mengkaa, kana ipese'elungi ira a mpobitaraa, sine halado ba opia mia mbo'u lembuino ka i'amba gagi mengkaa. 25Kanandio koa mbo'u wineweu moiko atuu ronga mengkaa ka tewala komba kanandio, nahi ta mokompo'ia mpiha tewuni.
Currently Selected:
1 TIMOTIU 5: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
