1 TIMOTIU 4
4
Anggaano i Timotiu umaropio pompaguru mompopo'oo
4:1-16
1Sine manasa Dopauo Penaa nine a tempo-tempo lembuino, hinao mia anu ta mepoura ka i'amba tumonda ira penaa mompopo'oo ka pompagurudo onitu 2hangano pompopo'oodo anu mpompau pegaupi anu aroa mewinedo mpetondoniako tondonido. 3Ondae atuu me'onto ira mia mpekombia, me'onto ira mia mpongkaa kaanga anu pinokogagi-Do Ue Ala ka domengkaano mia anu mpompe'ala-ala ka anu mento'oriomo menteea saru mpontarimakasi. 4Hangano luwuno anu pinokogagi-Do Ue ala atuu moiko ka maupo te'asa nahina anu upali, tewala tinarimaako pontarimakasi, 5hangano luwuno atuu pinokomemporiako pau-Do Ue Ala ka pekakai.
6Saru wela mopoto'oriako ira pepaekompoto mongkona luwuno atuu, omue kogagi aasa puu pompekakaako-Do i Kerisituu Yesu anu moiko, tepaguru a luwuno pepu'uano pompe'ala-alato ka a pompaguru mentee anu utondaomo andio. 7Sine olaiakonomo tutu-tutuludo beine memota'u anu nahina tuduno. Pepokoleleomo pesomba. 8Mokoleleoo koroi tolino komba hadio tuduno, sine mesomba atuu mentudu a luwuakoano, hangano i tu'ai hinao dandi, moiko tiano tuwu andio maupo tiano tuwu anu ta hawe. 9Pau andio mentee ka tekona itinarima ka ipine'ala-ala ntu'u. 10Onaemo pu'uno ka tompe'isei ka mpeteahako, hangano mpomperorohi kita ndi Ondae Ue Ala anu tuwu, Puu pongkaduduido luwuno mia, tamoako lahi ondae anu mpompe'ala-ala.
11Paleleomo ka pompaguruakomo luwuno atuu. 12Si hina maupo te'asa mia me'uru-uruko hangano mongurako. Gagimo pandirido luwuno mia mpompe'ala-ala, a mpepaumu, a mpelelumu, a pompehohawamu, a mpetenunumu ka a memporimu. 13Kontongaano atuu, ranta ka kuhawe temokua basaako ira bawaa Wunta Mempori, mompokomoroso ka mompaguru. 14Si kolupeo pakeo pompowee inso ndi Ondae i Ue anu hina ndi omue, anu uwineeako hangano pinau anu ta gagi ka saru pedampono kaedo penatua. 15Pekokoongakonomo luwuno atuu, tuwumo i larono ka imengkaa a luwuno mia kotaha-tahaneno tumuwumu. 16Dagaiomo koroimu omiu-miu ka dagaiomo pompagurumu. Petenunumo a luwuno atuu, hangano a wineweumu kanandio kokumaduduio koroimu ka luwuno mia anu rumongeko.
Currently Selected:
1 TIMOTIU 4: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
