1 TIMOTIU 6
6
1Luwuno mia anu mpontembi te'ataa ka domentuduo uedo tekona ipohawe luwuno pompelangkai, ka si dompepaukiakono mia nee-Do Ue Ala ka pompaguruto. 2aTewala uedo asa mia mompe'ala-ala, si komba nahi inondaha lahi hangano mpepaekompo ndi Ondae i Kerisituu, tendeano onae asalakono ka dompekakaakono lalu moiko mbo'u, hangano ue anu montarima ronso pompekakaakodo onaemo pepaekompo anu mompe'ala-ala ka anu pinehohawa.
Mongkona haki pande mpau ka mongkona mongkekewoi doi
6:2b-10
2bPompaguruakomo ka pompatuduakomo luwuno andio. 3Tewala asa mia mompaguruako pompaguru susua ka nahi tondao pompaguru anu mentee – onaemo pau-Do Ueto i Yesu Kerisituu – ka nahi tondao pompaguru anu menunu saru pesombato, 4onaemo asa mia mompeto'o-to'ori kahinaano nahi ponto'ori hapa-hapa. Hakino onaemo mo'ungke-ungkeako ka pande mpau, mompokohina kohili, teposisalaa, pomposebea, porerengko, 5pengengea i olodo mia anu nami dompompewowolo mbo'u mentee ka anu tetadiomo menteea, anu potaedo mesomba atuu onaemo aasa insoano me'uraa. 6Lano mesomba atuu tewala tinondaako pompesompo, mompowee ura langkai. 7Hangano nahi tompowawa hapa-hapa i wawontolino ka nahi tompokompowawa mbo'u hapa-hapa mpeluarako. 8Poolo ka ihina kaanga ka sangka, sompoomo. 9Sine ondae anu inehedo mengkaea ntedonta a mpo'ara-arahako, a laro oho ka a laro mperupa-rupa po'eheno aroa anu nahina pengkonaano ka anu monsolangi, anu motonduo mia a ntedontaa ka matea. 10Hangano hakano luwuno mosa'oa onaemo mongkekewoi doi. Hanganomo mpolulu doi ba opia mia mepansia iramo inso a pompe'ala-ala ka mebobarasaiakono koroido mperupa-rupa masusaa.
Pe'oliwi pokotompa
6:11-21
11Sine omue hei mia-Do Ue Ala, olaiakonomo luwuno atuu, ungkeomo moleoa, pesomba, petenunua, pompehohawa, pompedato ka mauru. 12Petandimo a mpetandia pompe'ala-ala anu mentee ka pete'umalaomo tuwua anu nahina tampulaano. Onaemo atuu ka upinoboimo ka upedandiakomo dandi anu mentee i arodo hadio sakosii. 13#Yoh. 18:37 I aro-Do Ue Ala anu mompowee tuwua a luwuakoano ka i aro-Do i Kerisituu Yesu anu medandiakomo dandi anu mentee mbo'u atuu i arono i Pontiu Pilatu, kupebooliakono ndi omue: 14Tondaomo parenta andio, saru nahina tetewehiano ka nahina tataano, ranta a tempono Ondae Ueto i Yesu Kerisituu mepokomengkaa, 15onaemo tempo anu Ira tumantuio anu Pabawa anu asa-asa-Do ka anu buke me'uraa, Mokole i wawono luwuno mokole ka Ue i wawono luwuno ue. 16Ondaemo asa-asa-Do anu nahi Dopetenunu a matea, mo'ia a laro mewine anu nahi pinokorangkuhi. Maupo te'asa mia nahina hori kumita Ira ka mia lano nahi pokokita Ira. Ndi Ondaemo pompelangkai ka pabawa anu nahina tampulaano! Ami.
17Pauako iramo mia mengkaea i wawontolino andio ka si dompompelangka-langkai ka si dompomperorohi a aasa anu nahi manasa kana kaeaa, tendeano ndi Ondae Ue Ala anu a ngkaea-Do moweeakita luwuakoano ka tomentekonaakono. 18Pauako iramo atuu poweweu moiko, gagi kaea a laro mpoweweu moiko, inehedo pompowee ka mpontia 19ka ba kanandio mpopumpu aasa arataa gagi pepu'ua anu moiko a ngkoroino i tempo anu ta hawe ka domehaweo tuwua anu menteeano. 20Hei Timotiu, pekariaomo hapa anu umariomo upine'ala-alaako. Olaiakono pau anu nahina tuduno ka anu nahi mempori ka luwuno teposisalaa anu mepu'u inso a hapa anu pinau ponto'ori, 21hangano hinao ba opia mia anu mpompaguruako ka ba kanandio pansiaomo inso a pompe'ala-ala. Pe'aroa kumongkomi komiu!
Currently Selected:
1 TIMOTIU 6: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
