1 TIMOTIU 3
3
Atora gagi petewawa bawaa
3:1-7
1Menteeomo pau andio, ”Mia anu ineheno potoro gagi petewawa bawaa ineheno anggaa anu tekosi.” 2#Tit. 1:6-9 Onaemo pu'uno petewawa bawaa asalakono asa mia anu nahina tataano, tama anu asa koa beineno, mompedato, pande mosongka, moiko gauno, ineheno metotoka, pande mompaguru mia, 3komba marampo'inu, komba marantekuda tendeano me'aroa, mompokomoiko mia teposisala, komba te'ataako doi, 4aasa petewawa sombori anu moiko, inondaha ka dompelangkaio anano. 5Tewala asa mia nahi ponto'ori mosongka a laro nsomborino, kana'umpeke ka ipoko'orusuo Bawaa-Do Ue Ala? 6Onae komba mia anu da sarai itepidi, ka si gagi mompelangka-langkai ka ikonao hukuno i Mosa'o. 7Onae ka imoiko koa mbo'u neeno i bungkuno bawaa, ka si domentatao mia ka itedonta a ohono i Mosa'o.
Atora gagi diakee
3:8-13
8Kanandio koa mbo'u luwuno diakee asalakono mia mempinelangkai, ka si pesampa elo, ka si marampo'inu, ka si po'ungke urano a nsala anu molengku, 9tendeano mia anu mekariao rahasiano pompe'ala-ala i laro aroa anu mempori. 10Ondae mbo'u asalakono me'inarahako koa ari, mansano nahina tataado ka do'amba mempinakosi a pompekakaakoa atuu. 11Kanandio koa mbo'u luwuno beinedo ka domia koa mentinudu, ka si marapomposebe, asalakono mokompompedato ka pine'ala-ala a luwuakoano. 12Diakee asalakono tama anu aasa koa beineno ka moiko iposongkaako ira anano ka somborino. 13Hangano ondae anu moiko dompompekakaako mpohawe potoro anu moiko ranta ka domemalua mpesakosii a pompe'ala-ala ndi Ondae i Kerisituu Yesu.
Bawaa-Do Ue Ala, pu'uno ka tumbono menteea
3:14-16
14Luwuno atuu kuburioakomu, maupo kuperorohio aku koa ronga mokohaweko. 15Gaagi tewala nahi kuronga hawe, uto'oriomo ba kana'umpe asalakono mia domentuwu gagi ihino sombori-Do Ue Ala, onaemo bawaa-Do Ue Ala anu tuwu, karu pontumbo ka pu'uno menteea. 16Ka menteeano langkaiomo rahasiano pesombato:
”Ondae, anu mepokomengkaa Iramo a rupano mia,
pinokomentee a Mpenaa;
anu mepopokita a luwuno mala'eka,
pinalele i olodo luwuno tongku anu nahi domento'ori Ira Ue Ala;
anu pine'ala-ala i wawontolino,
winuatako a marambaa.”
Currently Selected:
1 TIMOTIU 3: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
