1 TESALONIKA 4
4
Patudu ka tomentuwu mempori
4:1-12
1Poko'ariano, pepaekompo luwu-luwu, kime'emao ka patudu komiu ndi Ondae Ue Yesu: Imerongeomo inso ndi omami ba kana'umpe asalakono imentuwu ka Dopemoikoo Ue Ala. Mongkona atuu lano imentondaomo, sine moikoopo imeweweuo lalu mpopesu'ui mbo'u. 2Imento'orio koa mbo'u luwuno pontiso isua anu kimewee komiumo a nee-Do Ue Yesu. 3Hangano ndiomo po'ehe-Do Ue Ala: pokomemporiamiu, onaemo ka ime'olaiakono pebelesua, 4ka impo'alamo singge mia aasa beine gagi beinemu ka imentuwu a laro pepokomemporia ka pompelangkaia, 5komba a mpo'eheno koroi, kana wineweudo mia anu nahi domento'ori Ira Ue Ala, 6ka mongkona luwuno andio mia ka si poweweu anu nahi moiko a mpepaekompono ke mopo'oo. Hangano Ondae i Ue mombaloakono luwuno andio, kana anu kimempauomo ka mpokomanasaa komiu i ndi'upua. 7Dopoboi kita Ue Ala komba ka tompoweweu hapa anu mokoburu, tendeano hapa anu mempori. 8Onaemo pu'uno isema anu nahi tarimao andio komba mia anu nahi tarimao, tendeano nahi tarima Ira Ue Ala anu moweeakomiumo mbo'u Penaa-Do anu mempori. 9Mongkona pompehohawa a mpepaekompo siimo imebinuriako, hangano omiu isa'a mpepaguru komiumo mambepehohawa inso ndi Ondae Ue Ala. 10Mongkona atuu imeweweuo koa mbo'u a luwuno pepaekompo i asa wawo wita Makedonia. Sine kimempatudu komiu, pepaekompo luwu-luwu, ka imeweweuo lalu mpompesu'ui mbo'u. 11Ka topotaemo kana aasa pompelangkai ka irodo imentuwu, ka imeweweuo luwuno anggamiu omiu-miu ka mpo'anggaako kae, kana anu kimempauakomiumo, 12ranta ka imentuwu kana mia anu mponto'ori gau a pongkitado mia i bungkuno ka nahi impomperorohi ndi ondae.
Hawea-Do i Ue
4:13-18
13Ka i'amba nahi kimebehe, pepaekompo luwu-luwu, nine nahi imento'orio mongkona ondae anu memate, ka si mpompemasusa kana mia mehano anu nahina pomperorohido. 14Hangano tewala tompe'ala-alao, nine Ondae i Yesu mate Iramo ka mewangu Iramo, ka tompe'ala-alao koa mbo'u nine ondae anu memate iramo ndi Ondae i Yesu Ira pumpu ira Ue Ala meronga saru Ondae. 15#1Kor. 15:51-52 Ndio kimempauakomiu a mpau-Do i Ue: ontae anu mentuwu, anu da mpo'ia ranta hawea-Do i Ue, nahi ntu'u kita mpese'elungi ira anu memate iramo. 16Hangano i tempono pinowee petondoni, onaemo tempono ipebooli petewawado mala'eka ka tawuwua-Do Ue Ala me'uni, ka Ondae i Ue Ira metii inso i suruga ka ondae anu memate ndi Ondae i Kerisituu ira ntese'elu mpewangu; 17umarino atuu, ontae anu mentuwu, anu da mpo'ia, kita mentinande mperonga-ronga saru ondae a laro nseru tumotowo Ira i Ue i laro meene. Kanandiomo ontae kita mperonga-ronga saru Ondae i Ue ranta nahina tampulaano. 18Onaemo pu'uno imemambe tareroakomo luwuno pau andio.
Currently Selected:
1 TESALONIKA 4: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
