1 Samueli 9

I Saulu gagi mokole

9:1–10:16

1Hinao asa mia inso i wita Benami, neeno i Kisi anano i Abieli anano i Sero anano i Bekorata anano i Apia, to Benami, asa mia kaea ka tinudu. 2Onae hinao anano asa ana ntama meneeako i Saulu, asa mia da mongura ka montama. Nahina to Isaraeli anu lalu montama sekonopo onae. Koroino ondau, luwuno mia butu hawe i oweano. 3I Kisi amano i Saulu, tetadi ba opia kalideno waino. Motaeomo i Kisi ndi Saulu, anano, ”Poboio asa ata walimu lumako umungkeo kalide atuu.” 4Lumako iramo morake i mentorukuno Eparai, telalo ira mbo'u i wita Salisa, sine nahi dohaweo. Ka do'amba lumako umungkeo i wita Sahalimi, sine nahi dohaweo kalide atuu i ra'ai. Lumako iramo mbo'u umungkeo i wita Benami, sine nahi dohaweo. 5Mansado hawe i wita Supi, ipotae i Saulu ndi atano anu perongano, ”Aiwa ka topekule. Te'ingka nami komba kalide mbo'u domasusaako i ama, sine tamo ontae.” 6Sine ata atuu motaeakono, ”Siipo'ari, i kota andio hinao asa tetenaa-Do Ue Ala, asa mia anu tedoa pinelangkai. Luwuno anu pinaudo asalakono gagi. Aiwamo ka tolako i ra'ai, bara'ura ira ta paua kita pesalaa anu ta tinondato.” 7Ipotae i Saulu ndi atano, ”Sine batolako, hapa anu kita wawaako ira? Roti pingkoomo, ka nahina pompowee topowawaako ira tetenaa-Do Ue Ala atuu. Hapa anu hina ndi ontae?” 8Ata atuu wali sumangkio i Saulu, ipotae, ”Moikoano dahinao ndi ongkue tia opaano sikala salaka. Onaemo aku weeako ira tetenaa-Do Ue Ala atuu ka dopaua kita pesalaa anu kita tumondao.” 9I ndi'ipua i Isaraeli tewala mia lumako ta mo'ema pontiso-Do Ue Ala, dompotae kanandio, ”Aiwa ka tomelako a puu mpongkita.” Anu tempo kanandio nineeako nabi. 10Ipotae i Saulu ndi atano, ”Pohaweno aroamu atuu moiko, aiwa ka tolako.” Ka do'amba lumako i kota po'iangado tetenaa-Do Ue Ala atuu.

11Mansado lumako morake te'aro i kota, dotepohaweako ira beine anu mpeluarako ira melako mpotambu uwoi. Dosikeno ira beine atuu, ”Kongko ira koake i ndi'ai puu mpongkita?” 12Mesangki ira beine atuu, ”Humbee, kongko ira, da sarai dotelalo mese'elungi komiu. Ipontuturakomo, da'iaopo dohawe i kota oleo andio, hangano bawaa ira mpoweweu gau mpesomba i pongkuno wita oleo andio. 13Tewala ronga komiu koa mewinso i kota, komiu tepohaweako ira napi doporake lumako mongkaa. Hangano bawaa napi ira mpongkaa ba napi dohawe nde ondae anu ira rumonsoo pesomba atuu, ka do'amba mia inolu mpongkaa. Ilakomo, komiu koa ronga tepohaweako ira.” 14Morake iramo te'aro i kota. Mansado mewinso i kota, dokitaomo i Semueli meluarako ta morake lumako i pongkuno wita, ntepodupa iramo.

15Asa oleo se'eluno napi hawe i Saulu, Ondae i Ue umari Iramo mopoto'oriakono i Semueli kanandio, 16”Tisomo tempo kanandio, Aku mo'oliwi asa mia tama ndi omue inso i wita Benami. Mia atuu urapiomo ka igagi mokoledo bawaa-Ku Isaraeli. Onae ta kumadudui ira bawaa-Ku inso a ngkaedo to Pelisiti. Nde Kukitaomo marasaido bawaa-Ku atuu hangano peboolido haweomo ndi Ongkue.”

17Mansano kumitao i Semueli i Saulu, pau-Do i Ue ndi onae, ”Onaemo andio mia anu Kupauakomu atuu. Onaemo anu ta gagi mokoledo bawaa-Ku.” 18I Saulu aiwa umpedaakono i Semueli a mpewowa bente, ka ipotae, ”Tabeamiu, isua rahado mia puu mpokita?” 19Sumangki i Semueli ndi Saulu, ”Ongkuemo puu mpokita atuu. Lakomo se'elu porake a pongkuno wita. Oleo andio omue komongkaa meronga saru ongkue ka tisomopo mo'oru ka ku'amba umeheakomu mekule. Aku koa pauakomu luwuno anu pinemasusano aroamu. 20Mongkona luwuno kalidemu anu tetadi otolu oleo anu telalo, siimo pewowoloo hangano hinaweomo. Isema anu mompekaria luwuakoano anu inehedo to Isaraeli? Nde komba omue ke ka luwuno pe'etumu?” 21Sumangki i Saulu, ”Ongkue andio to Benami, tongku anu lalu kodei i Isaraeli, omami anu mpepe'etu anu lalu tedei inso a luwuno to Benami. Tembio ka ipotae kanatuu ndi ongkue?”

22Umarino atuu i Semueli moboi ira i Saulu saru atano, ka iwawa ira i larono ipoweeako ira pentoroa anu pinakosi i arodo luwudo mia mempinoboi anu bara'ura tolu pulu mia hadiono. 23I Semueli motaeakono puu mponahu, ”Bau anu kutenakomu ka upesusuao: onae weeakono.” 24I'alao puu mponahu atuu ihi mpa'ano ka ipatindaakono i arono i Saulu. Ipotae i Semueli, ”Kaanga anu pinesusua tepatinda i aromu. Pongkaamo, kaanga andio lano pinatinda tiamu ka upongkaa saru bawaa a porame-ramea andio.” Oleo atuu i Saulu mongkaa meronga saru i Semueli. 25Umarino atuu mpotindulu iramo inso i pongkuno wita melako i kota. Ka i'amba i Semueli mepau-pauakono i Saulu a dunsi.

26Mo'oru mewangu iramo. Mansano mewanta oleo, i Semueli moboio i Saulu anu moturi i dunsi, ”Pepatindamo, aku lumako morontoko.” Mansano umari mepatinda i Saulu, meluarakoomo merongakono i Semueli. 27Montindulu ira i wiwino kota, ipotae i Semueli ndi Saulu, ”Potaeakono atamu atuu ka ilako tese'elu.” Ata atuu lumakoomo. ”Sine omue penaa-naa sarai, Aku mompauakomu pau-Do Ue Ala ndi omue.”

Currently Selected:

1 Samueli 9: XMZ

Highlight

Copy

Compare