1 Samueli 10
10
1Ka i'amba i Semueli umalao pido kodei me'ihi lana ka isiwuiakono a uluno i Saulu. Iwoo-wooo i Saulu ka ipotae, ”Ondae i Ue anu umurapiko gagi mokole a bawaa-Do Isaraeli. Omue gagi mokole a bawaa-Do i Ue ka omue anu ta motola ira inso a ngkaedo luwuno iwalido a mpetengi-tengino. Ndiomo tondonino nine Ondae i Ue umari Iramo umurapiko gagi mokole a bawaa-Do: 2I tempono ulako binta aku oleo andio, kotepotowoakono orua ira tama umpeda a ngkaburuno i Raheli, i Selisa i wita Benami. Ondae anu ta pauakomu, ’luwuno kalide anu inungkemu, hinaweomo. Anu pinemasusano amamu, komba kalide mbo'u atuu, sine koroimu. Ipotae: Hapa ta wineweuku mongkona anaku?’ 3Inso i ra'ai pelempa mpiha ranta kau hawe a pu'u ngkeu tarabanti i Tabori. I ra'ai kotepohaweakono otolu ira tama anu melako mpowawa pesomba ndi Ondae Ue Ala i Beteli. Asa mia mowawa otolu ana bembe, asa mia mowawa otulu roti ka asa mia mowawa asa kadu anggoro. 4Ira mpetabe ndi omue ka ira mpoweeakomu orua roti anu kotumarimao inso ndi ondae. 5Umarino atuu komo hawe i Gibea-Ue Ala, i tu'ai hinao po'ianga podagaiado sorodadu to Pelisiti. Itempono upewinso i kota, kotepotowoako ira asa bawaa nabi anu mpontindulu inso a pongku mpesomba, saru mia mpegambusu, mperebana, mpesiloli ka mpekasapi i arodo. Kanatuumo ondae mebukeako penaa kana nabi. 6Penaa-Do i Ue ta mo'ia ilaromu pabawaiko ka omue mbo'u kobukeako penaa kana luwuno nabi perongamu. Omue kotebali nami pengkena tuwumu se'eluno. 7Tewala luwuno petondoni andio gagi ndi omue, weweuo hapamo koa anu tekona uweweuo, hangano Ondae Ue Ala kumongkomiko. 8Omue asalakono kometii i Giliga mese'elungi aku, penootio aku aiwa ndi omue mompesombaako pesomba tinunu ka pesomba tekaduduia. Asalakono komesikori opitu oleo ranta ka kuhawe ndi omue pauakomu hapa anu ta wineweumu.”
9Tempono i Saulu lumako bintao i Semueli, Dobalio Ue Ala aroano ka luwuno petondoni gagi ndi onae oleo atuu. 10Mansado mehawe i Gibea inso iraane, ntepotowo iramo asa bawaa nabi saru i Saulu. Nahi koo-kooo Penaa-Do Ue Ala mansa pabawaio ka bukeakoomo Penaa kana nabi i olodo. 11Mansado mengkitao luwudo mia anu tumo'orio i Saulu se'eluno, nine bukeakoomo Penaa saru luwuno nabi, sisingge ira mpepau nte'o'asa mia, ”Hapa anu gagi ndi anano i Kisi? Nde saru mbo'u i Saulu ke tewinso nabi?” 12#1Sam. 19:23-24Asa mia i olodo sumangki, ”Isema menteeano petewawado?” Onaemo kai hina pau, nde tewinso mbo'u nabi ke i Saulu?
13Umarino ibuketio Penaa kana nabi, mekuleomo i Saulu i pongkuno wita. 14Maamano i Saulu motaeakono saru atano, ”Insokomiu isua ke?” Sumangki i Saulu, ”Inso kami umungke ira kalide atuu. Hangano nahi kikita ira, lumako kami ndi Semueli.” 15Ka i'amba motae maamano i Saulu, ”Tutuluakune hapa anu pinauno i Semueli ndi omue.” 16Ipotae i Saulu ndi maamano, ”Dopauakami nine kalide atuudo mehinawe iramo.” Sine i Saulu nahi tutuluako ira hapa anu pinaudo i Semueli mongkona potoro mokole.
I Saulu gagi mokole molalo undi
10:17-27
17I Semueli moboi ira palili mpepumpu i aro-Do i Ue i Misipa. 18Ipotaeako ira to Isaraeli, ”Kanandiomo pau-Do i Ue, Ue Alado to Isaraeli: Kutaate komiumo mpeluarako inso i wita Masiri ka Kupotola komiumo inso a ngkaedo to Masiri ka inso a luwuno poparentaa anu mpokonsii komiu. 19Sine kanandio-andio nahi impe'ala-ala Ira Ue Alamiu anu kumadudui komiu inso a luwuakoano masolaa ka masusaamiu, ka impotaeako Ira, ’Ipotoroa kami asa mokole.’ Gagi kanandio, impentademo i aro-Do i Ue montonda suku ka pepe'etuamiu.” 20I Semueli tumena ira luwudo suku Isaraeli mpentade i arono, ka i'amba suku Benami anu kona undi. 21Itena ira suku Benami mpentade i arono montonda pepe'etuado, ka pepe'etuano i Matiri anu kona undi, ka i'amba undi pokotompa kona ndi Saulu anano i Kisi. Sine mansano inungke, nahi hinawe. 22Onaemo pu'uno ka dompo'ema mbo'u pontiso ndi Ondae i Ue, ”Nde mia atuu hawe koa ke i ndi'ai?” Sumangki Ira i Ue, ”Kitao, onae mewuni i olono sangka anu hadio.” 23Ka do'amba mpelulu mia lumako moboio. Mansano mentade i olodo mia hadio, onae anu lalu ondau, luwuno mia butu hawe i oweano. 24Ipotaeako ira i Semueli luwuno tongku atuu. ”Imengkitaomo mia anu bininiki-Do i Ue atuu? Nahina kana onae a luwuno tongku andio.” Mpebooli iramo tongku atuu, ”Hio! Tuwu mokole.”
25I Semueli pauako ira tongku atuu luwuno tiano poparentaa. Ka i'amba burio a wunta ka inaao i aro-Do i Ue. Umarino atuu itena iramo i Semueli tongku atuu ka dompekule sompo-sompo mia i rahado. 26I Saulu mbo'u mekule i rahano i inia Gibea, ka mpetonda ira ba opia mia moroso ntu'u anu aroado Dopabawaiomo i Ue Ala. 27Sine dompotae mia melambaha, ”Kana'umpe mia andio ta mokokadudui kita?” Dompepaukiakono ka nahi dompowawa pompowee ndi onae. Sine nahi perio ira.
Currently Selected:
1 Samueli 10: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
