1 Samueli 8

To Isaraeli mpo'ema mokole

8:1-22

1Mansano mota'uomo i Semueli, ipotoro ira anano anu tama gagi puu mpobitara a nto Isaraeli. 2Neeno anano anu aka i Yoeli ka anano anu ko'orua i Abia. Orua ira moparenta gagi puu mpobitara i Bereseba. 3Sine orua ira anano atuu nahi dotondao peleluno amado. Montarima ira pompowee anu nahi moleo ka dowoliliki ira kara-kara, anu sala pinokomentee ka anu mentee pinokonsala.

4Onaemo pu'uno luwuno mia mota'u to Isaraeli mpepumpu ka dome'aiwa ndi Semueli i Rama. 5#Win. 17:14Dompotae ndi onae, ”Omiu mota'u komiumo, ka orua ira anamiu nahi dotondao pelelumiu. Gagi, ipompotoroa kami asa mokole anu moparenta ndi omami, kana luwuno tongku susua.” 6Sine masusa aroano i Semueli rumongeo po'emado, ”Ipoweeakami asa mokole anu moparenta ndi omami.” Onaemo ka ipekakai i Semueli ndi Ondae i Ue. 7Pau-Do i Ue ndi Semueli, ”Tondaako ira po'ehedo palili luwuno anu domempauakomu. Komba omue anu nahi domentarimako, sine Ongkue kasi Kugagi mbo'u mokoledo. 8Dompebungkui Aku ka dompesomba a anu pinesombai susua, mompu'u Kutaate ira mpeluarako inso i wita Masiri ranta hawe kanandio-andio. Kana'umpe domeweweu Aku kanatuumo domeweweuko. 9Onaemo ka utondaako ira nineedo. Sine pauako ira temanasa ntu'u pabawano mokole anu ta moparenta ndi ondae.”

10Luwuno pinau-Do i Ue, ipauako ira i Semueli a mpalili anu mpo'ema asa mokole ndi onae, 11ipotae, ”Andio pabawano mokole anu ta moparenta ndi omiu. Onae ta umala ira anamiu anu tama gagi sorodadu a ngkareta mpe'iwali, sorodadu mpengara, ke anu mpelulu i arono karetano. 12Onae ta tumena ira gagi petewawa asa nsowu sorodadu ka petewawa lima pulu sorodadu. Ondae ira mpopadeko lereno ka mensowiakono. Ondae ira mpoweweu sangka mpetea ka sangka mpetea a ngkaretano. 13Onae ta umala ira anamiu beine gagi puu mpoweweu mina-mina, puu mponahu, ka puu mpoweweu roti. 14Onae ta umalao wua pinopaho anu lalu moiko i leremiu, i lere anggoromiu ka i lere saitumiu, ta mewineeako luwuno pegawaino. 15Onae ta umalao tia hopuluno inso a gandumiu, wuano anggoro i leremiu, ira mewineeako pegawai a langkanae ka pegawai anu susua. 16Onae ta umalao atamiu tama ka beine, pinotuwumiu anu lalu moiko ka kalidemiu, ta pinake mo'angga anggaano. 17Onae ta umalao tia hopuluno bembe bimbamiu. Ka omiu ta gagi atano. 18I tempo atuu komiu mperaipi hangano mokole anu bininikimiu atuu, sine i tempo atuu Ondae i Ue nahi Ira sumangki komiu.”

19Sine nahi domperorongeakono palili pinauno i Semueli ka dompotae, ”Naahi, asalakono kai hina mokole ndi omami, 20omami mbo'u inehe mami kana luwuno tongku susua. Mokole mami ta parenta kami, petewawa mami ka lumako metea saru omami.” 21Iperorongeakono i Semueli luwuno pinaudo palili ka ipohaweo ndi Ondae i Ue. 22Pau-Do i Ue ndi Semueli, ”Tondaako ira po'ehedo, ka potoroako ira asa mokole.” Ka i'amba i Semueli motaeako ira to Isaraeli, ”Imelakomo nte'o'asa mia mekule i kotano.”

Currently Selected:

1 Samueli 8: XMZ

Highlight

Copy

Compare