1 Samueli 30

Pombalono i Daudi a nto Amale

30:1-25

1Ko'otulu oleono i Daudi saru luwuno miano mehawe i Sikala, umariomo domensapoio to Amale Wita Nege ka Sikala. Domenangi ira ka domesongkoo kotano. 2Dotawa ira luwuno beine ka luwuno mia i ra'ai, mota'u ke mongura nahina pinepatedo maupo te'asa mia tendeano domewawa ira ka dompotilaloakono pelempado. 3I Daudi saru luwuno miano hawe a ngkota atuu. Mengkaaomo, kota atuu umariomo tinunu ka kombiado saru anado tama ka beine tinawa. 4Mengeseomo i Daudi saru luwuno sorodaduno, ranta nami dompokompengese mbo'u. 5#1Sam. 25:42-43Orua ira kombiano i Daudi tinawa, onaemo i Ahinoa, to Yisire'eli, ka i Abigai, umari kombiano i Naba, to Karameli. 6Tedungkuomo i Daudi hangano dompotae palili ira mewunoakono watu. Luwuno palilino masusa aroado, hangano anano tama ka beine. Sine i Daudi mohawe roso inso ndi Ondae i Ue, Ue Alano.

7 # 1Sam. 22:20-23 Ka i'amba i Daudi parentao sando mpesomba Abiata anano i Ahimele, ipotae, ”Wawaomo epo ndi ongkue.” Iwawaomo i Abiata epo ndi Daudi. 8Ka i'amba i Daudi mo'ema pontiso ndi Ondae i Ue, ipotae, ”Asalakono aku lumulu ira ke mia memosa'o atuu? Nde da aku koa humawe ira ke?” Mepau Ira i Ue ndi onae, ”Lulu iramo, hangano menteeano kohumawe ira ka motola ira luwuno tinawa.” 9Ka i'amba lumako i Daudi ka nomo etu mia anu tumondao hawe a ngkorono Mo'are Besori, kontongaano asa ntia inso ndi ondae mpenaa-naa i ra'ai. 10I Daudi saru pato etu mia mpotilalo mpepolulu, ka orua etu mia susuano anu tedoa mokendo ba domensakio Korono Mo'are Besori mpenaa-naa i ra'ai.

11A ntonga mpada domehaweo asa mia to Masiri ka domewawao ndi Daudi. Dompoweeakono roti ka ikaano, ka dompopo'inuakono uwoi. 12Ka do'amba mpoweeakono asa mpole kukisi ara ka orua kukisi kisimisi. Mansano mongkaa, morosoomo mbo'u, hangano tolu oleo ka tolu wongi nahi hori mongkaa. 13Ka i'amba mesikeno i Daudi ndi onae, ”Atano isema omue ka isua insoamu?” Sumangki mia atuu, ”Ongkue mangalitau to Masiri, atano asa to Amale. Dobinta aku ueku hangano otulu oleo anu lalo, mahaki aku. 14Umari kamimo mensapoio Wita Nege to Kereti, i wita Yehuda, ka Wita Nege to Kalebi. Ka maupo Sikila umariomo kimesongkoo.” 15Mesikeno i Daudi ndi onae, ”Upolio ke wawa aku a mia memosa'o atuu?” Ipotae, ”Ipesumpamo ndi ongkue a nee-Do Ue Ala, nine nahi komiu mepate aku ke meweengako aku a ngkaedo ueku, aku koa wawa komiu a mpo'iangado mia mosa'o atuu.”

16Mia atuu tumeoo i Daudi iraane, ka dokita iramo mia atuudo ntesiarawo a wawo wita, mpongkaa ka mpo'inu mporame-rameako pinomurudo anu hadio, anu merinontudo inso a witado to Pelisiti ka i witado to Yehuda. 17Tisomono umpeda meene, i Daudi sumapoi ira ranta hawe sumoo oleo. Nahina maupo te'asa mia inso ndi ondae anu tola, sangkadio pato etu mangalitau anu mpolai mpompesawiki unta. 18I Daudi wali umalao luwu anu me'inalado to Amale. I Daudi motola ira mbo'u orua ira kombiano. 19Nahina anu tetadi inso ndi ondae, moiko anu kodei ke anu langkai, ana ntama maupo beine, pinomuru maupo luwuakoano anu inalado, ipokule ira luwu i Daudi. 20I Daudi umalao luwuno bembe bimba ka sapi. Luwuno atuu dopokonse'elu ira i arono pinotuwu susuaano, ka dompotae, ”Onaemo ndio pinomuruno i Daudi.”

21Ka i'amba i Daudi hawe a rua etu mia anu tedoa memokendo mentondao, anu binintano umpeda Korono Mo'are Besori. Mpeluarako ira mentotowoo i Daudi ka palili anu mentondao. Irangkuhi ira i Daudi mia atuudo ka isangkalima ira. 22Sine, mpepau iramo luwuno mia mosa'o wineweuno ka melambaha i olodo mia anu melako tumondao i Daudi, dompotae, ”Hangano nahi domelako saru ontae, nahi kita mpoweeako ira maupo hapa anu pinomuru anu inalato. Sine, ana ka beinedo nte'o'asa mia moiko ba domewawa ira!” 23Ipotae i Daudi, ”Luwumiu pepaekompoku, si mpoweweu kanatuu saru hapa anu pinowee-Do i Ue ndi ontae. Dokongkomi kitamo ka Dopeweengako iramo a ngkaeto mia melambaha anu sumapoi kita. 24Isema anu ta merorongeakomiu mongkona anu andio? Hangano tiano mia anu mo'ia modagai sangka, mengkena saru tiano mia anu lumako metea. Ondae ira pada mpohawe tia.” 25Mompu'u oleo atuu ranta potilaloano, mongkona atuu pinokogagiomo pompakosia ka atorado to Isaraeli ranta oleo andio.

Pompoweeno i Daudi a mia memota'u i Yehuda

30:26-31

26Mansano hawe i Daudi i Sikala, i'oliwio asantia pinomuru atuu a mia memota'u i Yehuda, ka a wali-walino, saru pe'oliwi, ”Ndiomo pompowee tiamiu inso a mpinomuru anu inala a iwali-Do i Ue,” 27a sompo-sompo mia memota'u i Beteli, i Ramoti i Wita Nege, i Yatiri, 28i Aro'eri, i Sipimoti, i Esitemoa, 29i Rakali, ka luwuno kotado to Yerahime'ela, a luwuno kotado to Keni, 30i Horima, i Bori-Asani, i Ataki, 31i Heberoni, ka a luwuno po'ianga anu hori tetoroano i Daudi saru luwuno miano.

Currently Selected:

1 Samueli 30: XMZ

Highlight

Copy

Compare