1 Samueli 29

I Daudi nahi ineheako metonda metea

29:1-11

1Dopumpu ira to Pelisiti luwuno sorodadudo i Apeki, ka to Isaraeli mpekema umpeda a mata uwoi i Yisire'eli. 2Luwuno mokoledo to Pelisiti melako mpebaresi saru sorodadu asa etu ka asa nsowu. I Daudi ka luwuno miano mpelempa ira mbo'u mpebaresi i bungkuno saru i Akisi. 3Mpotae iramo tadulako sorodadu to Pelisiti, ”Kana'umpe ira ke to Ibarani andiodo?” Sumangki i Akisi, ”Komba onae ke atuu i Daudi, atano i Saulu mokoledo to Isaraeli, anu asa ke orua nta'umo andio kiperonga-ronga, nahina kupohawe wineweuno anu mosa'o mompu'u ipelimba ndi ontae ranta hawe oleo andio.” 4Sine luwuno tadulako sorodadudo to Pelisiti ntekuda ndi onae, dompotae, ”Tenaomo mia atuu ka ipekule a mpo'ianga anu itinisoako. Kasi petonda metea saru ontae, kasi gagi iwalito a laro mpeteaa. Hapa mbo'u ta pinemoikono ueno mia andio, ba nahi komba uludo miato? 5#1Sam. 18:7; 21:11Komba onae ke atuu i Daudi anu pinenaniakodo mia mpesangki-sangki ka mpenari-nari, kanandio,

I Saulu mompepate iwali sowu-sowuno,

sine i Daudi pulu-pulu nsowu?”

6Ka i'amba i Akisi moboio i Daudi ka ipotaeakono, ”Me'empehiako Ondae i Ue anu tuwu, omue andio mia moleo. Towela meronga lumako wawa ira sorodadu kupemoikoo; hangano nahina kupohawe wineweumu anu mosa'o, mompu'u uhawe ndi ongkue ranta oleo andio. Sine nahi dompemoikoko luwuno mokole kota. 7Onaemo pu'uno, pekulemo, lakomo temoiko ka sipoweweu anu mosa'o a pongkitado luwuno mokoledo to Pelisiti.”

8Sine motae i Daudi ndi Akisi, ”Hapamo anu wineweuku? Hapamo anu kinitamiu ndi ongkue tempono kupo'angga ndi omiu hawe oleo andio, ka nahi ku'ineheako metonda lumako metea me'iwaliako ira iwalimiu ueku mokole?” 9Sumangki i Akisi ndi Daudi, ”Kupe'ala-alako, omue mia moiko a pongkitaku, kana mala'eka-Do Ue Ala. Butumo koa luwuno tadulako sorodadu to Pelisiti anu mpotae, ’Nahi moiko ipetonda lumako metea saru ontae.’ 10Gagi, pewangumo da mo'oru saru luwuno atado uemu andio, anu aiwa merongaakomu. Tempono impewangu damo'oru ka mewineomo ntu'u, imelakomo.” 11I Daudi saru luwuno miano mpewangu da mo'oru ira mpekule i witado to Pelisiti, sine to Pelisiti atuu mpelempa melako i Yisire'eli.

Currently Selected:

1 Samueli 29: XMZ

Highlight

Copy

Compare